房協最近推出嘅資助出售房屋項目「聚然」同「峻然」，「聚然」是北部都會區首個房協樓盤進駐粉嶺市中心，「峻然」後者就延續安達臣道新社區的發展勢頭。兩大項目合共有1,604個單位，以市價約7折發售，更首推「家有長者」同「家有初生」優先選樓安排，睇吓打唔打破到樓市悶局。
「聚然」單位間格四正，露台開揚。
Sebastian參觀咗「聚然」標準廚房示範單位，整體格局開揚，間格四正，廚房已備櫥櫃搭配石英石檯面，仲有嵌入式煮食爐同抽油煙機，功能算十分齊，同一般私樓相比，都唔覺得輸蝕。
「聚然」標準廚房，基本設施齊備。
另外，較驚喜的是全數單位都附設露台，目測發現夠晒位擺放晾衫架，同時亦預留冷氣機安裝位，如果未來要維修，可直接喺露台進行，唔駛搭棚又可以慳返筆錢。「聚然」兩房戶型佔成個項目約8成，實用面積介乎388至476平方呎，有開放式廚房同標準廚房兩款設計，啱不同喜好買家選擇。「聚然」坐落喺粉嶺馬會道，步行數分鐘即到港鐵粉嶺站，週邊有商場、街市、學校等設施，尚算方便。
「峻然」大廳連開放式廚房實用光猛。
轉戰東九龍，「峻然」坐落安達臣道半山地勢，食到便利優勢及有綠化景觀。Sebastian參觀開放式廚房單位，見到L形工作枱連結客飯廳，配備櫥櫃等收裝置，廚房格局不算很大，但如果唔使日日煮九大簋嘅小家庭都夠用！單位搭配咗大面積玻璃窗引入自然光，雖然唔係全數單位洗手間都有窗，有部份會係黑厠，但係洗手間設計實用，已有齊鏡櫃同洗手盆櫃，唔使額外裝修再整。
「峻然」開放式廚房切合小家庭所需。
房協仲話「聚然」同「峻然」都獲BEAM Plus暫定金級認證，從節能玻璃窗、太陽能熱水系統到雨水回收裝置等，都體現環保理念。屋邨附屬會所除健身室、兒童遊樂區等標準設施外，仲有共享廚房同多功能室等。
「峻然」洗手間設計尤見心思。
房協今次破天荒推出雙重優先選樓政策：「家有長者」同「家有初生」優先。「家有長者」即係申請家庭其中一名家庭成員喺申請截止日期當日已年滿 60 歲。而「家有初生」家庭，即係屋企有嬰兒於2023年10月25日或之後出生，而在申請截止日期時為3歲或以下，又或喺申請截止當日有已懷孕滿 16 週嘅家庭成員，即可競逐4成預留配額。有老有少的家庭可以留意下啦。
「聚然」入場費230.7萬元（每呎7,582元）、「峻然」249.7萬元（每呎8,084元），有16間金融機構合作提供9成按揭，以「聚然」最細一房戶為例，首期約23萬，大家可以自己計下數。
即日起至4月14日，有興趣可前往房協長沙灣辦事處，親身睇吓示範單位，再部署係咪入市!
「聚然」網站（網址：https://hemmafab.hkhs.com）
「峻然」網站（網址：https://hemmaemerald.hkhs.com）
Sebastian
** 博客文章文責自負,不代表本公司立場 **
