校園Show為學生解疑難！鄧小巧教夾胳肋底舒緩緊張 泳兒「揸住宗旨」面對負評

《EEG電笠人人和音校園巡演》第二場有Gin Lee、泳兒、鄧小巧、許靖韻、黃明德、洪助昇及今年新人曾傲棐。

《EEG電笠人人和音校園巡演》第二場日前於海洋公園舉行，七位歌手Gin Lee李幸倪、泳兒（Vincy）、鄧小巧、許靖韻（Angela）、黃明德（Dark）、洪助昇（Aiden）及今年新人曾傲棐（Arvin）當晚除了唱歌、跟台下學生們大玩遊戲，又分享自己面對逆境時如何處理，藉以鼓勵一眾年輕人。而曾參與首場演出的張敬軒雖然這次未能出席，但亦拍片為學生打氣，十分窩心。

大會司儀劉若寶

洪助昇

黃明德

當晚首先出場的Vincy唱出新歌《撞到正》，當她唱到副歌一段時，台下觀眾配合地大叫歌詞中的「鬼」字，全場氣氛熾熱，隨後她又唱出近年暗黑系列的代表作《溝渠暢泳》，唱完後，大會司儀劉若寶（Polly）提到有同學問如何面對別人對自己的負評，Vincy認為最重要是「揸住宗旨」，「所有好同唔好嘅comment我都會睇，因為我想自己進步，同埋亦都係氣度嘅問題，要慢慢去磨練，咁你就會識得去過濾一啲唔應該要聽、或者邊一啲係可以令自己進步。」

泳兒

泳兒

有學生則想小巧解答如何克服唱歌比賽因緊張而失準的情況，小巧表示就算舞台經驗十足的歌手，在台上緊張也是十分合理，在台上面着對無數的目光，是很需要勇氣，不過這都可以透過身體的練習而得到幫助，「係一位老師教我，就係夾胳肋底，哈哈。夾實你嘅胳肋底，然後hold住呼吸， hold到再換氣為止，可能做十幾次，原意就係令你本身緊張嘅肌肉學識放鬆，所以我一陣準備唱歌，而家要夾吓先，哈哈。」全場頓時大笑。

鄧小巧

鄧小巧

有學生提到自己明年考大學，但仍未找到自己興趣選定科目，問Angela當初是如何選科。聽到問題後，Angela尷尬地謂自己當年完全沒有這個煩惱，「我喺會考同A-Level嘅時候已經諗定，如果讀大學嘅話，我會take finance呢一科，所以當時我都好快就揀咗。但我知道好多同學仔去到DSE都未知道或者未決定大學想讀乜嘢科，其實唔緊要，因為仲有青春，仲有時間，可以諗。」

許靖韻

許靖韻

而壓軸出場的Gin未出場觀眾已嗌到拆天，在演唱新歌《告別媒氣燈》及《企好》時，Gin更走到台下跟觀眾自拍及俾心，觀眾的熱情令最後歌曲結束後，Gin因為觀眾的包圍而寸步難行，未能返回台上，十分搞笑。有同學問到生於音樂世家的Gin會否因為父母對她的期望而感到壓力？而同學的父母則因為覺得同學有運動天份而想他玩運動，但自己的興趣並不在此。Gin坦言自己比較幸運，父母從來沒有給她壓力，只要求她一件事情，「就係我揀定一樣嘢就要全心去做。回應番嗰位同學仔，如果本身有天賦，我覺得係可以嘗試去發展一下；但如果冇乜嘅話，可能要同你屋企人溝通，或者可以propose：『我覺得自己嘅天賦喺另外一方面，會唔會我都可以嘗試吓行過一條路？』真誠嘅溝通交流係最好。」

李幸倪

李幸倪

事前洪助昇密密加操！

一連三晚的大坑舞火舞盛會早前於中秋節期間舉行，連日來吸引不少市民及遊客圍觀拍照，人頭湧湧，當中的主角「火龍」由三百幾個猛男「揮舞」，歌手洪助昇（Aiden）亦有參與盛事，更是其中一位舞龍者。

歌手洪助昇（Aiden）為大坑舞火龍活動擔任舞龍者。

原來這次是Aiden第二次參加舞火龍，第一次已經是2015年，「相隔咁長時間再玩，自己都好期待，同埋見到而家舞火龍被列入非物質文化遺產，自己好開心去參與呢個盛事。」事隔多年再參與，原來是朋友提議，「佢一直都有參與呢個活動，咁啱今年中秋佢問我有冇興趣玩番，因為我細個都有舞獅，自己都想pick up番一啲表演唱歌演戲以外嘅另一啲興趣，所以就一齊去報名，好順利去參加今年嘅舞火龍。」

今次是Aiden第二次參加舞火龍！

體力的考驗！

火龍全長六十七米，一眾舞龍者要揮動火龍遊走大坑，絕對是體力的考驗，所以事前Aiden都密密加操，「因為條龍係六十七米，都唔惹少，要夠耐力同體力，所以自己都準備一下舉啞鈴、跑步，呢啲帶氧運動當然唔少得。」除了體力同耐力，裝備同樣重要，「要戴帽或者攞毛巾包住個頭，因為啲香會辣到頭髮。手套最重要，因為我哋揸住舞火龍嘅木棍舞得耐嘅話，係會灼痛嘅。」

Aiden表示這次舞火龍十分開心，因為圍觀的市民都十分熱情，會互相為大家打氣，「仲有就係嗰一種Teamwork嘅精神我覺得係好珍貴。」雖然這次Aiden負責揮動龍身部份，不過他坦言希望有一日成為「龍頭大哥」，「因為龍頭同龍尾要一啲比較有經驗嘅師兄先可以handle到，但自己都立志希望未來可以有機會做龍頭大哥，可以去舞龍頭嘅部份。」

Aiden立志做龍頭大哥。