我早兩日收到小讀者嘅電郵，想同大家分享一下：
「雖然放暑假可以睇多啲電視，但我寧願返學，因為課室有冷氣、有檯有櫈做功課。星期日新聞話最高氣溫有33度，我屋企起碼有35、6度；星期二落完大暴雨出太陽，新聞映咗條雙彩虹出嚟，同埋啲叔叔攞住個望遠鏡睇雀仔…我一啲都唔鍾意落雨之後出太陽，嗰種又焗又濕嘅感覺好難受；我同阿爸、阿媽住喺深水埗劏房，日日要坐係張床做功課、食飯，點解一隻雀仔都可以住得好過我嘅？」
唉，住劏房嘅人夏天就焗桑拿、冬天就瞓冰箱，啲細路屈係張床度連轉身都無位，諗落個心都唔係幾舒服。但每次話要係新界拎啲地出嚟起多啲屋、或者重建啲舊樓俾人住，就會有所謂熱心嘅「保育人士」彈出嚟反對，又話要保留啲記憶、保護啲郊野地方、雀仔、魚塘…全香港700幾萬人，我諗而家每日北上消遣嘅人，一定多過行山嘅人；日日諗住可以上樓住公屋嘅人，一定多過每日去游山玩水睇雀嘅人囉! 我都好重視保育，不過又係嗰句，我哋唔係要「攬炒保育」，唔係一講保育就乜嘢都唔做喎！
地球生物要有多樣性，除咗雀仔、魚、青蛙，應該仲要包括人、包括住係劏房嘅細路仔喎! 雀仔偏離飛行航道、跟甩咗條隊都有人同佢發聲、魚塘都係人挖出嚟養魚㗎、邊個話規劃嘅生態圈唔適合大自然物種繼續生活？你睇吓大熊貓唔係有系統保護同繁殖，呢啲活化石一早就絕曬種喇！邊有而家咁多隻、咁健康，連高齡盈盈對龍鳳胎都做埋明星㖭！如果住劏房班細路仔無正常嘅環境成長，大咗之後又無發展嘅空間向上流，令佢哋將來嘅人生軌道偏航，咁啱唔啱先？
話時話，呢班「熱心保育」嘅人士，喺擔心飛禽走獸、樹木、漁塘、海港嘅時候，唔知有冇諗過住緊劏房嘅細路仔？佢哋又有幾多個住過劏房，知道啲苦況？
先講下「本港土地研究社」 嘅代言人「層劍清」，話就話住深水埗，但係佢唔係住劏房呀，唔知佢有父蔭定係有貴人，四十都未出頭，就可以住嚮唔值一千都900萬、有會所、有泳池嘅「家」，就算屋企唔開冷氣都仲可以去會所嘆下！至於呢排一齊夾band轟「新田科技城」 嘅 「陽春社」總監「芋角言」就住美孚私樓，「香港雀仔會」 嘅榮譽會長「個隻鷹」住紅磡豪宅；喂喂喂，佢哋住緊嘅地皮都係由填海得番嚟㗎喎! 至於「六式和平」總監「老馮強」就住西區嘅老牌屋苑，就算新一代覆核王都住係離島大村屋呀！雖然 「保護海岸協會」暫時只係獨沽一味講唔準填海(遲啲會唔會加入埋嗰啲「保育」嘅聯盟就唔敢包喇)，但個會ex同埋而家嘅話事人，唔係住山頂別墅就係半山大宅，佢哋日日可以係屋企望住個美麗海岸線、晚晚又可以摸住酒杯底嘆紅酒睇維港夜景…想當年呢啲半山大宅咪又係要斬好多樹、趕走好多雀仔先至起得成！至於呢個「保護海岸協會」嘅顧問「斑馬文」，都喺香港後花園揀咗間風水屋hea！
我唔係想八卦人哋嘅私事，我只係覺得呢班所謂「保育人士」，雖然唔係個個都大富大貴，但起碼有屋有樓住，可以過冬暖夏涼嘅生活，你屋企唔開冷氣可以開窗，呢個係你嘅選擇，你係有得揀嗰個，但係住劏房嘅人有得揀咩? 咩都反對，民生住屋唔關心，人可以無屋住，條虫就要保護？！我唔係冒犯，但係我想適可而止，要平衡生態。
所以話「有得揀先係老闆」呢句說話一啲都無講錯！
鍾情局．零零發
鍾情局
** 博客文章文責自負,不代表本公司立場 **
近排有人係到講所謂「大和解」，建議政府放生嗰啲因為2019黑暴拉咗而未被起訴嘅年輕人，為成件事劃上一個句號喎，目的係要話比全世界知，香港已經全面復常，係一個包容同多元化嘅社會，好適合營商同投資環境咁話！
呢啲人無厘頭地將刑事案件同經濟發展綑綁埋一齊， 乜放咗做錯事嘅人原來係可以令經濟好，我零零發都係第一次聽，唔通真係「換個角度，總有出路」？
仲有，要「和解」都要有仇有怨，咁而家邊個同邊個「結怨」呀？邊個同邊個「和解」呀？而家好似搞到政府同警察同班罪犯「結怨」，講到政府有責任去「和解」咁喎。喂喂喂，唔好係度輕描淡寫咁講呢啲係「怨」呀！而家係講緊有人犯罪、犯法，係要用司法程序去處理㗎 !我覺得所謂「大和解」，係喺度混淆視聽，係一個偷換概念嘅偽命題！
