「步大」管理層、「步大」新聞系，你地係睇唔明法庭判詞，定係扮睇唔到？

早排我爆咗傳媒人歐x輪喺「步大」新聞系做專業顧問、同埋做宿舍舍監呢件事冇幾耐，我發現今年暑假後，「步大」新聞系網頁話歐某正在休假中。嘩，一開學就暫停教學? 咁橋嘅？!
 
話說歐某最近又成為「熱搜」，因為係8月29號地方法院官老爺裁定係《立場新聞》刋登嘅11篇文章係有煽動顛覆國家嘅意圖，內容全無客觀事實基礎、淨係嚮度無理攻擊、挑撥情緒，目的只係想抹黑「一國兩制」、「國安法」同埋司法制度等等⋯⋯呢11篇文章入面歐某寫咗4篇，跑贏其他黃人作者成為「大贏家」！
 
既然法庭已經確立歐某嘅文章，有煽動顛覆國家嘅意圖，到而家都成三個星期喇，我唔覺「步大」嘅管理層同新聞系做過啲咩喎，點解好似當無事發生嘅？ 淨係話歐某「因個人原因申請休假」，好似唔關大學事咁嘅？！

「步大」 作為香港嘅高等學府，一個黑暴已經將佢成功改名。嗰段時間係「步大」搜到接近成4000枚汽油彈，2019 年11月11號，佢哋更大開中門，俾班暴徒進駐，火燒「步大」2號橋，癱瘓咗新界東嘅交通差唔多成個禮拜！當時佢哋係世界暴力大學排名可謂數一數二，已經遠遠超越佢哋學術上嘅成就！其實當時「步大」發生咁轟動嘅亂像，香港所有傳媒都好着緊咁跑呢單新聞，24 小時不斷更新情況，但唯獨是佔盡天時地利嘅「步大」新聞系人間蒸發咗，點解班教授咁近都唔帶啲學生去採訪同報導吓件事？

每個國家嘅新聞同言論自由，都唔係大曬、都有底線架！係《公民權利和政治權利國際公約》都講得好清楚，媒體係發布言論、資訊同文章時，必須遵守及執行「特別責任和義務」，包括保障國家安全或公共秩序等。歐某傳播虛假訊息、煽動仇恨、美化暴力嘅報導，完全違背咗新聞倫理和專業操守。但係唔知點解佢今個學年仲會教「傳媒道德與法律」和「新聞敘事技巧」？！重搵佢教「傳媒法律」，唔好玩啦！我想問下有邊間教育機構會俾一個咁樣嘅教職員繼續同學生上堂？我諗最低限度校方都要主動暫停佢嘅教學職務，以正視聽啦！歐某係涉嫌參與煽動顛覆國家，係重罪嚟㗎喎，又有4篇文章畀法庭判斷係煽動，點解而家好似佢話自己放假便算了？！不過我諗歐某而家嘅心情應該好忐忑，因為唔知幾時會被控告「發佈煽動刊物」，又唔知甩唔甩到身，護照又唔係手，想着草學其他「手足」咁隔岸繼續亂嗡又唔得、加上又唔捨得「步大」呢份高薪厚職嘅工！但坦白講，佢其實係度累緊街坊，好心佢就唔好咁厚面皮，賴係度唔辭職喇！
 
奉勸各位家長，如果你嘅仔女讀「步大」新聞系，你哋就真係要小心啲喇！某人而家只係暫時放假咋，你嘅仔女隨時會上佢嘅堂、做佢入室弟子、有機會得到佢圖謀顛覆國家嘅真傳㗎！咁樣嘅人係高等學府教新聞法律，大家覺得妥當嗎？咪住，佢而家咁樣休假係咪仲住嚮宿舍? 咁咪有好多機會接觸到班宿生？吓，咁搞法，遲早會出大事喎！嫌我長氣都要講多次，仔女讀飽書搵唔到工事小，最怕就好似佢哋啲師兄師姐咁俾人點咗條歪路行，犯法坐監就慘咯！
 
歐某作為一間政府資助大學嘅教員，竟然寫啲咁嘅挑撥性評論，而「步大」管理層同新聞系高層好似不聞不問，俾一個有咁嘅背景嘅人繼續教學生，校方係咪認同歐某嘅言論，抑或係故意唔履行佢哋嘅職責？如果係，佢哋係咪有機會觸犯「公職人員行為失當」罪？仲有，校方係咪又應該公開講清楚歐某咁嘅背景俾人知，等家長同學生可以有得揀？講得趣啲，學生同家長都係消費者，校方隱瞞唔講自己有啲咁嘅教員，都有可能違反海關「商品說明」條例㗎！「步大」管理層、「步大」新聞系對歐某單野隻字都唔提，都唔知係睇唔明法庭判詞，定係扮睇唔到？喂，「步大」有法律系㗎，係咪要向佢哋尋求吓法律意見呢？
 
