近排有人係到講所謂「大和解」，建議政府放生嗰啲因為2019黑暴拉咗而未被起訴嘅年輕人，為成件事劃上一個句號喎，目的係要話比全世界知，香港已經全面復常，係一個包容同多元化嘅社會，好適合營商同投資環境咁話！
呢啲人無厘頭地將刑事案件同經濟發展綑綁埋一齊， 乜放咗做錯事嘅人原來係可以令經濟好，我零零發都係第一次聽，唔通真係「換個角度，總有出路」？
仲有，要「和解」都要有仇有怨，咁而家邊個同邊個「結怨」呀？邊個同邊個「和解」呀？而家好似搞到政府同警察同班罪犯「結怨」，講到政府有責任去「和解」咁喎。喂喂喂，唔好係度輕描淡寫咁講呢啲係「怨」呀！而家係講緊有人犯罪、犯法，係要用司法程序去處理㗎 !我覺得所謂「大和解」，係喺度混淆視聽，係一個偷換概念嘅偽命題！
咁如果要「和解」，都要睇吓呢啲「和解」對象做咗咩事先得㗎，偷粒糖同偷嚿金都有分別喇！根據監警會嘅獨立調查報告，2019年中至2020年頭，香港大大話話有超個300次遊行示威，嗰段期間犯法行為簡直「包羅萬有、無法無天」，包括堵塞道路、掟汽油彈，週街放火，破壞銀行、商店同港鐵站，圍毆唔同政見嘅人，闖入大學實驗室偷危險品、化學品，偷車，試圖搶警槍，包圍警察總部、法院、立法會大樓同機場等等；係香港自1967年以來，最大規模嘅違法同暴力事件！報告又話粗略估計，有超過30間中資銀行、與內地相關或者係支持政府嘅店舖被多次破壞，超過60處政府、警署、警察宿舍同大學受到不同程度嘅損壞，有740組交通燈被打爛，55公里鐵欄被拆走（差唔多係由金鐘政府總部去屯門來回咁長）， 22000平方米 ( 成3個標準足球場咁大）嘅行人路地磚被掘起，破壞咗147個港鐵/輕鐵站，超過1000班航機被取消……仲有接近2000名警員及家屬被網上起底，有警員被咬斷手指、中箭、被淋腐蝕性液體以致全身被燒傷等等。係2019年11月，警方係「你大」搜到3989枚汽油彈（一個人每10秒掟一個汽油彈，都要差唔多掟足11個鐘先可以掟曬），1339件爆炸品、601樽腐蝕性液體同埋573件武器，包括弓箭同氣槍。而係「步大」就搜到8000多枚汽油彈……不過呢啲都只係冰山一角咋！
2019 年11 月新界東交通大癱瘓咗差唔多成個星期，「步大」內地生要警察護送去馬料水碼頭坐水警輪離開，「你大」游泳池用嚟練習掟汽油彈嘅情景仲瀝瀝在目！唔單止咁，暴徒又講好多大話去煽動群眾，一時就話警察係地鐵站內打死6個示威者 (8-31太子站殺人事件，作嘢叻到作埋具體數字)，又話警察對被扣留係新屋嶺嘅女示威者性侵 (吳傲雪事件)，又話警察用布袋彈打盲手無寸鐵示威者隻眼 (爆眼女事件) 等等……通通事後都被証實係大話連篇，目的只係想去分化社會，挑撥暴徒情緒，保持暴亂嘅勢頭！
當時嘅香港，真係好似戰場咁，不但有無辜嘅市民被人用磚掟死、被火嚴重燒傷，而且到處都被破壞。大家係媒體都睇到，暴徒好大部份都係年輕人。如果大家有留意最近宣判嘅所謂「屠龍案」，個班被告人都係廿歲出頭，有一個犯案時都只係得18 歲，佢哋計劃用炸彈「無差別」咁襲擊警察同遊行嘅市民，好彩警察及時拉曬所有人，阻止咗呢件暴力血腥事件，如果唔係，就……一鑊熟！究竟個社會有咩對佢哋唔住，點解對啲平常百姓咁深仇大恨，失去理智咁去做一啲咁殘忍嘅事，去滿足呢啲人的政治訴求呢？
