近排環保議題又被炒到㷫烚烚，雖然零零發都好支持環保，不過環保可以做好多嘢，唔係淨係叫停啲發展項目。
好似反對「新田科技城」咁，成日話為樹木好、為魚塘好、為候鳥好，但從來唔講為人好？一句都無提人嘅需要同埋發展嘅原因！講真吖，呢廿幾年嚟借環境保育為名，窒礙發展，都唔知拖慢咗幾多工程，浪費咗幾多錢同機會?再咁搞落去，經濟同民生又點會好呀？香港嘅競爭力已經比好多城市落後咗好多喇！唔通真係環保大過天？抑或係別有洞天...？我於是的起心肝去翻查吓資料，終於發現咗啲吊詭嘅嘢…
每次政府有發展項目，四方八面嘅所謂環保組織都會出嚟抽水、抹黑，所用嘅版斧非常相似，今日就等我拆解下佢地嘅套路喇！
套路一：搵位入。
生活係香港呢個石屎森林，環保呢個咁chill嘅議題，啱曬啲中產同年輕人，所以環保組織好容易就會搵到位入，將佢無限放大，引起大家關注。今次「新田科技城」就用保育濕地同候鳥棲息為主打。講真，要發展新界土地，多多少少都會影響到大自然環境，但係環保係要講協調同兼容；我哋要環保啫，但唔係要「攬炒環保」， 唔係乜嘢都唔做喎！
套路二：發酵議題、激化矛盾。
以前呢啲組織必定大鑼大鼓搞集會、搞論壇、搞輿論攻勢，制造民意去反對發展。而家就梗係收歛咗，所以今次「反新田科技城」就用咗「範本攻勢」。即係佢哋寫定曬啲反對意見嘅範本信件，放喺網頁，咁大家就乜都唔使攪，只要係電腦度㩒個制，成份反對意見書就會直接寄去城規會。城規會係收到嘅反對意見書中，絕大部份都係用呢個範本去提交。唔單止咁，佢哋仲攪咗個所謂「城規會工作坊」，目的係為出席「城規會公聽會」發表反對意見嘅人做好準備，怕佢地去到城規會唔識講嘢穿煲。所以今次成個操弄民意嘅過程，風險低之餘又慳水慳力！
套路三：司法覆核。
最後，佢哋就必定用司法覆核呢一招，阻吓工程進度，繼續燒吓公帑，好似啲錢唔係錢咁。以往高鐵、港珠澳大橋同機場三跑都係咁玩，不過而家每個項目排除萬難起好咗，咪都發展得好好，個個市民都有得益，相信當日有份反對嘅人而家都用緊呢啲設施！今次「新田科技城」又重施故技係度申請司法覆核，唔知又玩幾耐喇！
呢啲橋段係咪熟口熟面呢？佢地咁樣搞，似政治組織多過環保組織。
講到呢度，一定唔可以唔提「本港土地硏究社」。呢個社團2012 年成立，佢哋成日借住啲道德高地、市民對大自然嘅關愛，同唔同嘅「環保」、「居民權益」、「政治」組織去講東講西。聽咗呢枝笛，最後只有一個結果，就係香港乜都唔使發展，最後只能做返一個務農養魚嘅小漁港！
睇番啲舊聞，「本港土地硏究社」除咗經常孖住唔同嘅組織搞環保同發展嘅議題之外，2017就拍住「香港眾志」去眾籌搞啲所謂「民間硏究」。「香港衆志」係班咩人大家心照啦。2023 年又係英角報紙唱衰香港政府有財政危機，唔應該繼續推動發展項目咁話喎。今年佢哋就成日借咗自己嘅寫字樓俾個「記協」開「23 條立法硏討會」、舉行週年大會、執委會選舉…俗語都有話「近朱者赤、近墨者黑」，咁大家都應該估到佢地咩葫蘆賣咩藥喇！仲有，最近佢哋密密接受美角「彭駁社」訪問，講香港樓市同土地供應，點解香港一個咁「細囈」嘅民間組織會得到西方媒體嘅加持? 最費解係，香港土地發展關美英咩事呢？
