Gin笑指新歌可以感動到人是好開心的事，但又有點覺得「唔好意思」。
Gin Lee李幸倪推出新歌《可惜我們沒有》，這亦是她今年推出四首歌中唯一的情歌。新歌由第一次合作的Gordon Flanders作曲，填詞則找來陳詠謙。歌曲道出每段感情，都需要建立和維繫，看似是基本不過的權利與義務，但當二人的關係有先天性缺憾，愛下去自會變成在失衡中角力，義務往往會幻化虛無，到頭來發現，連基本權利都從未擁有，一直欠奉。
Gin Lee推出新歌《可惜我們沒有》。
觀看相關影片按連結：https://youtu.be/R0nfMFsAVKs
雖然說是情歌，但曲風跟以往的不同，Gin坦言唱法亦有所改變，以一種全新的唱法演繹，「呢首歌寫得好凄美，加上歌詞，主要表達分手後一個好軟弱、好脆弱，亦都有一種無力感嘅一種狀態，所以我就選擇咗唔係用力去表達情緒嘅激昂，而係用一個看似冇力，但其實係好傷心，傷心到一個盡頭嘅時候，你把聲係會震，同埋會有一種無力感喺度，都需要用少少時間去揣摩呢種狀態，同《企好》嗰種狀態有一啲唔同，自己都想試吓唔同嘅表達。」
Gin指今次以一種全新的唱法演繹新歌。
問到錄音難忘事，Gin謂最特別的事就係「特別難」，「今次俾自己一個任務就係唔可以用力去表達情緒，放輕得嚟又要點樣去投放好多好多情緒，係難嘅，但係又好開心做到，就係花最多時間去揣摩呢一種嘅無力感。最終出嚟嘅感覺唔係灑狗血，但仍然係可以做到打動人心同埋揦住個感覺。有時最傷心唔係話兜頭鬧你，而係嗰種想喊但喊唔出，或者係喊晒啲眼淚嗰種極致嘅狀態，先係最痛。我當然都有經歷過啦，所以先可以唱到呢種感覺嘛。」
Gin直言今次錄音「特別難」。
新歌推出後，不少歌迷留言「聽到個心揦住揦住」、「聽兩個鐘喊足兩個鐘」，Gin笑說自己心情都十分矛盾，「首歌可以Touch到人係好開心嘅，但係又好似令到大家好傷心，有少少好似『咦⋯⋯唔好意思⋯⋯』咁樣。」
Gin對搞喊歌迷有點唔好意思。
除此之外，亦不少網民表示「Gin式情歌」回歸，Gin就覺得她的歌無論是失戀、自強等任何題材，總會帶點療癒功效，「我亦都希望當我唱出每一首歌或者俾大家聽到嘅時候，都會覺得『無論呢一刻幾辛苦幾絕望都好，唔好放棄，總有希望，繼續行啦。』我覺得我嘅歌曲都會帶住呢一種message同感覺，有一個療癒嘅力量喺度。」
Gin希望她歌歌曲都能帶着療癒的力量。
黃明德凌晨擘大眼斷片：「究竟我喺邊度？」
唱作歌手黃明德（Dark）於銅鑼灣時代廣場對出的英皇娛樂期間限定概念店0 e:ffect Concept Store，舉行的「黃明德挑戰24小時無間段Busking之得唔得㗎？」昨日（10月13日）圓滿結束。Dark由前日（12日）下午四時開始，無間斷Busking至昨日下午四時，期間更獲Gin Lee李幸倪、鄧小巧、黎展峯（Andy）、曾傲棐（Arvin）、海兒（Hedy）、EG、姜檸樂、力臻、雞翼@JFFT、Calvin Sir、傑少、KKBOX第六屆校園大使、Tim、十冰、Emiko及Charlie共十六個歌手、KOL單位來撐場。
唱作歌手黃明德（Dark）挑戰24小時無間段Busking。
當真正開始挑戰時，原來不是Dark想的那麼輕鬆！
Dark表示一知道這個挑戰的消息時，沒甚壓力，因為覺得自己還年輕，而且十五、六歲時不時都通宵打機不睡覺，亦試過連續八小時Busking，覺得「碎料」一單，但當真正開始挑戰時，原來不是那麼輕鬆，「一開頭啲時間好似過得好快，因為一個嘉賓接一個嘉賓，輕鬆啦。但去到零晨兩點打後我開始眼瞓，EG同傑少走咗之後，中間有段時間係我自己一個人，然後就係Andy。而家諗番起我同Andy嗰五個鐘嘅記憶我係冇乜，嗰陣時我喺度諗：『做緊乜嘢？我係咪發緊夢呀？究竟我喺邊度？』好似失去清醒嘅狀態。」雖然記憶模糊，但他十分感激Andy，「佢零晨五點嚟到，買咗好多嘢食俾我，好有義氣同我捱咗五個鐘，好多謝佢。」除了Andy，他亦感激壓軸來陪他渡過「最後時間」的師姐Gin，「師姐Gin特登沖蜜糖水俾我，佢親自調較溫度，真係好多謝佢，好sweet。」
獲師姐Gin Lee力撐！
Dark續說：「期間唔知係咪緊張呢，個胃開始唔舒服，胃抽筋，但真心覺得自己一定要完成佢，唔衰得，最後順利完成挑戰。亦都唔知係咪同星座有關呢，因為獅子座有「不甘心」嘅底蘊，當經埋人同我講話可以放棄時，我就喺度諗放棄都幾難睇，完成唔到唔甘心呀。我一定做到！要撐到最後。」除了胃抽筋，失聲亦令Dark十分困擾，「因為之前病咗，咳得太多失咗聲，開始呢個challenge之前啱啱好番少少，加上我平時講嘢好唔愛惜聲帶，唔去control自己去叫。經過今次之後，小巧、Hedy、Calvin sir同埋Gin，所有人都同我講：『你講少啲嘢啦、你靜啲啦。』Arvin都有留意：『其實你講嘢真係唔使咁大聲。』」亦因為失聲，他亦有一番新的領悟，「唱歌係我由細到大，唯一一樣覺得自己係good at嘅一樣嘢，但突然間冇咗，就令到我覺得就算你幾依賴，總有一日會冇，即使嗰樣嘢好似同你出生入死。」
鄧小巧
黎展峯（Andy）
Challenge的難關一一捱過，Dark謂倒數最後一小時是最興奮，「其實去到第二日最後兩、三個鍾已經開始有啲唔捨得，見到條街企滿晒人嚟支持，同埋有十幾個fans真係喺條街陪足我廿四個鐘，真係好多謝佢哋。到最後一個鐘，見到一直擺喺度嘅計時器得番『分鐘』嗰邊有數字，我係由心而發嗰種叫出嚟！終於得返五十九分鐘！最後嗰十秒大家一齊倒數，當個鐘跳到零，嗰刻真係有啲想喊出嚟，估唔到咁多人陪住我，亦都估唔到自己個感受係咁大、咁感觸。」問到完成挑戰後最想做甚麼，Dark即謂：「第一時間最想同fans影相，影完相就pack好晒啲嘢嗱嗱臨返屋企瞓覺，我好掛住屋企張床。」
曾傲棐（Arvin）
海兒（Hedy）
