31歲「香港先生」高鈞賢(Matthew)，去年9月與無綫結束9年賓主關係後，膽粗粗返内地搵「人仔」。離巢近一年，Matthew不單可以殺出一條血路，而且賺到第一桶金回港搞生意，經營日式牛扒居酒屋。
他歡欣地報喜：「諗唔到有咁大回報，仲賺埋喺內地演出嘅經驗！」終於捱出一點成績，難怪Matthew在舊愛葉翠翠婚宴上拖新女Chika踩場，風騷回歸。
居酒屋內有售神戶牛，牛魔王高生強烈推介。
受限制令影響，香港演員拍内地劇集愈來愈難，好在Matthew肯搏肯捱，在國內苦戰10個月，先後主演消防員招募公益廣告、又與關智斌飾演古裝劇《山海經之赤影傳說》，最近湖南衛視播出的《愛的婦產科2》更大受歡迎，創下同時段收視冠軍，10月又有新戲開拍真是長做長有。他坦言：「每拍一部新戲都會微調片酬，真係諗唔到有咁大回報，因為用國語對白，仲賺埋喺內地演出嘅經驗，好難得！」
因為《愛的婦產科2》受歡迎，故高鈞賢可調高片酬。
不過，單打獨鬥不像昔日在大台有一份穩定收入，所以想搞副業搏一搏：「投資餐廳係我由細到大嘅夢想，尤其是我係牛魔王，好鍾意食牛，喺長沙拍戲慶祝31歲生日都選擇喺一間食葱爆牛肉好出名嘅私房菜慶生，所以今次同小學同學夾份經營日式居酒屋以食牛扒做主打，為控制成本，我會落手落腳，仲會學埋點煮。」
為經營居酒屋，Matthew未來一年都會留港。
Matthew坦承會將北上賺到的六位數字的收入全數投資，希望半年內可以回本：「依家做生意唔容易，都有風險，兩年前投資過playgroup，雖然平手轉讓，但都體會到做生意力不到不為財。」
開業初期他會較多時間留港，因此Matthew都想重返電視台做綜藝節目，因為離巢時主持過世界盃。他笑說：「其實當日離開TVB前，余詠珊（無綫綜藝科總監）有游說我留低承諾會畀機會我，之後我揸車經過電視台諗住搵佢坐低傾吓，點知佢唔喺度，可能係天注定要我離開啦，我同Sandy係有偈傾嘅，今次試下搵佢叩門，最多我親自送牛扒畀佢，為搵啖食，餵埋佢都冇問題！」
日式居酒屋位於長沙灣，作為老闆的Matthew(右)凡事親力親為。