提出「大和解」嘅人，當然就會話啲年輕人當時都係因為社會大環境同朋輩嘅影響，先至會做出咁暴力嘅行為啦，應該比次機會佢哋咁話。 喂， 一個人無論幾大年紀，都要為自己所做嘅事，負上唔同程度嘅責任，冇可能一句「大和解」，就當冇事發生過! 咁樣做，只會俾一個好錯誤嘅信息嗰啲正常嘅年輕人，做錯事將來又會「大和解」可以洗底架啦。對暴徒嚟講，就只係會種大咗佢哋個膽，推佢哋去死！
當時係社會有影響力嘅人、媒體、老師、社工，你哋有提醒過班年輕人唔好去犯法嗎？有啲教育、社福界嘅人仲帶班同學仔一齊去掟汽油彈⋯⋯個個著住件背心就話係記者、係急救員，刻意阻住警方行動。有啲人更加英雄化咗佢哋嘅暴行，令佢地更加亢奮同失去理智！難聽啲講，班後生仔嘅失常行為，雖然係俾「犯民」嘅所謂「違法達義」歪理害死，但係「犯民」成年人又唔say no，你哋好大責任呀！終於害到一個又一個大好青年去犯法，去放火、去掟汽油彈、去打人，但係你有冇見過呢班「犯民」嘅仔女有份出嚟搞事？人哋嘅仔女就係草，自己嗰啲就如珠如寶！
再者，法律面前人人平等㗎嘛！夠証據，律政署就會起訴被捕嘅人，不過當時黑暴立立亂，而案件又多，搜証又需時，有啲證人又著草走咗路，所以有人就早啲被告上法庭，有人就會繼續擔保住先囉！所謂「大和解」，咪即係放生啲違法暴徒? 咁咪對啲已經認咗罪，或者係已經被判刑嘅「手足」好唔公平? 而且咁樣做，亦都損害咗香港法治嘅獨立性同公平性！仲有，唔該諗嘢唔好淨係諗一邊，提出同讚成呢個「大和解」嘅人，有冇考慮過受害者同家屬? 所謂「大和解」係咪對佢哋好唔公平、對佢哋係咪二次傷害?！
我零零發覺得提出「一刀切大和解」嘅人，當日直接間接支持黑暴，如今其實係華麗轉身想去漂白黑暴，鋪定路去配合美西方話要寬大處理「生果佬」單案囉！
鍾情局．零零發
鍾情局
** 博客文章文責自負,不代表本公司立場 **
最近睇啲衙門新聞真係越睇越驚心、越睇越擔心，好似「屠龍小隊」案、「35+顛覆」案，同埋而家審緊嘅「生果佬」案、「醫院口岸爆炸」案等等，串埋一齊去睇，我零零發覺得，樣樣嘢都唔係無端端發生，全部都係有跡可尋，好似一直有啲幕後玩家利用咗班「犯民」，儲心積累想搞冧香港。由街頭抗爭到議會鬧劇，全方位360度去大幅度搞搞震。所以我零零發想趁住就嚟踏入2025年，疏理一下過去喺香港發生嘅事。
雖然香港係「示威之都」，但係回歸之初大多數嘅遊行示威，都係相對冇咁激進，每年嘅維園六四公眾集會，或者七一大遊行，參與人數雖然多，但係除咗一啲想出位嘅議員或者激進人士，會同警察衝突之外，其他人都係齋行齋坐，都算得係有秩序。但係最近十幾年，「犯民」利用唔同議題，激化咗社會矛盾同埋對政府嘅不滿，抗爭就越演越激烈，不斷去測試政府底線！好似2009年「反對興建高鐵」事件，示威者就開始嘗試包圍政府總部同禮賓府，同警方對峙；到2014年6月「反新界東北撥款」示威，啲示威者喺立法會議員同「犯民」加持之下，就開始變得暴力，不但強行闖入立法會大樓靜坐，更令到多個保安員受傷，最後要出動好多年無見過嘅防暴警察，暴力示威先至平息到。
到2014年下半年，「佔中三丑」嘅戴妖以「公民抗命、違法達義」呢個歪理，去鼓動年輕人同學生出來犯法，借「全民普選特首」呢個偽命題，去發動大規模示威。慶幸呢個歷時79日嘅非法佔中，冇做成太大規模嘅破壞，但係就種大咗好多人個膽，捧紅咗一班所謂「學生領袖」，好似黃痴瘋、岑傲廢，週永骯、衣冠聰之流。 好可惜當時政府同社會都掉以輕心，以為雨過天青就當無事，而各「犯民」黨派更利用一般人對「未來主人翁」比較仁慈同體諒嘅心態，趁機拉埋學生同青年人落水!
