兩個國家打仗嘅訊息，我諗係世界上最機密嘅資料。但上個月「侵侵」政府嘅高級官員，竟然爆咗單「Signal瞞」泄露國家機密嘅事件!
真係估唔到，一個成日強調網絡安全嘅「超級大國」，成班內閣高層，竟然用一個民間網絡通訊軟件，去講一啲軍事行動訊息，唔通真係最危險嘅地方係最安全？以前明朝朱元璋起義嘅時候，都喺月餅度收埋啲紙仔嚟發放訊息; 而電影無間道影帝臥底，都用摩斯密碼嚟報料; 我哋細細個都識用檸檬汁嚟做自製隱形墨水，寫無字天言書講秘密嘢啦!今次「超級大國」嘅泄密風波，真係令我零零發大開眼界!
據媒體3月11日報道，美媒《大西洋月刊》嘅老總，無厘頭被一個自稱「國家安全顧問」嘅用戶，邀請加入Signal 軟件嘅「胡塞PC小組」通訊群組。老總怕執輸，咪入群組做「路人甲」囉! 原來真係國家安全顧問發起組一個群組，在入邊講美軍空襲也門胡塞武裝嘅嘢，在群組內除咗預先知道空襲嘅細節，仲知道唔同官員對計劃嘅一啲睇法，真係精彩過金庸小說。雖然老總睇得好過癮，但諗諗吓覺得唔係好妥當，於是靜雞雞退群，同埋係3月24，喺《大西洋月刊》揭露成件事出嚟。
事件爆光後，「侵侵」當然第一時間撇清關係，話自己唔喺群組裹面，唔知發生咩事，將個波踢番比喺群組嘅副總統同國防部官員。點知呢個被委派去解籤嘅國防部長，就死口唔認自己係群組討論過作戰計劃，話所有訊息內容都唔係機密，所以冇問題，試圖淡化成件事，以為咁就過到版……但老總覺得俾人屈，講到好似佢喺度作嘢咁，既然國防部長都話唔係機密，佢於是係3月26日就公開晒群組對話截圖，比全世界睇！
唔睇唔知，一睇嚇死你! 原來群組內容係包括美軍戰機升空作戰嘅時間表，攻擊目標，次序同埋武器部署嘅細節等等，國防部長係3月15日上午，仲係群組即時直播整個打擊胡塞武裝嘅行動添！詳細到戰機型號，起飛時間，發射邊款巡航導彈都有講…… 如果咁嘅資訊都唔係高度機密，乜嘢先係呢？
呢個空襲令到31人死亡，101人受傷，死者包括大量和刺殺對象同處一座大廈內的平民。但群組入邊嗰班國家內閣核心成員，就好似街市嘅「蟹伯」同「阿嬋」，只係不斷喺度吹噓「超級大國」如何巴閉，又或者喺度講是非，唱上一屆政府無能，有時又喺度講點樣搶走紅海水道嘅控制權，然後點樣利用佢嚟敲詐「保護費」……打仗有死傷其實係一件好sad嘅事，但係估唔到呢班高官講啲咁嚴肅嘅話題，都用埋晒啲emoji表情包整色整水，搞到單咁多死傷嘅襲擊，好似打遊戲機咁兒戲，完全反映出佢哋好輕佻，同埋一啲都唔尊重人命嘅態度，真係睇到眼火爆!
喺4月20日，美媒又爆料，指呢件國防部長，係2025年1月用咗自己嘅私人電話，開咗另一個Signal通訊群組，成員包括佢老婆、細佬同私人律師在內10幾人，發送有關空襲也門嘅敏感情報訊息。
喺呢度我零零發想講，無論一個國家或者一間公司，係處理敏感、機密資料嘅時侯，都會分隔處理，行內人叫 “Need to Know” ，即係需要知道有關資料嘅人才會知，冇需要知嘅人，係唔會接觸到呢啲資料，以減低洩漏風險。所以，國防部長嘅細佬同律師雖然而家都係喺國防部任職，但都唔應該喺私人群組分享呢啲訊息喎；更何況佢老婆曾經係美媒新聞製片人……咁，唔知同啲媒體成日有獨家猛料有冇關係呢？! 所以成件事真係、真係好荒謬囉!
雖然圖文並茂，但由「侵侵」到國防部長、新聞發言人，全部都擘大眼講大話，唔係話政治陰謀，就話係假新聞，總之互相推莊，堂堂「超級大國」係咪真係當啲國民同全世界嘅人係傻㗎! 而「侵侵」被連番追問之後，仲話《大西洋月刊》冇人睇，就快執笠! 總之，人無恥就係最無敵！
今次聽聞國防部監察長辦公室，會就呢單泄密事件展開調查，話要有人人頭落地、有高級官員要辭職咁話！不過大家睇完唔使咁認真，笑吓就算喇，因為「超級大國」不嬲都係自說自話、自圓其說，佢做就得，人哋做就唔得㗎啦。好似係2015，時任民主黨國務卿希拉里用私人電郵去處理公事，雖然都俾共和黨人話要拉要鎖，但最後咪又係不了了之! 大家睇下今次又會搞成點!
「超級大國」荒謬嘅事真係一件接一件，最後我零零發都想講埋，據4月2 1號美媒報導，受到特勤局 (保鏢) 全天候保護嘅國土安全部長，復活節係華盛頓市一間餐廳晚餐時，俾人成個手袋偷走咗! 如果手袋入邊有機密資料咁點算？
呢班管理緊「超級大國」嘅人，個個都好似係一班亂講嘢、非專業、冇紀律人士湊合而成嘅烏合之眾! 仲有，「超級大國」成日唔係話俾人竊聽、有黑客攻擊，就話電子產品有間諜程式；其實有啲咁低智嘅官員，唔使高科技hack佢，都可以知道晒啲「國家機密」啦！
係咪越講越恐怖呢! 我都戥佢哋啲國民悲哀，地球上竟然有啲咁落後嘅管治團隊! 但呢個「超級大國」唔單只管理自己國家，仲要成日扮「世界警察」也文也武! 大家點算好呢?
鍾情局．零零發
鍾情局
** 博客文章文責自負,不代表本公司立場 **
