他果然無悔無慮，活出了精彩人生！

前幾日「35+顛覆案」判咗刑，各人都得到應有嘅懲罰。呢單案入面有兩個入罪嘅被告「戴妖」同「羊鱷Q」有法律背景，深知自己犯咗法，所以一上庭就即刻認罪搏減刑，終於一個判10年，一個判5年1個月。

呢個顛覆計劃，由「戴妖」呢個所謂「法律學者」去推動，又有大狀「阿羊」同埋有法律界背景嘅「工民黨」撐腰，所以個個以為無犯法，柴娃娃咁一齊去湊熱鬧，點知踩斷鋼線，跌到粉身碎骨⋯⋯我零零發之前都講過「戴妖」，今日不如講吓呢個「阿羊」點樣打拼佢嘅「精彩人生」吖！

「阿羊」，小康之家嘅獨子，父母有啲米，做酒樓同珠寶生意，十歲左右就移民去楓葉國，係大學政治系畢業之後，去咗北京大學讀法學碩士。佢2007年返香港係「講大」讀埋個PCLL(法律專業文憑)，就加入律政署做見習律政人員，2009年成為大律師。我零零發初時以為呢隻「阿羊」都幾醒，識得部署去北大讀書，又入政府，咁樣不但豐富咗自己嘅資歷，而且又可以建立人脈，本來對佢係法律界發展好有幫助，可惜佢將自己佢嘅本錢押錯注….

2003年，香港經歷咗沙士同基本法23條立法事件，爆發咗七一大遊行，當時得廿歲嘅「阿羊」，係香港從來冇政治足跡，但竟然係暑假返香港嘅時候，無嗱嗱被邀請加入「七一人民批」組織做發言人，推動香港民主發展咁話喎！相信由嗰時開始，呢個「阿羊」就傻吓傻吓咁踏上佢所謂嘅「精彩人生」路了！

2004年暑假，「阿羊」知道大狀「袋巾涼」要參選立法會，就係北京讀讀吓書返嚟香港，自薦做「袋巾」嘅助選團實習生，嗰年「袋巾」贏咗選舉做咗立法會議員，而「阿羊」就認定「袋巾」係佢政治路途上嘅貴人，下下以佢為「榜樣」。「袋巾」見「阿羊」話曬都係大狀，個人野心大又想出位，所以都好鐘意帶住佢週圍去，咁要做起嘢上嚟，都有人俾佢使吖嘛。無他嘅，「袋巾」始終都係非一般嘅「資深」大狀，識得避重就輕去自保，所以有個人幫佢做打手兼應聲蟲，何樂而不為？！

2009「阿羊」就疊埋心水棄「法」從「政」，咁2011年「袋巾」就踢埋佢入「工民黨」，嗰年「阿羊」仲即刻去參加區議會同立法會選舉，不過以佢當時嘅號召力，梗係選唔到喇，但係佢嘅年紀、鐘意認叻同逞強嘅性格，就被班老「犯民」睇中，成功捧咗佢上枱去吸納年輕中產，樣樣事同政府打對台，一時話要全民普選，一時又話要打倒建制派……2014年佔中期間，佢又做埋義務律師代表團發言人，週圍去警署俾法律意見班被捕人士，以增加自己嘅政治本錢。

係2016 年，「阿羊」終於係佢35 歲之年，透過新界東補選成為立法會議員，成個人好high, 所謂少年得志，就即刻語無論次，係第二年佢就聯署鼓吹香港前途自決，亦不停參與「反高鐵一地兩檢」、「反新界東北發展計劃」等等示威行動……佢係2017年出席聲援反新界東北發展案被告嘅時候，竟然對啲犯事嘅年輕被告人講，呢個案底「令佢哋人生變得更加精彩！」你話咁戇居兼涼薄嘅說話，要頭腦幾過熱先至講得出口？

2019年黑暴期間，「阿羊」高調反對政府修訂《逃犯條例》、支持罷課活動、批評警方行動等等，更加去到美角乞求國會議員停止向香港警方輸出防暴裝備，公然勾結外部勢力去搞亂香港。佢係議會上又同埋「工民黨」其他黨員，好似「大狀郭」咁，用唔同嘅方法去癱瘓政府嘅議案，令施政停滯不前。不過「大狀郭」就醒目，知道呢條綱線踩落去會跌死，所以行兩步就靜雞雞向後轉著草離開香港，但呢個「阿羊」就唔得醒喇，越踩越深、越衝越前，係2020年更加被「袋巾」點名代表「工民黨」去參加「戴妖」既35+顛覆案。呢個「阿羊」以為有貴人「袋巾」加持，為佢獻計之餘，仲經常陪出陪入咁開記招，咁「阿羊」咪成個心雄晒，諗住自己為黨賣命、又孖住「戴妖」，就可以彈起上位。終於黃天真係不負有心嘅黃人，「阿羊」真係願望成真，連官老爺都點名話佢係識法律嘅「積極參與者」，可以係監倉過佢嘅「精彩人生」！ 

