15歲仔首去日本稱「打敗99.9%中學生」家長疑睇唔明潮語狂數仔女威水史

社會事

15歲仔首去日本稱「打敗99.9%中學生」家長疑睇唔明潮語狂數仔女威水史

2025年04月16日 14:45 最後更新：14:49

近日有一名15歲的中學生在網上發文，指「人生第一（次）去日本，打敗99.9%香港中學生」，但一句說話卻引來不少家長的誤會，以為他在炫耀自己年紀紀細細，就可以去日本旅行，紛紛留言嘲諷。

遭家長評擊並數列仔女威水史

該名中學生日前在Threads發文分享可以搭飛機去日本大阪旅行的喜悅，更附上登機前的照片，他在帖文寫到「15歲人生第一（次）去日本，打敗99.9%香港中學生」。沒想到這句說話竟然惹來不少家長網民的評擊，認為他在炫耀，又不知當下幾多人的仔女，年紀細細已周遊列國，紛紛數出自家仔女的「威水史」，「我個仔1歲生日嗰日起程同我哋一家去咗歐遊」、「我6歲已經去，你咩料」、「有幾勁？我個仔未滿月已經去咗15次日本，年輕人做人要謙虛啲」、「我9歲自己1個人搭飛機去台灣，咁樣可以打敗幾多人呀？當年係1989年」、「好明顯係99.9%香港中學生打敗你啦，睇你個樣應該人哋連快1個鐘都唔X知」。

網民批評家長：好心連潮語都唔識

有網民睇不過眼出聲力撐中學生，「成班中年阿叔阿嬸喺度跑出嚟認叻認屁……打敗99.9%中學生一定係鬥早㗎咩？唔可以鬥遲嘅？人哋有講打敗邊方面咩？」、「成班人要贏一個15歲嘅細路做乜X？」、「見到嗰班香港80後70後家長喺度獻醜，好心連潮語都唔識」、「一句咁輕鬆嘅說話竟然演變成咁，亦好睇到成人好多時唔明白年青人嘅表達模式同真正諗法！」、「作為一個成年人，見到啲不知所謂冇教養嘅成年人嘅留言，實在令人慚愧」。

樓主留言解釋：明白大家難免會get錯的

該名中學生落機後，驚見自己的帖文成為網上熱帖，更惹來各網友的爭議，他連忙留言解畫，指自己由細到大，身邊有很多朋友去過日本，但自己要等到15歲才第一次去，「所以先話自己係少數咁大個都未去過日本」。他表示「明白大家難免會get錯的」，並希望大家能夠冷靜，「和平相處，唔好嗌交」，「同時亦感謝所有明白同幫我解釋嘅朋友們」。

網民大讚樓主EQ高夠成熟

其後不少網民都留言，叫該名中學生玩得開心點，「食多啲拉麵，玩得開心啲！」、「enjoy日本！試多啲便利店嘅嘢食」、「好好體驗自己獨特日本旅程」，更讚賞他「唔會逐個留言去反駁，又唔會因為有人幫佢講說話而得理不饒人，迅速收拾心情去enjoy個trip，EQ真係幾高同幾成熟」，「po主15歲EQ高過成串啲成年人」、「厲害，面對咁多toxic comment仲可以咁大方，家教同品格方面係真真正正打敗99.9%嘅人」。

往下看更多文章

乘客巴士座椅遺留自製紙巾「頭墊布」網斥：乾淨自己污糟人哋！

飛機、旅遊巴等公共交通工具的座椅上，通常都設有頭墊布，冀為乘客提供更衛生的環境。日前就有網民搭巴士時，竟然在座位上發現上手乘客所留下的「自製頭墊布」。

座椅頭枕被鋪上紙巾以膠紙固定

網友日前在社交平台Threads發文，寫到「上車見到你會諗起乜？（膠紙唔會有人隨身帶住吧）」並附上兩張相片。相中所見，巴士上層的其中一個座椅的頭枕位置，被人鋪上了一紙巾，而從座位後面所見，原來張紙巾有一塊透明膠紙固定位置，似是有乘客自製了一個「頭墊布」。雖然以這樣的方法自製「頭墊布」方便快捷，但他離開時似乎忘記了要撕走，成為了車廂的一個垃圾。

網民估計是一些「潔癖症嘅行為」

網民紛紛留言「飛機？」、「剪頭髮」，有人就直接點出有乘客「當呢架係旅遊巴，要加返個頭墊」。自製頭墊布原本無錯，但這位乘客下車前，卻沒有妥善處理用完的紙巾，而是遺留在座椅上，有網民就估計是一些「潔癖症嘅行為」，得到一些人認同，「佢哋係full gear（全套裝備）出街」、「唔好睇小某啲人對偽衛生嘅追求」。