「記協」咁多年嚟嘅定位都含糊不清，究竟佢係一個職工會、係一個捍衛新聞自由嘅組織、定係一個政治組織呢？
如果佢係一個職工會嘅話，全港有超過1萬人係新聞從業員，但記協先得嗰300個會員，好似無乜代表性。2019暴亂嗰時，記協俾人踢爆，原來自認係自由記者，俾廿蚊雞就可以入會買張記協會員証，呢個組織亦唔抗拒12 歲都可以做記者，咁搞法就連認受性都無埋。
如果當佢係一個捍衛新聞自由嘅組織，又唔係好似喎!講得新聞自由就要從社會整體利益嘅層面出發，新聞自由唔代表可以亂嗡，報導都要有事實根據，當年生果報報導失實、坊間又咁多假新聞，記協做過乜？2019年8月13日，《環球時報》記者付國豪在香港國際機場被示威者綁住手腳毆打，記協又做過乜嘢捍衛付國豪新聞自由的事？
我覺得當佢係政治組織就最似喇，不過佢只係一個「3低」組織 低影響力、低政治能量、低政治手腕的組織 ! 凈係識土炮式煽風點火屈政府，喺2019年反修例嗰陣，個前主席麥X庭仲跟住啲香港反華政客去美角，乞求美角制裁香港，在美國和中國打緊貿易戰之時，咁樣叫其他國家搞中國，成班人都係無恥嘅賣國賊！暴亂嗰陣，很多暴徒自稱自由記者用廿蚊買個「記協證」做護身符，一有推撞就屈警察打記者，「記協」就會即時配合，用打壓「新聞自由」嚟唱衰香港。記協啲「事跡」真係多籮籮，事件簿厚過電話簿，要講落去真係講足一日都未講完！
最近「記協」搞嘅執委會選舉，又一次睇到佢有幾「低呢」喇！今次本來有兩個人出嚟參選主席，一個係深黃派系嘅《華X街日報》記者鄭亞女，另一個係較溫和嘅「透X報」主編。「記協」班老鬼唔想「非我族類」選到，於是就度咗條屎橋，搞掂「透X報」主編的一個提名人撤銷提名，「監粗」DQ人哋，等鄭亞女順利坐到個主席位。
「記協」又點會淨係安插主席一個咁少呢，佢哋梗係成個執委要係「自己友」先得啦！呢啲「自己友」其實係咩人呢 大部分都係外媒記者、仲有前生果報記者、唔入流既自由記者、同埋有啲根本唔係記者。難怪連鄧局長都話以為係選緊「外國記者協會」!行內一直瘋傳話喺選舉前有啲「自己友」見勢色唔對想退選，但記協唔想留出空位俾啲「非我族類」入圍，於是即刻搬龍門話無退選同無補選機制，等「自己友」去掗曬啲位。終於11個人當選之後有4個即刻辭職，而家剩番7個人做執委，有位唔俾人選，係咪覺得好荒謬呢！嗱，呢啲先至係操弄選舉呀！
原來《華X街日報》喺「記協」選舉之前，已經警告自己的僱員鄭亞女唔可以參選「記協」主席，但係佢一意孤行，結果咪咁嘅下場囉！於是鄭亞女就一哭二鬧周圍唱《華X街日報》漠視工人權益、打壓新聞自由。最搞笑係佢不嬲好崇洋，而家被外媒炒魷，就即刻搬部《基本法》出嚟幫自己維權！大家冇聽錯，就係反對派成日批評嘅《基本法》！乜佢唔係應該搬部美角憲法第一修正案出來，捍衛自己權益咩，你又幾時信過香港《基本法》？
究竟《華X街日報》點解要炒咗鄭亞女呢？照計呢啲國際傳媒機構應該都鍾意玩「新聞自由、言論自由」呢類議題，應該同「記協」好啱咀形㗎喎。不過高人就話，因為《華X街日報》覺得「記協」實在太「低呢」，做嘢又冇focus又冇策略，根本幫唔到手，費事俾佢壞咗自己大事，而且鄭亞女又係奀星一名，無知名度、無人識、無利用價值、亦唔受操控，叫你Sit你又唔聽話去Sit，所以要拿拿臨同佢割蓆，無得留底。
反對派被人利用完之後，一般都會被送去堆田區棄置，大家好自為知喇！
鍾情局．零零發
鍾情局
** 博客文章文責自負,不代表本公司立場 **
近排有人係到講所謂「大和解」，建議政府放生嗰啲因為2019黑暴拉咗而未被起訴嘅年輕人，為成件事劃上一個句號喎，目的係要話比全世界知，香港已經全面復常，係一個包容同多元化嘅社會，好適合營商同投資環境咁話！
呢啲人無厘頭地將刑事案件同經濟發展綑綁埋一齊， 乜放咗做錯事嘅人原來係可以令經濟好，我零零發都係第一次聽，唔通真係「換個角度，總有出路」？
仲有，要「和解」都要有仇有怨，咁而家邊個同邊個「結怨」呀？邊個同邊個「和解」呀？而家好似搞到政府同警察同班罪犯「結怨」，講到政府有責任去「和解」咁喎。喂喂喂，唔好係度輕描淡寫咁講呢啲係「怨」呀！而家係講緊有人犯罪、犯法，係要用司法程序去處理㗎 !我覺得所謂「大和解」，係喺度混淆視聽，係一個偷換概念嘅偽命題！
