新城「勁爆」獎項開始投票 張敬軒、炎明熹入圍男、女歌手

今日《新城勁爆頒獎禮 2024》7個獎項的候選名單可以投票啦！

新城廣播有限公司（新城廣播）一年一度盛事《新城勁爆頒獎禮 2024》將於12月28日下午三時假灣仔會議展覽中心Hall 5BC隆重舉行，今天（2日）下午5時起，7個獎項的候選名單正式開放給公眾投票，其中最矚目的「勁爆男/女歌手」候選名單各超過70位歌手，獎項爭持相當激烈。

一年一度《新城勁爆頒獎禮 2024》將於12月28日舉行

《新城勁爆頒獎禮 2024》公開網上投票的7個獎項分別為「勁爆男歌手」、「勁爆女歌手」、「勁爆樂隊/組合」、「新城勁爆男新人」、「新城勁爆女新人」、「新城勁爆新樂隊/組合」及「勁爆歌曲」，各獎項候選名單亦正式出爐，其中「勁爆歌曲」有218作品、「勁爆男/女歌手」分別有71位和73位、「勁爆男/女新人」有11位和12位，至於「勁爆樂隊/組合」則有26個單位，「勁爆新樂隊/組合」則有11個單位入圍。

各獎項候選名單出爐

大家快啲去投支持的歌手

新城廣播今天（2日）下午5時開放給公眾投票，當中「勁爆男歌手」方面，張敬軒和競敵林家謙雙雙入圍，力撼馮允謙、林奕匡及MIRROR 4位成員姜濤、江𤒹生、陳卓賢及柳應廷；「勁爆女歌手」則以Gin Lee李幸倪與AGA江海迦和泳兒鬥個難分難解，但有傳炎明熹（Gigi）復出在望，Gigi隨時冷手執個熱煎堆。至於在218首「勁爆歌曲」入面，陳柏宇個人包辦5首歌、林家謙有4首半歌、陳卓賢有4首、MC張天賦都有3首半，而梁釗鋒和陳健安則有3首歌，可謂叮噹碼頭。

「勁爆男歌手」方面，林家謙入圍

力撼軒公

Gin Lee係「勁爆女歌手」大熱

有傳炎明熹（Gigi）復出在望

今次頒獎禮的評分比例為公眾投票佔40%、音統會 Tier 1 (全台節目主持)+ Tier 2 (資深音樂節目主持)佔20%； Tier 3(主要成員) 佔30%；管理層佔10%，為了支持偶像，樂迷們記得盡快投票喇！而投票人士，有機會獲得總值68,000港幣的獎金及豐富獎品，詳情可瀏覽新城廣播投票網站。

著名堪輿學家李居明向《巴士的報》進行運程預測，他指2025年踏入蛇年，透過生肖分析，屬狗與屬猴人士在蛇年中運勢最旺。

李居明大師稱屬狗與屬猴人士，在蛇年當中運勢最旺。（本網記者攝）

李居明預告2025年即將踏入蛇年，而與之相沖的正是屬豬，李居明表示：「豬係咩呢？係『亥』，指我哋隻腳，所以2025年我哋每個人隻腳都會受沖，即係話如果你係經常運動呢，你要小心仆親，亦即係話好多人都會坐輪椅，或者佢本身隻腳有腳痛。」

同時，他又指：「蛇代表著四大驛馬，係代表我哋每個人都會轉工、搬屋同去旅遊。講到蛇年裡面，呢個字係可以打開一個叫『丑』嘅金庫，係代表會打開呢個庫，就係冇咁悶局，以前我哋行咗入去個墳墓，而家我哋喺個墳墓行返出嚟，呢個就係香港嘅運，所以香港明年係由個墳墓度返出嚟，咁咪幾好呢！」

（本網記者攝）

屬猴藝人：張敬軒

屬狗藝人：姚焯菲（Chantel）

李居明表示：「2025年係屬狗同屬猴排第一同排第二之外，咁多生肖裡面，其他一啲唔好嘅生肖，我哋比較低調啲講，先唔好影響咗你嘅潛意識。大家要明白喺2025年由於網絡流行，網絡世界裏面浮現好多預言，但係你永遠記住一樣嘢，就係預言始終一講咗出嚟，通常就唔係好靈驗，因為大家都記得嗰樣嘢，嗰樣嘢變成咗另外一個層次嘅一種念力，係會令到嗰樣嘢反而唔靈，所以我話俾大家聽，唔好恐懼，恐懼先至係喺2025年最大嘅瘟疫！」

他強調：「不驚不懼係2025年我哋要面對，儘管2025年可能有七星逆轉，有不幸嘅事發生，我話俾你聽殺到嚟你先食！」

要小心腳傷。

李居明最後再補充面對恐懼時，千萬不要驚慌:「唔好事前驚餐懵，如果你要逃避亦逃避唔到嘅，既然係咁，不如就喺香港呢個少少嘅地方，呢個少少嘅安樂裡應外面好好活着。你走出世界任何一個地方，戰爭、地震同海嘯，分分鐘本來你無事，你都走咗一個好危險嘅地方，咁咪仲衰，所以人呢唔好咁驚，最緊要記住一樣嘢殺到先食，千祈唔好自己呃自己，香港人而家最大嘅毛病，就係『神經衰弱症』！」

增加了轉工、搬屋同旅遊的機會。