「阿羊」雖然一上庭就嗱嗱臨認罪，求情時又好似好後悔，咁究竟佢係識計數，定係真心悔改，我就唔知喇。但大家都知，黃人冇事嘅時候就係度也文也武，一有事咪做牆頭草，邊度有著數咪做乜囉……一個大好青年，又受過高深教育嘅專業人士，而家因為犯咗國安法要坐監，唔通真係「坐監會令人生更精彩」?  佢出冊之後，連大律師嘅資格都會被除名⋯⋯唉，以前係黨魁，而家就做炮灰喇，佢信錯個貴人，已經返唔到轉頭，同人做咗替死鬼，而家一舖清袋，日日望住四幅牆後悔都冇用喇！ 小道消息話，佢啱啱入冊嘅時候，啲囚友問佢覺唔覺得自己而家個人生好精彩喎！哼，佢都有今日喇！

其實係《港區國安法》實施之後，佢個貴人「袋巾」，已經好醒左閃右避，拒絕同啲媒體做訪問，嗰時啲黃絲已經圍插佢怕死，唱佢呃人落疊時就話齊上齊落，扮有義氣咁囉！喺35+顛覆大計進行時，「袋巾」曾經喺記者會以「工民黨」黨主席身份話會義無反顧支持「戴妖」同整個計劃，但係法庭上，有人話「戴妖」曾經都想同「袋巾」傾下初選嘅細節，最後「袋巾」都無咗影啦！

「袋巾」雖然喺2019年黑暴亂港期間言行出位，但自從「工民黨」解散之後，佢可以話係絕跡政壇。佢而家不談政治，只係面書曬命，週圍去吃喝玩樂，快活過神仙！好似將手足、戰友都已經拋諸腦後咁! 不過線人話佢最近出席咗「講大」法律系嘅高桌晚宴，都唔知邊鬼個請佢，唔通大家忘記咗2019年佢喺「講大」講嘅「有時暴力也是解決問題的辦法」嘅「偉論」？我零零發懷疑佢想借呢個機會，鋪橋搭路「復出」喎！大家放長眼睇吓點！

手足喺監倉圍爐，佢就睇小紅書去打邊爐，情何以堪呢？！

鍾情局．零零發

鍾情局

** 博客文章文責自負,不代表本公司立場 **

最近見好多外地嘅新聞紙，講到香港可以隨時捉一個人去坐監，入到去又冇晒人權，完全係黑箱作業，好似「監獄風雲」咁！ 於是我零零發搵咗幾位做太平紳士嘅老友，請教吓佢哋有關監獄嘅情況，因為佢哋會定期巡視監獄，去確保被拘留人士嘅權利係咪受到保障，同埋處理囚犯提出嘅投訴。

如果一個罪犯，被定罪判坐監，咁樣冇自由、失自由，吃點苦頭，係必然㗎啦！ 所有囚犯唔會因為唔同階層、家境，有唔同嘅待遇。坐監唔係去渡假，但又唔係講到好似「黑獄」咁，其實囚犯都有好多權利㗎！

首先膳食方面，就有專業營養師確保食物有益健康，每日除早、午、晚三餐外，重有睡前小食；如果有信仰需要，仲可以作出適合嘅安排。而囚犯每日規定要參與由懲教署安排嘅工作，每星期工作6天，每日6至10個鐘。工作種類一共有成13個唔同嘅範疇，包括製衣、木工，制作皮革、金屬製品等等。佢哋唔單止學到一技之長，仲有人工賺！除咗工作之外，每日都有不少於1小時嘅戶外運動，去鍛鍊身體。至於係住單人房定大房，懲教署就會以監獄秩序同囚犯利益作考量，唔係你想住乜就住乜！ 不過以「生果佬」呢啲名人，分開囚禁，都唔難理解吖！

