公關界呢幾年有個「黃人」好紅，因為佢能夠游走喺紅、黃、藍、白、黑（暴）5道之中，接好多jobs，豬籠入水，發過豬頭，佢就係肥仔葱喇！
一般市民大衆對肥仔可能有啲陌生，咁等我講下佢嘅背景俾大家重溫一下先。肥仔喺港大修讀過法律，畢業之後投身新聞界做記者，佢藉住工作關係，建立自己嘅人際網絡。係2012年入過官府，做咗當時官府大掌櫃嘅助理。喺2016年，大掌櫃唔想做千年老三，於是辭職去競逐官府第一話事人，肥仔二話不說即刻辭職，義務去幫大掌櫃助選。你咪以為肥仔有情有義，犧牲份高薪厚職去幫大掌櫃喎，佢不知藏得幾深、計得幾準! 佢從來無諗過大掌櫃會跑贏，但點解明知輸梗都要幫佢？咁話曬大掌櫃曾經掌握官府嘅財政，好多商賈名人黐埋佢身，所以做大掌櫃跟班，不但可以提升自己知名度，而且仲識到唔少貴人，所以就算大掌櫃做唔到第一話事人，肥仔已經掌握啲金主名冊俾佢慢慢用。咁萬一老板行大運執到好籌做到話事人，一定有一官半職俾佢，所以肥仔度過，做呢幾個月義工，將來係無得輸！
咁肥仔除咗傍住大掌櫃提高身價之外，佢仲好識得運用西方近年嗰啲講多過做嘅政治公關術，同埋啲嘩衆取寵嘅社交媒體出post呃like手法，取悅大眾，當然亦少不了利用種種手段，為大掌櫃對手塑造負面觀感。佢從來無諗過幫大掌櫃去贏，佢一心只係想使出渾身解數，去吸引反建制嘅眼球，利用個選舉去捧紅自己，成功將自己打造成新一代頂流公關專家，成為競選落敗中唯一嘅大贏家。
肥仔喺2018年就利用佢係官府打滾累積落嚟嘅名氣去搵真銀，開咗兩間公關公司，專門幫一啲地產商、大型公營機構同官府部門提供公關宣傳策略服務。公關界老友話，其中一間叫「So行街壹號」，開幕嗰日肥仔搵咗大掌櫃幫佢撑場，一般人亦以為大掌櫃喺官場嘅強勁人脈好勁，覺得佢好掂囉。所以肥仔呢幾年接咗唔少建制同官府嘅項目，收入以千萬計，佢仲利用呢啲好似同官場良好關係嘅背景，向大機構開出高昂價單，如魚得水，撈到風生水起。
零零發唔係眼紅肥仔發達，我只係睇唔過眼有人一方面搵官府錢，但另一方面又同班黃人眉來眼去。其實肥仔本身係根正苗黃，做記者嘅時候已經去過由「路邊社」搭路去英角一等學府深造；佢間公司係2019 年亦曾經係街上派發自家制襟章，印上「反抗」、「不離不棄」嘅字句，聲稱要為黃人打氣，實則抬高自己身價，結果係「精人派襟章，信眾入監倉」。
而係暴徒佔據「哩大」時，佢更一連三日去支援班暴徒。而肥仔亦同唔少反中亂港頭目係老友，當中包括潛逃去咗台灣嘅審犯暉。黑暴時，呢個阿審不斷發文支持黑暴，仲搵埋肥仔去同中學生講「學生的時代革命」⋯⋯唔單止咁呀，肥仔間公司「So 行街壹號」入面其中一個董事，係前生果日報編輯盧生。呢個盧生同時亦都係另一間廣告公司嘅話事人，係2019 年嘅時候，佢幫一間日式牛肉飯店度咗個廣告，用「獅子狗」( 意思係處理連儂牆貼紙嘅警察）嚟影射警察，引發公關災難，連累客仔日式牛肉飯店要公開道歉。
肥仔除咗喺「黃家班」之外，有政界老友講，其實佢嘅公關策略都好值得商榷，佢好多時都無真正幫到嗰客戶得到最大利益，但啲吸睛搶fo嘅橋，就令人覺得佢好似好掂，其實睇番佢同大掌櫃助選嘅實際果效就知喇，都係「自己威晒，老細瓜咗」！但係公關呢行，至緊要吹得，吹到個客信，肯俾錢，完咗事得唔得都無人記得，只要嗰客唔公開投訴咪得囉，好多時做咗老襯嘅人都未必會投訴嘅，否則咪證明自己蠢咗。
