入行十三年的姚子羚在台慶頒獎禮上奪得最佳女配角，指與多年來與一班「胡說八道會」姊妹互相支持，友誼好深厚，大家更會為各人的感情事着急，更推測下個嫁人的姊妹。
講到與胡杏兒、胡定欣（Nancy）、胡蓓蔚、黃智雯（Mandy）、李施嬅（Selena）組成的「胡說八道會」，Elaine指原本無特意成立，笑言有種友誼叫胡說八道：「因為胡杏兒同定欣熟啲，佢哋三胡（胡杏兒、胡定欣、胡蓓蔚），我同Nancy熟，慢慢同佢哋一齊玩，反而Selena最遲加入。我哋幾個女仔有時出嚟食飯，有一日講起就叫『胡說八道會』，純粹玩吓。冇諗過會令到慢慢多人去識，亦感染咗人。我覺得好開心，因為呢樣嘢帶畀大家正面嘢。」
圖：姚子羚 IG
Elaine指她們互相支持，特別是今年Mandy同Selena在台上見證她和定欣攞獎：「呢個友誼好深厚，互相取笑大家，又一齊做運動，有人生日會盡量幫大家慶祝好難得。好開心大家為大家感情事着急。」Elaine日前在杏兒婚禮派利是時笑言本月結婚，未知孰真孰假，但她就猜測誰是下一位人妻：「其實個個都有可能，Mandy機會大啲，定欣啱啱攞完視后，應該唔諗呢樣嘢，努力工作。（會唔會反而係你自己？）工作先啦，感情事唔會咁着急。」
Elaine直言男友鄭子邦是她的導師：「有時候佢會話畀我聽一啲性格上嘅缺失，或者佢會話俾我聽點去面對一啲嘢，用唔同睇法睇一啲嘢，慢慢佢都會感染我對事情嘅一啲態度，我覺得係一件正面嘅事。」她又指與男友很多事情都在心裡明白對方，所以沒有特別慶祝，反而會想怎樣做得更加好，怎樣用藝人身份去幫更多人。
場地：EPURE
化妝：Sammy Lam （Gardenia）
髮型：Taylor Wan（Hair Corner）
服裝：iBLUES