醫療方面，每個監獄都有衛生署醫生同護士駐場，提供24小時嘅基本服務，如果有醫療需要，就會轉介囚犯去公立醫院跟進。基於保安理由，仲一定比佢哋睇先，唔使好似我哋一般市民要等咁耐。 所以「生果佬」個仔亂嗡話佢老豆有病無得醫，係冇可能囉！唔信大家睇下「生果佬」而家上庭個狀態幾好呀，仲有問有答添！我零零發聽聞有個坐咗監嘅前議員「三高」都搞掂咗，身體都不知幾健康！

另外，懲教署會提供足夠日用必需品比囚犯，但親友亦都可以買一啲特定嘅物品比佢哋，好似原子筆、毛巾、蚊貼、洗手液、潤膚液、內褲等等。如果大家仲記得，我零零發之前踢爆過黃店「餘一」幫囚犯家人代訂日用品，嗰兩款平安包賣成850-1000 蚊，我計過數，佢哋起碼賺一半，真係當人哋係提款機！而家就好喇，懲教署已經提供網上平台訂講服務，由供應商直接送啲物品到監獄，既方便親朋戚友，又唔使比人呃。

至於探訪安排，囚犯不但可以隨時見律師，而屋企人同朋友每個月都可以去探監，如果有需要，更加可以安排視像探訪添，真係與時並進呀！ 另外又可以收親友嘅雜誌、教科書同宗教書籍等等，當然懲教署會檢視同扣起一啲不利囚犯改過自新，或者對保安、紀律同秩序做成威脅嘅書籍啦，咁都係合理喎！ 而囚犯又可以寄出或者接收信件； 之前美國《天主教國民周刊》都刊登過「生果佬」喺獄中寄俾美國中小學生嘅信啦！

另外，囚犯可以就住佢嘅信仰，向懲教署申請見神職人員，望彌撒同領聖體，所以點會冇得同天父溝通交流呀！甚至乎結婚、同年幼子女聚會、出外見親人最後一面，都可以申請㗎！好似李卓人、胡志偉都成功申請咗出去奔喪喇！ 唔單止咁，佢哋仲可以行使投票權添！

唔講唔知，原來懲教署一直都為在囚人士提供適切嘅更生服務，等佢哋改過自新，放監之後有一啲技能同埋學歷，去再次融入社會。所以有唔少囚犯亦會趁呢個機會去讀書。喺2022年，懲教署教育基金就一共批出235萬助學金，俾超過930名在囚人士進修。由 1990 年到而家，都有超過1,200 多名在囚人士修讀「都會大學」嘅課程，仲有成 130 人拎到學士學位，當中包括有研究生學位同博士學位添！ 係2023年香港中學文憑試，有8個青少年囚犯嘅成績亦都達到入讀本地大學嘅要求，而其中一名考生更考獲6科最高29分嘅佳績！

其實啲囚犯真係好多權利，就連要「踎廁」定「坐廁」，都會按需要有得揀！ 但係如果佢哋仲有咩唔滿意要投訴，除咗懲教署嘅內部投訴機制，佢哋仲可以向每兩星期巡視監獄一次嘅太平紳士、或者向立法會議員、其他政府部門提出申訴，例如:申訴專員公署、平等機會委員會等等。甚至學「長毛」就「不可以留長髮係屬於性別歧視」，而提出司法覆核都仲得，精明嘅香港人，到而家你仲信有「黑獄」嗎？！

講真吖，一個囚犯坐監，自由受到限制係必然㗎啦，但係佢嘅權利一路都受到保障。坐監有工做，有錢賺，仲有機會讀書，一日三餐住宿、醫療都有人照顧……仲想點啊？雖然係咁，但我零零發唔係鼓勵大家去犯法，我只係想借呢個機會話俾大家聽，唔好俾一啲不負責任嘅媒體，去亂咁抹黑我哋香港公開、公平嘅制度。

其實無論本地傳媒抑或係外媒，喺「生果佬」11月尾出庭比口供嗰時，都已經報道咗佢精神唔錯。而「生果佬」嘅本地律師團隊亦都澄清過，「生果佬」就住唔同嘅病情，都接受緊適切嘅治療；而佢亦都知道可以向懲教署申請神父主持彌撒同埋領聖體……但係黃媒同埋「生果佬」嗰個假外國律師團隊，都懶得理啲澄清，仲不斷喺度亂報「生果佬」係監獄受到不適當對待，製造國際輿論同壓力，究竟咩居心呢？

鍾情局．零零發