到2016年農曆年，「犯民」又借食環署係旺角趕走無牌小販為藉口，有意在網上號召市民衝擊執法人員，更將反抗行動升級，圍堵馬路，到處放火燒雜物，包圍同襲擊到場維持秩序嘅警察，最後警察向天開咗兩槍示警，事件中有大學生被捕同唔少人受傷。但係呢兩槍無令到香港人醒覺，反而俾啲大學學生會同「犯民」組織偷換概念，變成政府冇聽民意，不當咁處理社會矛盾，所以引起暴亂喎!
自此之後，各「犯民」黨派更加好似打咗枝強心針咁，到處用歪理去支持班年青暴徒嘅非法行為，好似係2017年，立法會議員羊鱷Q竟然講出「有案底可以令人生更精彩……」嘅痴人夢話，推班青年人跳落懸崖去死！當時大大小小反政府嘅遊行示威，好似「真普選大遊行」、「反高鐵一地兩檢大遊行」同「反對東大嶼人工島大遊行」等等，都明顯咁見到好多年輕人嘅足跡同暴力行為！
到2019年，香港人陳同佳在台灣殺咗女朋友，由於香港同台灣並無司法互助同移交逃犯協議，特區政府為咗維護法治同公義，打算將喺台灣着草返香港嘅通緝犯陳同佳，交比台灣審訊，於是就提出修訂「逃犯條例」，但就被各「犯民」黨派抹黑，話想借修訂為名，以後可以任意將罪犯移交內地，冇曬人權同自由，為所欲為咁話。隨後就發生咗大半年嘅黑暴事件，好明顯就係「犯民」夾埋外力喺度搞革命，想推翻政府，實現佢地上台執政嘅春秋大夢。
「犯民」除咗利用社會議題搞一啲街頭抗爭之外，亦都詐詐諦諦喺度利用選舉、議會嘅運作去搗亂！首先就喺2010年以爭取「真普選」呢個噱頭，玩一個「五區公投」。當時佢哋係五個立法會選區，每度搵一個「犯民」嘅議員辭職，然後就搞補選，咁樣全香港嘅所有已登記嘅選民都可以去投票，咁等如變相嘅公投喎！佢哋諗住五區補選嘅投票率超過50%同埋「犯民」勝出，就代表有民意基礎去支持「真普選」，如果特首唔可以喺一年之內交出個普選嘅路線圖，所有「犯民」嘅議員就會集體請辭，唔再參加補選，同時要求當時行政長官下台謝罪⋯⋯睇吓，又係最後想逼行政長官下台，搞亂成個社會秩序！嗰次所謂公投嘅投票率得17%，所以隻隻「犯民」變鵪鶉無聲出。而當時五區公投係用「全民起義」作為政治宣傳口號，當時好多評論已經講，呢個其實係一種「港獨」搞革命思想嘅前身！
到2019社會暴亂失敗之後，「犯民」又再一次就從議會入手惡搞，由戴妖牽頭攪咗個「35+」顛覆大計，希望用操控選舉嘅方法，攞到立法會大多數35個或以上議席，咁就可以用無差別嘅否決權去多次推翻財政預算案，逼特首辭職、令政府停頓、社會陷入混亂嘅狀態，到時「犯民」同暴徒就可以配合外力去推翻政府，好慶幸呢單嘢又失敗告終！
香港回歸之前，美西方已經係香港唔同嘅政治團體、工會、NGO、大學、傳媒、宗教組織埋曬地雷，為亂港作出部署，打算攬炒香港一鑊熟！立體啲睇返我頭先所講嘅嘢，每一次都係「犯民」同美西方合演的一場大龍鳳！由街頭到議會、政府運作都俾佢哋有組織咁喪搞! 首先就係利用社會議題進行分化，搞啲街頭抗爭，同啲警察推推撞撞試水溫；之後就先包圍，繼而衝入啲議會、辦公室；跟住再將暴力升級，放火、掟汽油彈、做炸彈、襲擊警察等等。另一方面，佢哋一次又一次濫用制度，破壞議會嘅運作，打算逼特首下台，令到政府癱瘓。每一次我哋都好天真咁以為將件事擺平咗，其實一啲都唔係，其實人哋係喺度做緊綵排，一次一次咁樣加碼「升呢」。2019黑暴之後，社會好似平靜安穩咗，但係美西方係唔會死心嘅，佢哋霸權嘅DNA係唔會比中國爬過頭，而香港正正係中國對外開放嘅國際城市，一個最好嘅切入點，冇人知幾時會有下一波黑暴出現，所以老土啲都要講句： 「居安思危」係必須的！如果唔係有起事上嚟，報「東張」都太遲啦！
鍾情局．零零發