至於核心人物「層劍清」，原來佢係「土地正義聯盟」、「新界東北發展關注組」成員，呢兩個組織吹哨人係邊個？咪係「朱廸廸」囉！「朱廸廸」係邊個？咪係衰咗「35+顛覆案」認咗罪等緊判刑嗰個囉! 而「層劍清」同「朱廸廸」嗰班人一樣，好鍾意出嚟趁墟，除咗積極參與唔同嘅「反發展」行動之外，當年「反國教示威」、「非法佔領行動」都成日見到佢。係2019 年5月嗰陣時，佢同「本港土地硏究社」成班人去咗英角進行「香港前途硏究計劃」。成件事都好詭秘，佢哋返嚟無幾耐香港發生黑暴事件，佢哋班人啱啱係今年6、7月又去咗英角，唔知跟住香港會唔會有事發生呢？我仲有一様嘢好好奇，就係佢哋啲錢係邊度搵番嚟㗎呢？
之前講到呢班人好鍾意用司法覆核去阻撓發展項目，「新田科技城」都唔例外。以前嗰個「長週覆核皇」神憎鬼厭，所以今次就抽生死籌搵咗個「謝曬杰」出嚟去申請覆核。咪以為佢係一個素人，其實佢正職係社工，之前已經係「守護大嶼聯盟」召集人、「大澳環境及發展關注協會」總幹事、「工黨」 同埋「社工復興運動」成員，佢最近就好積極參與「反對社工註冊修定條例」大大小小嘅活動… 一個咁資歷深厚、經驗豐富嘅人，唔知佢跟住會搞乜鬼呢？
一班咁有背景嘅人，做啲咁有組織嘅行動，大家以後睇新聞紙、公仔箱訪問嘅時候，真係要「睇清睇楚」先好呀！
鍾情局．零零發
鍾情局
** 博客文章文責自負,不代表本公司立場 **
早兩日單「3 5 +顛覆國家政權」案被判有罪嘅犯人，終於求晒情，官老爺話會擇日判刑！呢單案成日好多人問，點解參加選舉同行使立法會投票權都會犯法？不如等我哋重溫吓成件事喇。
話說2019年黑暴之後，戴妖度咗個「非法初選」嘅詭計，就係拉埋晒所有反政府唔同黨派嘅人，逼佢哋事先同意無差別否決預案，借此顛覆政府。過程中透過籂選，令同意佢呢個詭計的人，至可以去參加立法會選舉。
其實根據香港嘅選舉法例，呢個所謂「初選」已經係唔合法，據《選舉(舞弊及非法行為)條例》，係唔可以脅迫人參選或不參選。 有啲人講，美國總統大選前都有初選喇。唔該大家睇清睇楚啲，人哋嘅初選，都係自己嗰黨入面，圍內揀參選人嘅程序，唔係跨黨派搞晒模擬投票呀，唔係好似戴妖咁去綵排成個選舉喎！ 其實戴妖一直都係度偷換概念、玩語言偽術去煽大家！唔止咁，呢班「當選人」仲打算做咗立法會議員之後，唔理好醜，連續兩次否決財政預算案，逼令特首根據基本法第5 2條下台，癱瘓政府，同埋發動街頭暴力，搞到香港血流成河… 呢啲咪係顛覆國家政權嘅行為囉！
呢單case 告咗47個，45人被定罪，有2個僥倖走得甩，不過律政司已經向其中一個身為大律師嘅被告，提出咗上訴。呢45個人，好多個為求自保，係審訊嘅時候話自己只係扮嘢呃選票。等如判咗有罪之後，就將自己講到係食物鏈嘅最底層，又話絕無顛覆國家之意，搏判輕啲。點解？ 原來「顛覆國家政權」罪嘅罰則係根據唔同嘅參與程度分為3個檔次；第一級「首要分子」嘅刑罰係由10年到最高嘅終身監禁；第二級「積極參與者」嘅刑罰就由監禁3年至10年；而「其他參與者」嘅最高刑罰就係監禁3年。唔怪得知佢哋一味作唔同嘅藉口去求情，盡地搏一鋪，想認做「其他參與者」！
