想判輕啲，究竟佢哋係求神定求情？

早兩日單「3 5 +顛覆國家政權」案被判有罪嘅犯人，終於求晒情，官老爺話會擇日判刑！呢單案成日好多人問，點解參加選舉同行使立法會投票權都會犯法？不如等我哋重溫吓成件事喇。

話說2019年黑暴之後，戴妖度咗個「非法初選」嘅詭計，就係拉埋晒所有反政府唔同黨派嘅人，逼佢哋事先同意無差別否決預案，借此顛覆政府。過程中透過籂選，令同意佢呢個詭計的人，至可以去參加立法會選舉。

其實根據香港嘅選舉法例，呢個所謂「初選」已經係唔合法，據《選舉(舞弊及非法行為)條例》，係唔可以脅迫人參選或不參選。 有啲人講，美國總統大選前都有初選喇。唔該大家睇清睇楚啲，人哋嘅初選，都係自己嗰黨入面，圍內揀參選人嘅程序，唔係跨黨派搞晒模擬投票呀，唔係好似戴妖咁去綵排成個選舉喎！ 其實戴妖一直都係度偷換概念、玩語言偽術去煽大家！唔止咁，呢班「當選人」仲打算做咗立法會議員之後，唔理好醜，連續兩次否決財政預算案，逼令特首根據基本法第5 2條下台，癱瘓政府，同埋發動街頭暴力，搞到香港血流成河… 呢啲咪係顛覆國家政權嘅行為囉！

呢單case 告咗47個，45人被定罪，有2個僥倖走得甩，不過律政司已經向其中一個身為大律師嘅被告，提出咗上訴。呢45個人，好多個為求自保，係審訊嘅時候話自己只係扮嘢呃選票。等如判咗有罪之後，就將自己講到係食物鏈嘅最底層，又話絕無顛覆國家之意，搏判輕啲。點解？ 原來「顛覆國家政權」罪嘅罰則係根據唔同嘅參與程度分為3個檔次；第一級「首要分子」嘅刑罰係由10年到最高嘅終身監禁；第二級「積極參與者」嘅刑罰就由監禁3年至10年；而「其他參與者」嘅最高刑罰就係監禁3年。唔怪得知佢哋一味作唔同嘅藉口去求情，盡地搏一鋪，想認做「其他參與者」！

咁究竟求情係乜嘢嚟㗎？係個審訊程序入面，官老爺將被定罪嘅犯人判刑前，都會考慮案件嘅嚴重性、犯人係案中嘅角色，同埋俾個最後機會個犯人，講吓佢有咩個人原因值得減刑。而官老爺最主要係會睇吓犯人有冇悔意、明唔明白自己做錯嘅地方、同埋接受法律制裁嘅態度，呢啲就係求情嘅真諦喇！但係呢單案大部份犯人嘅求情真係無乜誠意囉，而佢哋求情嘅金句同爛gag，真係笑死街坊㗎！而家等我揀幾個比大家開下眼界（排名不分先後）！

戴妖 - 我唔係大佬呀！

我係用法律學者身份發言、唔係組織者喎！我搞「初選」，因為我深信係合法㗎！就算非法，我都係用錯憲法權力啫。我都控制唔到啲議員會唔會無差別否決財政預算案㗎喎！我嘅參與程度有限，所以只係最輕那一類「其他參與者」！ 連官老爺都忍唔住問：如果你係「其他參與者」，咁邊個係「首要分子」？

黃痴瘋 - 我有公績㗎！

我熱心助人，參與公共事務。真係諗唔起佢做個啲咩豐功偉績喎，除非遊行示威都算係參與公共事務喇！ 佢跟著又交咗阿媽、老師同教會嘅求情信出嚟。不過官老爺真係心水清，問黃痴瘋： 點解你自己無寫求情信嘅？ 仲有，你係擔保期間再犯案，唔可以話係有良好品格囉！

蠄蟝祺 - 投機愛國者

我參加咗「大灣區青年就業計劃」，協助年青人到大灣區創業發展，藉此宣揚「一國兩制」、《基本法》及《國安法》。我既為求情，同時亦真心想維護國家安全。但官老爺指出： 佢被捕之後先改變立場愛國，屬投機份子；若果要維護國家安全，其中一個方法就係重判犯罪分子，以起阻嚇之效。講得好！真係要俾個like官老爺！！