不過，有一樣好危險嘅嘢我一定要提醒吓大家，就係佢哋經常潛藏咗好多「對抗阿爺、與黃共舞」嘅點子係客戶嘅方案入面，所以大家有機會「死咗」都唔知咩事！當然你可能會話我上綱上線，但寧可信其有，不可信其無，因為佢哋收咗錢之後就只會喺度剝花生，一切後果係要自己承擔㗎！好似係當年大掌櫃選舉前揀咗係中環愛丁堡廣場舉行選舉市集，竟然話：「兩年半前佔中就喺係而家愛丁堡廣場旁邊嘅龍和道同干諾道中附近發生，希望今晚嘅市集能夠為呢個地方賦予『更團結、更美好』的新意義。」講呢啲嘢咩意思？係咪有弦外之音？呢啲台詞邊個幫大掌櫃度、邊個幫佢把關㗎？講完呢啲嘢，阿爺又點會搵大掌櫃做第一話事人呢？幕後「功臣」唔好有like就認叻，出事就話唔關身自己事喎！
肥仔一路食住當年係官府蓄落嘅mileages，籠絡以前官府嘅同事，打友情牌伺機搵生意。而佢本身又喺有黃人嘅血統，同時能夠遊走於建制與反官府派系之中，食盡兩家茶禮。所以我唔係好明點解咁多官府部門或公營機構會俾生意肥仔，其實無論係政策推廣又好、拆彈又好，少不免都要將好多內部資訊、甚至同佢講自己嘅短板，呢啲咁敏感嘅資料，相信好多黃人都好有興趣知㗎喎！以前你哋就話唔知道，咁而家我爆埋料出嚟，唔好再扮唔知喇，如果唔係出咗事，入I C U都救唔返呀！
鍾情局．零零發
鍾情局
** 博客文章文責自負,不代表本公司立場 **
近排有人係到講所謂「大和解」，建議政府放生嗰啲因為2019黑暴拉咗而未被起訴嘅年輕人，為成件事劃上一個句號喎，目的係要話比全世界知，香港已經全面復常，係一個包容同多元化嘅社會，好適合營商同投資環境咁話！
呢啲人無厘頭地將刑事案件同經濟發展綑綁埋一齊， 乜放咗做錯事嘅人原來係可以令經濟好，我零零發都係第一次聽，唔通真係「換個角度，總有出路」？
仲有，要「和解」都要有仇有怨，咁而家邊個同邊個「結怨」呀？邊個同邊個「和解」呀？而家好似搞到政府同警察同班罪犯「結怨」，講到政府有責任去「和解」咁喎。喂喂喂，唔好係度輕描淡寫咁講呢啲係「怨」呀！而家係講緊有人犯罪、犯法，係要用司法程序去處理㗎 !我覺得所謂「大和解」，係喺度混淆視聽，係一個偷換概念嘅偽命題！
咁如果要「和解」，都要睇吓呢啲「和解」對象做咗咩事先得㗎，偷粒糖同偷嚿金都有分別喇！根據監警會嘅獨立調查報告，2019年中至2020年頭，香港大大話話有超個300次遊行示威，嗰段期間犯法行為簡直「包羅萬有、無法無天」，包括堵塞道路、掟汽油彈，週街放火，破壞銀行、商店同港鐵站，圍毆唔同政見嘅人，闖入大學實驗室偷危險品、化學品，偷車，試圖搶警槍，包圍警察總部、法院、立法會大樓同機場等等；係香港自1967年以來，最大規模嘅違法同暴力事件！報告又話粗略估計，有超過30間中資銀行、與內地相關或者係支持政府嘅店舖被多次破壞，超過60處政府、警署、警察宿舍同大學受到不同程度嘅損壞，有740組交通燈被打爛，55公里鐵欄被拆走（差唔多係由金鐘政府總部去屯門來回咁長）， 22000平方米 ( 成3個標準足球場咁大）嘅行人路地磚被掘起，破壞咗147個港鐵/輕鐵站，超過1000班航機被取消……仲有接近2000名警員及家屬被網上起底，有警員被咬斷手指、中箭、被淋腐蝕性液體以致全身被燒傷等等。係2019年11月，警方係「你大」搜到3989枚汽油彈（一個人每10秒掟一個汽油彈，都要差唔多掟足11個鐘先可以掟曬），1339件爆炸品、601樽腐蝕性液體同埋573件武器，包括弓箭同氣槍。而係「步大」就搜到8000多枚汽油彈……不過呢啲都只係冰山一角咋！