咁究竟求情係乜嘢嚟㗎？係個審訊程序入面，官老爺將被定罪嘅犯人判刑前，都會考慮案件嘅嚴重性、犯人係案中嘅角色，同埋俾個最後機會個犯人，講吓佢有咩個人原因值得減刑。而官老爺最主要係會睇吓犯人有冇悔意、明唔明白自己做錯嘅地方、同埋接受法律制裁嘅態度，呢啲就係求情嘅真諦喇！但係呢單案大部份犯人嘅求情真係無乜誠意囉，而佢哋求情嘅金句同爛gag，真係笑死街坊㗎！而家等我揀幾個比大家開下眼界（排名不分先後）！
戴妖 - 我唔係大佬呀！
我係用法律學者身份發言、唔係組織者喎！我搞「初選」，因為我深信係合法㗎！就算非法，我都係用錯憲法權力啫。我都控制唔到啲議員會唔會無差別否決財政預算案㗎喎！我嘅參與程度有限，所以只係最輕那一類「其他參與者」！ 連官老爺都忍唔住問：如果你係「其他參與者」，咁邊個係「首要分子」？
黃痴瘋 - 我有公績㗎！
我熱心助人，參與公共事務。真係諗唔起佢做個啲咩豐功偉績喎，除非遊行示威都算係參與公共事務喇！ 佢跟著又交咗阿媽、老師同教會嘅求情信出嚟。不過官老爺真係心水清，問黃痴瘋： 點解你自己無寫求情信嘅？ 仲有，你係擔保期間再犯案，唔可以話係有良好品格囉！
蠄蟝祺 - 投機愛國者
我參加咗「大灣區青年就業計劃」，協助年青人到大灣區創業發展，藉此宣揚「一國兩制」、《基本法》及《國安法》。我既為求情，同時亦真心想維護國家安全。但官老爺指出： 佢被捕之後先改變立場愛國，屬投機份子；若果要維護國家安全，其中一個方法就係重判犯罪分子，以起阻嚇之效。講得好！真係要俾個like官老爺！！
搵笨堅 - 良好品格係無得「循環再用」㗎！
我服務咗社會幾十年啦，又做過社工、區議員同立法會議員，放監之後我想加入國際人道組織做廚師。官老爺話： 你有4次案底，所以唔可以「循環再用」你呢的所謂良好品格喎！
袁膠蔚 - 我結婚啦！
我本性善良又天真…我係監獄結咗婚啦，希望可以同老公過新生活呀！吓，咁都係求情理由？
無慧明 - 我錯在太愛香港？！
我坐監就做唔到護士呀！我參加「非法初選」 都係想出位啫，我仍然認為用立法會投票嚟改變係冇錯！ 錯就錯在我太愛香港啦！
趙加鹽、談海幫、隨便見- 我有病喎！
我哋唔係殘障、有皮膚病，就係長期病患，可唔可以判輕啲呀？！
涼房維、楊雪梨、流穎匡、皇子悅、逢達進 - 信錯佢！
我蠢，我無法律知識，信錯戴妖，以為咁做無犯法！
呢班人唔係話自己無法律知識，就係有病，又或者話只係利用呢啲機會做自己嘅「選舉策略」。講白啲，佢哋有好處就埋堆，有事就即閃，佢哋驚死唔參加呢啲陰謀會蝕底，以為有衰衰大堆，所以無人夠膽搞佢哋，點知今次真係一鑊熟！ 佢哋係啲人講佢又講、人做佢又做，抽水搵着數，但香港竟然有咁多人，將自己嘅命運同將來交俾佢哋，真係無嘢好講！
到而家仲有好多個犯人係冇悔意、係度扮毛瓜、扮低智、扮被逼…係咁講埋曬啲非常無底線嘅求情，不過佢哋嘅律師團隊又真係幾趣喎，任由佢哋發嗡風，所以連官老爺都忍唔住講： 唔應該客人話要講咩就講咩、想要求過分輕判係幫倒忙…唉，俾錢請大狀都無非係想有啲法律專業意見啫，唔係倒自己米囉！ 而家咁，都唔知係佢哋的大狀屎波，定係有心整蠱？各位自求多福喇！
鍾情局．零零發