搵笨堅 - 良好品格係無得「循環再用」㗎！

我服務咗社會幾十年啦，又做過社工、區議員同立法會議員，放監之後我想加入國際人道組織做廚師。官老爺話： 你有4次案底，所以唔可以「循環再用」你呢的所謂良好品格喎！

袁膠蔚 - 我結婚啦！

我本性善良又天真…我係監獄結咗婚啦，希望可以同老公過新生活呀！吓，咁都係求情理由？

無慧明 - 我錯在太愛香港？！

我坐監就做唔到護士呀！我參加「非法初選」 都係想出位啫，我仍然認為用立法會投票嚟改變係冇錯！ 錯就錯在我太愛香港啦！

趙加鹽、談海幫、隨便見- 我有病喎！

我哋唔係殘障、有皮膚病，就係長期病患，可唔可以判輕啲呀？！

涼房維、楊雪梨、流穎匡、皇子悅、逢達進 - 信錯佢！

我蠢，我無法律知識，信錯戴妖，以為咁做無犯法！

呢班人唔係話自己無法律知識，就係有病，又或者話只係利用呢啲機會做自己嘅「選舉策略」。講白啲，佢哋有好處就埋堆，有事就即閃，佢哋驚死唔參加呢啲陰謀會蝕底，以為有衰衰大堆，所以無人夠膽搞佢哋，點知今次真係一鑊熟！ 佢哋係啲人講佢又講、人做佢又做，抽水搵着數，但香港竟然有咁多人，將自己嘅命運同將來交俾佢哋，真係無嘢好講！

到而家仲有好多個犯人係冇悔意、係度扮毛瓜、扮低智、扮被逼…係咁講埋曬啲非常無底線嘅求情，不過佢哋嘅律師團隊又真係幾趣喎，任由佢哋發嗡風，所以連官老爺都忍唔住講： 唔應該客人話要講咩就講咩、想要求過分輕判係幫倒忙…唉，俾錢請大狀都無非係想有啲法律專業意見啫，唔係倒自己米囉！ 而家咁，都唔知係佢哋的大狀屎波，定係有心整蠱？各位自求多福喇！

鍾情局．零零發

鍾情局

** 博客文章文責自負,不代表本公司立場 **

最近見好多外地嘅新聞紙，講到香港可以隨時捉一個人去坐監，入到去又冇晒人權，完全係黑箱作業，好似「監獄風雲」咁！ 於是我零零發搵咗幾位做太平紳士嘅老友，請教吓佢哋有關監獄嘅情況，因為佢哋會定期巡視監獄，去確保被拘留人士嘅權利係咪受到保障，同埋處理囚犯提出嘅投訴。

如果一個罪犯，被定罪判坐監，咁樣冇自由、失自由，吃點苦頭，係必然㗎啦！ 所有囚犯唔會因為唔同階層、家境，有唔同嘅待遇。坐監唔係去渡假，但又唔係講到好似「黑獄」咁，其實囚犯都有好多權利㗎！

首先膳食方面，就有專業營養師確保食物有益健康，每日除早、午、晚三餐外，重有睡前小食；如果有信仰需要，仲可以作出適合嘅安排。而囚犯每日規定要參與由懲教署安排嘅工作，每星期工作6天，每日6至10個鐘。工作種類一共有成13個唔同嘅範疇，包括製衣、木工，制作皮革、金屬製品等等。佢哋唔單止學到一技之長，仲有人工賺！除咗工作之外，每日都有不少於1小時嘅戶外運動，去鍛鍊身體。至於係住單人房定大房，懲教署就會以監獄秩序同囚犯利益作考量，唔係你想住乜就住乜！ 不過以「生果佬」呢啲名人，分開囚禁，都唔難理解吖！

醫療方面，每個監獄都有衛生署醫生同護士駐場，提供24小時嘅基本服務，如果有醫療需要，就會轉介囚犯去公立醫院跟進。基於保安理由，仲一定比佢哋睇先，唔使好似我哋一般市民要等咁耐。 所以「生果佬」個仔亂嗡話佢老豆有病無得醫，係冇可能囉！唔信大家睇下「生果佬」而家上庭個狀態幾好呀，仲有問有答添！我零零發聽聞有個坐咗監嘅前議員「三高」都搞掂咗，身體都不知幾健康！