 仲有，教育界呢行不嬲都係跟學生一齊放假，應該無乜年假呢樣嘢，咁歐某而家放緊咩假？係咪出住糧放假又唔使做？佢嘅人工都係納稅人嘅錢嚟㗎喎！「步大」係咪應該交待清楚啲？
 
諗諗吓，我應該嗱嗱聲去請教下啲大狀老友，睇下呢單嘢應該投訴俾邊個執法單位去跟進先！

鍾情局．零零發

鍾情局

** 博客文章文責自負,不代表本公司立場 **

而家中秋節月餅品種越嚟越多，絕對係越食越有驚喜! 不過最近有隻月餅就越食越驚…因為人家賣流心月餅，佢就賣黑心月餅。呢隻黑心月餅係「餘一」嘅出品，呢間嘢早兩年已經被揭發賣「發霉月餅」，今年就因為係無牌食品工場制造月餅，俾食安中心封咗舖，但聽聞最初整好嗰批月餅係海外訂單，已經寄咗去英美各地，所以奉勸各位海外食家要小心，因為食無牌工場月餅真係責任自負！

中秋節係中國人嘅大節，邊鬼個整呢啲無牌工場黑心月餅？明查暗訪之後起咗「餘一」話事人嘅底，原來係前旺角區議員朱X瑋。呢個阿瑋喺「暴大」數學系畢業後就學人攪工運，佢喺2007年煽動班紮鐵工人大罷工。到2010年就黐埋另一隻「豬」朱迪迪反高鐵，如果當年唔係佢哋不停唱衰高鐵，話工程會影響沿線嘅樓宇同人命安全，又話要滅菜園村先可以起高鐵，成個高鐵工程就唔駛拖慢咗成9個月，嘥曬啲錢。而家高鐵開通咗之後唔單止人同樓都無事，而且個個仲爭住坐，事實証明佢哋當日只係利用社會議題搞分化、搞對抗，阻住發展，成件事完全係玩誇張失實指控，愚弄市民！

到咗2019年，朱x瑋就食住「黑暴」條水，做咗旺角嘅區議員。利用黑暴抗爭光環當選嘅佢，一心只係諗住撈政治油水，完全無諗過服務社區，點知2021年被DQ咗，即刻無咗份人工高，但又唔使做嘅區議員工，於是佢唯有絞盡腦汁去搵快錢，搵大錢！俗語都有講，唔熟唔做、唔熟唔食，所以佢首先開咗間網購店「餘一」去食「黃色經濟圈」呢條水。後來發覺手足啲錢長呃長有，於是突然華麗轉身去關心「囚犯權益」，成立所謂囚權組織「後鳥」，去支援在囚反對派人士，其實佢係去發囚犯財先真。呢隻「後鳥」初初就搞法律支援、釋囚經驗分享，同埋提供家屬心理支援，跟住佢哋仲去招募啲大學生做「後鳥」實習生去探監。佢哋係藉住呢個平台去繼續發佈反政府訊息，同埋去賺盡在囚手足屋企人嘅錢。點賺？就係賣「囚犯平安包」去謀取暴利囉！

乜嘢係「囚犯平安包」？其實就係囚犯親友探監時，拎去俾在囚人士嘅物資。因為懲教署對俾囚犯嘅物資有嚴格嘅規定，所以呢個阿瑋就借啲意透過「後鳥」去接觸在囚人士嘅屋企人，然後建議佢哋去「餘一」訂平安包俾在囚嘅親朋戚友。好多人驚買錯嘢拎唔到入去監倉，咁咪幫襯佢哋囉。佢哋嗰兩款平安包賣850-1000 蚊，我計過喇，佢哋基本上賺成一半！話就話啲利潤係用嚟支援在囚手足，但佢哋又無將盤數攤出嚟，鬼知道堅定流咩！ 

賺錢點會嫌多㗎，但係在囚手足比起潛伏係外面小黃人嘅數目，真係小巫見大巫。於是係2023年嘅時侯，阿瑋把心一橫去搵大錢，佢孖住「雲利」一對保險經紀嘅兄弟同埋兩個D Q咗嘅區議員，去搞強積金生意，因為唔想俾比其他黃人捷足先登呢盤大生意，佢哋於是高調地攪咗好多個所謂「強積金」講座，又懶叻咁接受訪問谷人氣！由於樹大招風，終於有「手足」睇唔過眼，踢爆阿瑋原來係無「強積金中介人」牌照，唔查由自可，一查就發現成個掠水集團有人虛報入職紀錄、有人又偽造保險履歷等等，攪到個個自己一身蟻。內幕消息話成單嘢仲查緊，而家佢哋就真係有得震、無得瞓喇！

其實由黑暴開始，有唔少人借住黃色經濟圈嚟開餐廳、開各色各樣嘅舖頭，吸自己友嘅血。呢啲黃店一喺就抬高曬啲價錢、一喺就賣啲次等貨嚟掠水呃錢。點解佢哋啲客仔咁蠢，有平嘢優嘢唔買，要幫襯呢啲二打六劣質舖頭買嘢呢？

鍾情局．零零發