2019 年11 月新界東交通大癱瘓咗差唔多成個星期，「步大」內地生要警察護送去馬料水碼頭坐水警輪離開，「你大」游泳池用嚟練習掟汽油彈嘅情景仲瀝瀝在目！唔單止咁，暴徒又講好多大話去煽動群眾，一時就話警察係地鐵站內打死6個示威者 (8-31太子站殺人事件，作嘢叻到作埋具體數字)，又話警察對被扣留係新屋嶺嘅女示威者性侵 (吳傲雪事件)，又話警察用布袋彈打盲手無寸鐵示威者隻眼 (爆眼女事件) 等等……通通事後都被証實係大話連篇，目的只係想去分化社會，挑撥暴徒情緒，保持暴亂嘅勢頭！
當時嘅香港，真係好似戰場咁，不但有無辜嘅市民被人用磚掟死、被火嚴重燒傷，而且到處都被破壞。大家係媒體都睇到，暴徒好大部份都係年輕人。如果大家有留意最近宣判嘅所謂「屠龍案」，個班被告人都係廿歲出頭，有一個犯案時都只係得18 歲，佢哋計劃用炸彈「無差別」咁襲擊警察同遊行嘅市民，好彩警察及時拉曬所有人，阻止咗呢件暴力血腥事件，如果唔係，就……一鑊熟！究竟個社會有咩對佢哋唔住，點解對啲平常百姓咁深仇大恨，失去理智咁去做一啲咁殘忍嘅事，去滿足呢啲人的政治訴求呢？
提出「大和解」嘅人，當然就會話啲年輕人當時都係因為社會大環境同朋輩嘅影響，先至會做出咁暴力嘅行為啦，應該比次機會佢哋咁話。 喂， 一個人無論幾大年紀，都要為自己所做嘅事，負上唔同程度嘅責任，冇可能一句「大和解」，就當冇事發生過! 咁樣做，只會俾一個好錯誤嘅信息嗰啲正常嘅年輕人，做錯事將來又會「大和解」可以洗底架啦。對暴徒嚟講，就只係會種大咗佢哋個膽，推佢哋去死！
當時係社會有影響力嘅人、媒體、老師、社工，你哋有提醒過班年輕人唔好去犯法嗎？有啲教育、社福界嘅人仲帶班同學仔一齊去掟汽油彈⋯⋯個個著住件背心就話係記者、係急救員，刻意阻住警方行動。有啲人更加英雄化咗佢哋嘅暴行，令佢地更加亢奮同失去理智！難聽啲講，班後生仔嘅失常行為，雖然係俾「犯民」嘅所謂「違法達義」歪理害死，但係「犯民」成年人又唔say no，你哋好大責任呀！終於害到一個又一個大好青年去犯法，去放火、去掟汽油彈、去打人，但係你有冇見過呢班「犯民」嘅仔女有份出嚟搞事？人哋嘅仔女就係草，自己嗰啲就如珠如寶！
再者，法律面前人人平等㗎嘛！夠証據，律政署就會起訴被捕嘅人，不過當時黑暴立立亂，而案件又多，搜証又需時，有啲證人又著草走咗路，所以有人就早啲被告上法庭，有人就會繼續擔保住先囉！所謂「大和解」，咪即係放生啲違法暴徒? 咁咪對啲已經認咗罪，或者係已經被判刑嘅「手足」好唔公平? 而且咁樣做，亦都損害咗香港法治嘅獨立性同公平性！仲有，唔該諗嘢唔好淨係諗一邊，提出同讚成呢個「大和解」嘅人，有冇考慮過受害者同家屬? 所謂「大和解」係咪對佢哋好唔公平、對佢哋係咪二次傷害?！
我零零發覺得提出「一刀切大和解」嘅人，當日直接間接支持黑暴，如今其實係華麗轉身想去漂白黑暴，鋪定路去配合美西方話要寬大處理「生果佬」單案囉！
鍾情局．零零發