另外，懲教署會提供足夠日用必需品比囚犯，但親友亦都可以買一啲特定嘅物品比佢哋，好似原子筆、毛巾、蚊貼、洗手液、潤膚液、內褲等等。如果大家仲記得，我零零發之前踢爆過黃店「餘一」幫囚犯家人代訂日用品，嗰兩款平安包賣成850-1000 蚊，我計過數，佢哋起碼賺一半，真係當人哋係提款機！而家就好喇，懲教署已經提供網上平台訂講服務，由供應商直接送啲物品到監獄，既方便親朋戚友，又唔使比人呃。

至於探訪安排，囚犯不但可以隨時見律師，而屋企人同朋友每個月都可以去探監，如果有需要，更加可以安排視像探訪添，真係與時並進呀！ 另外又可以收親友嘅雜誌、教科書同宗教書籍等等，當然懲教署會檢視同扣起一啲不利囚犯改過自新，或者對保安、紀律同秩序做成威脅嘅書籍啦，咁都係合理喎！ 而囚犯又可以寄出或者接收信件； 之前美國《天主教國民周刊》都刊登過「生果佬」喺獄中寄俾美國中小學生嘅信啦！

另外，囚犯可以就住佢嘅信仰，向懲教署申請見神職人員，望彌撒同領聖體，所以點會冇得同天父溝通交流呀！甚至乎結婚、同年幼子女聚會、出外見親人最後一面，都可以申請㗎！好似李卓人、胡志偉都成功申請咗出去奔喪喇！ 唔單止咁，佢哋仲可以行使投票權添！

唔講唔知，原來懲教署一直都為在囚人士提供適切嘅更生服務，等佢哋改過自新，放監之後有一啲技能同埋學歷，去再次融入社會。所以有唔少囚犯亦會趁呢個機會去讀書。喺2022年，懲教署教育基金就一共批出235萬助學金，俾超過930名在囚人士進修。由 1990 年到而家，都有超過1,200 多名在囚人士修讀「都會大學」嘅課程，仲有成 130 人拎到學士學位，當中包括有研究生學位同博士學位添！ 係2023年香港中學文憑試，有8個青少年囚犯嘅成績亦都達到入讀本地大學嘅要求，而其中一名考生更考獲6科最高29分嘅佳績！

其實啲囚犯真係好多權利，就連要「踎廁」定「坐廁」，都會按需要有得揀！ 但係如果佢哋仲有咩唔滿意要投訴，除咗懲教署嘅內部投訴機制，佢哋仲可以向每兩星期巡視監獄一次嘅太平紳士、或者向立法會議員、其他政府部門提出申訴，例如:申訴專員公署、平等機會委員會等等。甚至學「長毛」就「不可以留長髮係屬於性別歧視」，而提出司法覆核都仲得，精明嘅香港人，到而家你仲信有「黑獄」嗎？！

講真吖，一個囚犯坐監，自由受到限制係必然㗎啦，但係佢嘅權利一路都受到保障。坐監有工做，有錢賺，仲有機會讀書，一日三餐住宿、醫療都有人照顧……仲想點啊？雖然係咁，但我零零發唔係鼓勵大家去犯法，我只係想借呢個機會話俾大家聽，唔好俾一啲不負責任嘅媒體，去亂咁抹黑我哋香港公開、公平嘅制度。

其實無論本地傳媒抑或係外媒，喺「生果佬」11月尾出庭比口供嗰時，都已經報道咗佢精神唔錯。而「生果佬」嘅本地律師團隊亦都澄清過，「生果佬」就住唔同嘅病情，都接受緊適切嘅治療；而佢亦都知道可以向懲教署申請神父主持彌撒同埋領聖體……但係黃媒同埋「生果佬」嗰個假外國律師團隊，都懶得理啲澄清，仲不斷喺度亂報「生果佬」係監獄受到不適當對待，製造國際輿論同壓力，究竟咩居心呢？

鍾情局．零零發