葉麗儀幫顧嘉煇錄廣告歌即場寫支票找數 預告8月個唱必唱《上海灘》

葉麗儀：「最開心係一唱完，煇哥就會寫支票，唔會拖數。」

葉麗儀（Frances）日前到新城廣播接受譚玉瑛（阿譚）、何基佑及黃筠兒主持的《QK玉瑛室》訪問，阿譚大讚Frances身形保持甚fit，問她如何保養？Frances透露自己十分自律，絕不暴飲暴食，「尤其我96年得到乳癌，食嘢會好小心，好驚食咗有防腐劑食物，唔食宵夜，亦都會做運動。」

葉麗儀（Frances）日前到新城廣播宣傳。

葉麗儀接受譚玉瑛（阿譚）、何基佑及黃筠兒主持的《QK玉瑛室》訪問。

Frances在節目中又提到69年參加無綫《聲寶之夜》歌唱比賽奪冠而晉身樂壇，當中發生了小插曲，「我本來係同前夫一齊參加，佢話獎品有電視機，點知佢臨尾冇去到，而當時評判有許冠傑同顧嘉煇，我好緊張，唱完之後煇哥話幾好，最後攞咗部細電視機返屋企。」個多星期之後，顧嘉煇邀請Frances唱廣告歌，她在一個午餐時間便唱了4、5首，「最開心係一唱完，煇哥就會寫支票，唔會拖數。」

後來Frances再結識當時的「廣告界紅人」黃霑，帶挈她唱了多首廣告歌，「有啲獨唱，有啲合唱，我慣咗大聲唱，但原來合唱要自己收把聲，霑叔係咁叫我企後啲唱，當中有好多學習。」

葉麗儀獲顧嘉煇及顧嘉煇錄帶挈，唱了多首經典廣告歌。

譚玉瑛大讚葉麗儀身形保持甚fit！

Frances將於8月3日及4日在灣仔伊館舉行兩場《葉麗儀感恩55周年香港演唱會2024》，之前已經在新加坡、馬來西亞、吉隆坡巡迴演出，稍後會到曼谷舉行，「有朋友叫我去北美洲，但我有少少唔願意，因為太遠，唔想太攰。」Frances透露這次演唱會找來倫永亮擔任音樂總監，有些歌會重新編曲，而《上海灘》等經典歌亦會必唱，就連平時在賭場不會唱的《紅顏》也會唱，「因為『無力挽 無力再挽』、『常自嘆 常自概嘆 』喺賭場唱就有啲敏感。」

與馬浚偉聚舊。

詳細節目內容，請重溫7月18日，下午3-4時，新城知訊台《QK玉瑛室》節目，網址：https://www.metroradio.com.hk/MetroInfo/

伊健：「已經唔記得蝕幾多，好彩仲有得做，慢慢填晒啲氹。」

藝人鄭伊健現身新城廣播接受好友譚玉瑛（阿譚）、何基佑及麥皓兒主持的《QK玉瑛室》錄音訪問，伊健和阿譚因合作兒童節目《430穿梭機》而成為好友，兩人久別重逢不但沒有芥蒂，反而互窒兼互相爆料，為直播室帶來不少歡笑聲。

鄭伊健接受好友譚玉瑛（阿譚）主持的《QK玉瑛室》錄音訪問。

伊健近日忙於為電影《久別重逢》宣傳，提到戲中飾演「少年鄭伊健」的陳卓賢（Ian），他笑指Ian極像初出道的他：「答問題都係答一兩句，不過，我依家已經講多咗嘢。」

伊健近年閒時與太太蒙嘉慧（Yoyo）旅居日本，生活優哉游哉。早年伊健打本給Yoyo在日本開設房地產公司，事隔數年，Yoyo近日決定「回流」返港，伊健稱：「嗰邊學習完就算，依家游手好閒。（陪你打機？）睇吓咩機啦，佢有少少沉迷，我係試玩，但佢一定要打爆機，鍾意玩就會係咁玩，直至有一日唔想玩。（你影響太太？）唔關事，佢本身性格好男仔頭。」

鄭伊健與譚玉瑛互窒玩爆料！

何基佑形容伊健有太太陪打機，又可以做自己喜歡的事，絕對是人生勝利組，甚至死而無撼，伊健聞言搞笑謂：「你返屋企會唔會有事？」及後，阿譚對住伊健表示：「你唔好睇小我，我一次機都未打過。」伊健笑指：「但你係飲紅酒師祖級人馬。」隨即表示要爆阿譚料：「佢做緊兒童節目時已經飲紅酒，但嗰時社會好封建，話飲紅酒就唔可以做兒動節目，所以我保守個秘密直至依家先講。」

鄭伊健自爆買樓投資慘變負資產。

阿譚就大爆伊健拍兒童節目時記稿最差，但伊健給他的感覺十分乖巧又正氣，「佢啱啱出嚟做嘢，有日同佢傾計講抱負，佢話第日要買間屋比父母住，我當時都冇諗過，唔通我真係咁不孝？」不過伊健自爆當初聽前輩意見，賺到錢要買樓投資，怎料慘變負資產，「我好聽話真係買咗樓，點知一買樓市就冧，可能買多咗，變咗負資產，已經唔記得蝕幾多，總之我就明白一句說話，就係『無事一身輕』，點會諗到好畀心機工作，但無啦啦多撻瘌，好彩仲有得做，慢慢填晒啲氹。」

伊健和Yoyo結婚超過十年，阿譚問他由兒子變成丈夫的心態有沒有轉變？伊健說：「冇。（你係一家之主？）都係兩個人啫！（喺屋企有話事權？）冇權話事㗎！但我哋兩個想法好接近，夠用就得，已經好開心。」之後阿譚問伊健為何不生育？他指看新聞覺得世界太亂，所以怕了，隨即反問阿譚：「咁你都一樣㗎！」阿譚沒好氣說：「呢條問題由我嚟問真係激氣。」其餘兩位即拍手掌大笑。

左起：何基佑、譚玉瑛、鄭伊健、麥皓兒