「正X書院」執笠，相信唔少人都覺得可惜，但我覺得「正X」出事係遲早嘅事，因為呢個根本係一個儲心積累嘅騙局⋯⋯不如先同大家倒帶睇吓「正X」彈起之路。
「正X會」創辦人林X勝當年係裝修佬，係1985成立咗個會之後一直名不經傳，直至1998 年生咗個仔叫「正X書院」，搵咗鬍鬚佬陳X桌做校長，提供戒毒同中學課程俾班濫藥嘅學生先至有人識。鬍鬚佬成功打造「正X書院」形象工程，所以吸金力超強。但人一有錢就多嘢諗，喺2009年「正X」就被踼爆攞錢嚮海外投資，又被指係內地經營色情場所，當年老廉有請佢哋去飲咖啡，但係之後就不了了之。
當年被老廉查完後，大難不死又過到板，更加壯大咗裝修佬同鬍鬚佬個膽， 於是2020年鬍鬚佬嗌曬救命話書院冇錢，叫人捐款；短短喺三個月內就已經籌咗 4500萬。直至年初警察拉佐「正X會」啲大佬串謀詐騙，充滿愛心既香港人先知道，原來裝修佬同鬍鬚佬已經靜雞雞轉移超過5000萬港元去海外，仲話個戶口俾政府凍結咗，所以佢地俾唔到錢「正X書院」咁話喎！
騙局有好多種，有騙財，有騙色，最乞人憎係騙人嘅善心。為咗唔好畀人利用大家嘅善心，而家等我拆解一吓呢個騙局嘅手法。
第一招 放魚餌搏同情
所有騙局都用類近嘅套路，想人上釣首先就係搵啱魚餌，好明顯「正X書院」就係睇中一班濫藥青少年，搵佢哋做魚餌，引起人關注搏同情。
第二招 魚目混珠
相信絕大部分香港人都凈係知「正X書院」，鬼識「正X會」咩。2009年老廉案後，鬍鬚佬開記招誓神擘願話將「正X會」同「正X書院」嘅營運同帳目分開處埋。佢係2020年眾籌嘅時侯，話啲善款會全部用係「正X書院」，但又俾個「正X會」嘅戶口人哋去入錢。為乜?原來都係為方便將來走錢鋪路。
第三招 揾代言人打造形象工程
鬍鬚佬一直高調接受傳媒訪問，捧自己成為「正X」代言人，為自己、為書院打造嗰金漆招牌。2020年就用自己斗零名氣，用自己面書話幫「正X書院」籌錢，好明顯就係去掠水，加埋當時黑暴嘅社會氛圍，眾籌已成為潮流，呢兩個騙徒就乘機食住條水搵大錢！
第四招 賣慘
想要釣大魚就要加碼放多啲魚餌。「正X會」不嬲都水頭充足，但2019年「正X會」離奇地撥好小錢俾「正X書院」，平均由每年百幾萬，得番30幾萬，好明顯係製造財困假象，點解咁做? 唔係咁，點可以用個仔嘅慘情去呃善款！
第五招 揾籍口 搬錢鬆人
2020年短短喺三個月內就已經籌咗 4500萬，大部份錢入咗去阿媽戶口「正X會」，實質用喺書院嘅不足一成。事發之後，鬍鬚佬竟然大玩財技同語言偽術，話「正X書院」欠亞媽好多錢，所以啲捐款俾咗「正X會」當還錢，咁都得？！
係2022年，「正X會」仲借咗5千幾萬(即係拎走曬啲捐款仲要攞埋老本) 去英國同美國開分會，借咁大筆錢竟然無法律文件、無借據、無還款期，仲免息㖭⋯⋯係，你無聽錯，係免息，唔係免手續費呀大佬！呢啲咁着數嘅嘢，「搵你信」兄弟嗰間財務公司都唔得喇！！點解係2022年開分會呢？點解係去英國、美國開？擺到明就係夾帶私逃啦！話時話，啲善心人捐錢比你，係想幫香港濫藥嘅年青人，你用捐款人啲錢去第二度，有冇問過佢地想唔想呀！作為一個慈善團體，又會唔會違反香港稅務條例呢？！而裝修佬同鬍鬚佬係2023年走咗去美國英國之後一直都無返過嚟 ! 另外，江湖傳聞話有個同鬍鬚佬個仔同名同姓嘅人，係2022年初用40萬鎊響英國買咗間屋，咁多巧合就唔係巧合喇！