咁如果要「和解」，都要睇吓呢啲「和解」對象做咗咩事先得㗎，偷粒糖同偷嚿金都有分別喇！根據監警會嘅獨立調查報告，2019年中至2020年頭，香港大大話話有超個300次遊行示威，嗰段期間犯法行為簡直「包羅萬有、無法無天」，包括堵塞道路、掟汽油彈，週街放火，破壞銀行、商店同港鐵站，圍毆唔同政見嘅人，闖入大學實驗室偷危險品、化學品，偷車，試圖搶警槍，包圍警察總部、法院、立法會大樓同機場等等；係香港自1967年以來，最大規模嘅違法同暴力事件！報告又話粗略估計，有超過30間中資銀行、與內地相關或者係支持政府嘅店舖被多次破壞，超過60處政府、警署、警察宿舍同大學受到不同程度嘅損壞，有740組交通燈被打爛，55公里鐵欄被拆走（差唔多係由金鐘政府總部去屯門來回咁長）， 22000平方米 ( 成3個標準足球場咁大）嘅行人路地磚被掘起，破壞咗147個港鐵/輕鐵站，超過1000班航機被取消……仲有接近2000名警員及家屬被網上起底，有警員被咬斷手指、中箭、被淋腐蝕性液體以致全身被燒傷等等。係2019年11月，警方係「你大」搜到3989枚汽油彈（一個人每10秒掟一個汽油彈，都要差唔多掟足11個鐘先可以掟曬），1339件爆炸品、601樽腐蝕性液體同埋573件武器，包括弓箭同氣槍。而係「步大」就搜到8000多枚汽油彈……不過呢啲都只係冰山一角咋！
2019 年11 月新界東交通大癱瘓咗差唔多成個星期，「步大」內地生要警察護送去馬料水碼頭坐水警輪離開，「你大」游泳池用嚟練習掟汽油彈嘅情景仲瀝瀝在目！唔單止咁，暴徒又講好多大話去煽動群眾，一時就話警察係地鐵站內打死6個示威者 (8-31太子站殺人事件，作嘢叻到作埋具體數字)，又話警察對被扣留係新屋嶺嘅女示威者性侵 (吳傲雪事件)，又話警察用布袋彈打盲手無寸鐵示威者隻眼 (爆眼女事件) 等等……通通事後都被証實係大話連篇，目的只係想去分化社會，挑撥暴徒情緒，保持暴亂嘅勢頭！
當時嘅香港，真係好似戰場咁，不但有無辜嘅市民被人用磚掟死、被火嚴重燒傷，而且到處都被破壞。大家係媒體都睇到，暴徒好大部份都係年輕人。如果大家有留意最近宣判嘅所謂「屠龍案」，個班被告人都係廿歲出頭，有一個犯案時都只係得18 歲，佢哋計劃用炸彈「無差別」咁襲擊警察同遊行嘅市民，好彩警察及時拉曬所有人，阻止咗呢件暴力血腥事件，如果唔係，就……一鑊熟！究竟個社會有咩對佢哋唔住，點解對啲平常百姓咁深仇大恨，失去理智咁去做一啲咁殘忍嘅事，去滿足呢啲人的政治訴求呢？
提出「大和解」嘅人，當然就會話啲年輕人當時都係因為社會大環境同朋輩嘅影響，先至會做出咁暴力嘅行為啦，應該比次機會佢哋咁話。 喂， 一個人無論幾大年紀，都要為自己所做嘅事，負上唔同程度嘅責任，冇可能一句「大和解」，就當冇事發生過! 咁樣做，只會俾一個好錯誤嘅信息嗰啲正常嘅年輕人，做錯事將來又會「大和解」可以洗底架啦。對暴徒嚟講，就只係會種大咗佢哋個膽，推佢哋去死！
當時係社會有影響力嘅人、媒體、老師、社工，你哋有提醒過班年輕人唔好去犯法嗎？有啲教育、社福界嘅人仲帶班同學仔一齊去掟汽油彈⋯⋯個個著住件背心就話係記者、係急救員，刻意阻住警方行動。有啲人更加英雄化咗佢哋嘅暴行，令佢地更加亢奮同失去理智！難聽啲講，班後生仔嘅失常行為，雖然係俾「犯民」嘅所謂「違法達義」歪理害死，但係「犯民」成年人又唔say no，你哋好大責任呀！終於害到一個又一個大好青年去犯法，去放火、去掟汽油彈、去打人，但係你有冇見過呢班「犯民」嘅仔女有份出嚟搞事？人哋嘅仔女就係草，自己嗰啲就如珠如寶！
再者，法律面前人人平等㗎嘛！夠証據，律政署就會起訴被捕嘅人，不過當時黑暴立立亂，而案件又多，搜証又需時，有啲證人又著草走咗路，所以有人就早啲被告上法庭，有人就會繼續擔保住先囉！所謂「大和解」，咪即係放生啲違法暴徒? 咁咪對啲已經認咗罪，或者係已經被判刑嘅「手足」好唔公平? 而且咁樣做，亦都損害咗香港法治嘅獨立性同公平性！仲有，唔該諗嘢唔好淨係諗一邊，提出同讚成呢個「大和解」嘅人，有冇考慮過受害者同家屬? 所謂「大和解」係咪對佢哋好唔公平、對佢哋係咪二次傷害?！
我零零發覺得提出「一刀切大和解」嘅人，當日直接間接支持黑暴，如今其實係華麗轉身想去漂白黑暴，鋪定路去配合美西方話要寬大處理「生果佬」單案囉！
鍾情局．零零發