咁如果要「和解」，都要睇吓呢啲「和解」對象做咗咩事先得㗎，偷粒糖同偷嚿金都有分別喇！根據監警會嘅獨立調查報告，2019年中至2020年頭，香港大大話話有超個300次遊行示威，嗰段期間犯法行為簡直「包羅萬有、無法無天」，包括堵塞道路、掟汽油彈，週街放火，破壞銀行、商店同港鐵站，圍毆唔同政見嘅人，闖入大學實驗室偷危險品、化學品，偷車，試圖搶警槍，包圍警察總部、法院、立法會大樓同機場等等；係香港自1967年以來，最大規模嘅違法同暴力事件！報告又話粗略估計，有超過30間中資銀行、與內地相關或者係支持政府嘅店舖被多次破壞，超過60處政府、警署、警察宿舍同大學受到不同程度嘅損壞，有740組交通燈被打爛，55公里鐵欄被拆走（差唔多係由金鐘政府總部去屯門來回咁長）， 22000平方米 ( 成3個標準足球場咁大）嘅行人路地磚被掘起，破壞咗147個港鐵/輕鐵站，超過1000班航機被取消……仲有接近2000名警員及家屬被網上起底，有警員被咬斷手指、中箭、被淋腐蝕性液體以致全身被燒傷等等。係2019年11月，警方係「你大」搜到3989枚汽油彈（一個人每10秒掟一個汽油彈，都要差唔多掟足11個鐘先可以掟曬），1339件爆炸品、601樽腐蝕性液體同埋573件武器，包括弓箭同氣槍。而係「步大」就搜到8000多枚汽油彈……不過呢啲都只係冰山一角咋！
2019 年11 月新界東交通大癱瘓咗差唔多成個星期，「步大」內地生要警察護送去馬料水碼頭坐水警輪離開，「你大」游泳池用嚟練習掟汽油彈嘅情景仲瀝瀝在目！唔單止咁，暴徒又講好多大話去煽動群眾，一時就話警察係地鐵站內打死6個示威者 (8-31太子站殺人事件，作嘢叻到作埋具體數字)，又話警察對被扣留係新屋嶺嘅女示威者性侵 (吳傲雪事件)，又話警察用布袋彈打盲手無寸鐵示威者隻眼 (爆眼女事件) 等等……通通事後都被証實係大話連篇，目的只係想去分化社會，挑撥暴徒情緒，保持暴亂嘅勢頭！
當時嘅香港，真係好似戰場咁，不但有無辜嘅市民被人用磚掟死、被火嚴重燒傷，而且到處都被破壞。大家係媒體都睇到，暴徒好大部份都係年輕人。如果大家有留意最近宣判嘅所謂「屠龍案」，個班被告人都係廿歲出頭，有一個犯案時都只係得18 歲，佢哋計劃用炸彈「無差別」咁襲擊警察同遊行嘅市民，好彩警察及時拉曬所有人，阻止咗呢件暴力血腥事件，如果唔係，就……一鑊熟！究竟個社會有咩對佢哋唔住，點解對啲平常百姓咁深仇大恨，失去理智咁去做一啲咁殘忍嘅事，去滿足呢啲人的政治訴求呢？
提出「大和解」嘅人，當然就會話啲年輕人當時都係因為社會大環境同朋輩嘅影響，先至會做出咁暴力嘅行為啦，應該比次機會佢哋咁話。 喂， 一個人無論幾大年紀，都要為自己所做嘅事，負上唔同程度嘅責任，冇可能一句「大和解」，就當冇事發生過! 咁樣做，只會俾一個好錯誤嘅信息嗰啲正常嘅年輕人，做錯事將來又會「大和解」可以洗底架啦。對暴徒嚟講，就只係會種大咗佢哋個膽，推佢哋去死！
當時係社會有影響力嘅人、媒體、老師、社工，你哋有提醒過班年輕人唔好去犯法嗎？有啲教育、社福界嘅人仲帶班同學仔一齊去掟汽油彈⋯⋯個個著住件背心就話係記者、係急救員，刻意阻住警方行動。有啲人更加英雄化咗佢哋嘅暴行，令佢地更加亢奮同失去理智！難聽啲講，班後生仔嘅失常行為，雖然係俾「犯民」嘅所謂「違法達義」歪理害死，但係「犯民」成年人又唔say no，你哋好大責任呀！終於害到一個又一個大好青年去犯法，去放火、去掟汽油彈、去打人，但係你有冇見過呢班「犯民」嘅仔女有份出嚟搞事？人哋嘅仔女就係草，自己嗰啲就如珠如寶！
再者，法律面前人人平等㗎嘛！夠証據，律政署就會起訴被捕嘅人，不過當時黑暴立立亂，而案件又多，搜証又需時，有啲證人又著草走咗路，所以有人就早啲被告上法庭，有人就會繼續擔保住先囉！所謂「大和解」，咪即係放生啲違法暴徒? 咁咪對啲已經認咗罪，或者係已經被判刑嘅「手足」好唔公平? 而且咁樣做，亦都損害咗香港法治嘅獨立性同公平性！仲有，唔該諗嘢唔好淨係諗一邊，提出同讚成呢個「大和解」嘅人，有冇考慮過受害者同家屬? 所謂「大和解」係咪對佢哋好唔公平、對佢哋係咪二次傷害?！
我零零發覺得提出「一刀切大和解」嘅人，當日直接間接支持黑暴，如今其實係華麗轉身想去漂白黑暴，鋪定路去配合美西方話要寬大處理「生果佬」單案囉！
鍾情局．零零發