喺度我順便揭開佢哋另外兩個謊言。首先鬍鬚佬話啲錢解唔到凍，所以令書院摺埋，其實政府早前已經喺凍結咗嘅600幾萬，酌情解凍咗200幾萬俾書院做緊急營運開支。只不過呢兩位無恥嘅騙徒凈係話辭職唔做董事，但係呢大半年都無去銀行轉戶口簽名人，所以先搞到咁麻煩。佢地咁做係咪想連戶口剩番啲錢都轉走埋？如今其實「正X會」新董事局只要主動剔除佢兩個人為戶口授權人，啲錢就可以解凍。
另一個謊言就係話「正X書院」無用政府錢。鬍鬚佬夠膽死講話從來冇收過政府資助。其實保安局(禁毒處) 係2017到2020年俾咗「正X會」成5900萬去改善學校設施，勞工署亦都係2020年分別俾咗 「正X會」88萬同55萬去「正X書院」。最離譜係佢同啲學生每人每月申請咗萬幾蚊綜援交學費，佢哋衰到教啲唔符合資格嘅家庭呃社署話放棄照顧個仔女，等佢哋都可以申請到綜！佢哋咁都可以叫做無用政府錢？每一蚊都係我哋納稅人嘅錢嚟㗎。仲有，裝修佬同鬍鬚佬都係唯一受薪董事，但從來無人知，亦都唔知佢哋出幾多錢人工，所以呢個擺明就個係一個大騙局！
喺外國風流快活嘅裝修佬同鬍鬚佬，用唔同嘅藉口阻止啲資金調返去「正X書院」，懶埋學生同書院困境，好明顯佢哋一路以嚟都只係想利用呢班學生嚟幫自己賺錢。如果佢哋真係咁清白，大可以返香港向公眾解釋吓吖！
最折墮嘅騙徒先至會呃人嘅善心，有報應架！
鍾情局．零零發
鍾情局
** 博客文章文責自負,不代表本公司立場 **
近排有人係到講所謂「大和解」，建議政府放生嗰啲因為2019黑暴拉咗而未被起訴嘅年輕人，為成件事劃上一個句號喎，目的係要話比全世界知，香港已經全面復常，係一個包容同多元化嘅社會，好適合營商同投資環境咁話！
呢啲人無厘頭地將刑事案件同經濟發展綑綁埋一齊， 乜放咗做錯事嘅人原來係可以令經濟好，我零零發都係第一次聽，唔通真係「換個角度，總有出路」？
仲有，要「和解」都要有仇有怨，咁而家邊個同邊個「結怨」呀？邊個同邊個「和解」呀？而家好似搞到政府同警察同班罪犯「結怨」，講到政府有責任去「和解」咁喎。喂喂喂，唔好係度輕描淡寫咁講呢啲係「怨」呀！而家係講緊有人犯罪、犯法，係要用司法程序去處理㗎 !我覺得所謂「大和解」，係喺度混淆視聽，係一個偷換概念嘅偽命題！
咁如果要「和解」，都要睇吓呢啲「和解」對象做咗咩事先得㗎，偷粒糖同偷嚿金都有分別喇！根據監警會嘅獨立調查報告，2019年中至2020年頭，香港大大話話有超個300次遊行示威，嗰段期間犯法行為簡直「包羅萬有、無法無天」，包括堵塞道路、掟汽油彈，週街放火，破壞銀行、商店同港鐵站，圍毆唔同政見嘅人，闖入大學實驗室偷危險品、化學品，偷車，試圖搶警槍，包圍警察總部、法院、立法會大樓同機場等等；係香港自1967年以來，最大規模嘅違法同暴力事件！報告又話粗略估計，有超過30間中資銀行、與內地相關或者係支持政府嘅店舖被多次破壞，超過60處政府、警署、警察宿舍同大學受到不同程度嘅損壞，有740組交通燈被打爛，55公里鐵欄被拆走（差唔多係由金鐘政府總部去屯門來回咁長）， 22000平方米 ( 成3個標準足球場咁大）嘅行人路地磚被掘起，破壞咗147個港鐵/輕鐵站，超過1000班航機被取消……仲有接近2000名警員及家屬被網上起底，有警員被咬斷手指、中箭、被淋腐蝕性液體以致全身被燒傷等等。係2019年11月，警方係「你大」搜到3989枚汽油彈（一個人每10秒掟一個汽油彈，都要差唔多掟足11個鐘先可以掟曬），1339件爆炸品、601樽腐蝕性液體同埋573件武器，包括弓箭同氣槍。而係「步大」就搜到8000多枚汽油彈……不過呢啲都只係冰山一角咋！
2019 年11 月新界東交通大癱瘓咗差唔多成個星期，「步大」內地生要警察護送去馬料水碼頭坐水警輪離開，「你大」游泳池用嚟練習掟汽油彈嘅情景仲瀝瀝在目！唔單止咁，暴徒又講好多大話去煽動群眾，一時就話警察係地鐵站內打死6個示威者 (8-31太子站殺人事件，作嘢叻到作埋具體數字)，又話警察對被扣留係新屋嶺嘅女示威者性侵 (吳傲雪事件)，又話警察用布袋彈打盲手無寸鐵示威者隻眼 (爆眼女事件) 等等……通通事後都被証實係大話連篇，目的只係想去分化社會，挑撥暴徒情緒，保持暴亂嘅勢頭！
當時嘅香港，真係好似戰場咁，不但有無辜嘅市民被人用磚掟死、被火嚴重燒傷，而且到處都被破壞。大家係媒體都睇到，暴徒好大部份都係年輕人。如果大家有留意最近宣判嘅所謂「屠龍案」，個班被告人都係廿歲出頭，有一個犯案時都只係得18 歲，佢哋計劃用炸彈「無差別」咁襲擊警察同遊行嘅市民，好彩警察及時拉曬所有人，阻止咗呢件暴力血腥事件，如果唔係，就……一鑊熟！究竟個社會有咩對佢哋唔住，點解對啲平常百姓咁深仇大恨，失去理智咁去做一啲咁殘忍嘅事，去滿足呢啲人的政治訴求呢？
提出「大和解」嘅人，當然就會話啲年輕人當時都係因為社會大環境同朋輩嘅影響，先至會做出咁暴力嘅行為啦，應該比次機會佢哋咁話。 喂， 一個人無論幾大年紀，都要為自己所做嘅事，負上唔同程度嘅責任，冇可能一句「大和解」，就當冇事發生過! 咁樣做，只會俾一個好錯誤嘅信息嗰啲正常嘅年輕人，做錯事將來又會「大和解」可以洗底架啦。對暴徒嚟講，就只係會種大咗佢哋個膽，推佢哋去死！
當時係社會有影響力嘅人、媒體、老師、社工，你哋有提醒過班年輕人唔好去犯法嗎？有啲教育、社福界嘅人仲帶班同學仔一齊去掟汽油彈⋯⋯個個著住件背心就話係記者、係急救員，刻意阻住警方行動。有啲人更加英雄化咗佢哋嘅暴行，令佢地更加亢奮同失去理智！難聽啲講，班後生仔嘅失常行為，雖然係俾「犯民」嘅所謂「違法達義」歪理害死，但係「犯民」成年人又唔say no，你哋好大責任呀！終於害到一個又一個大好青年去犯法，去放火、去掟汽油彈、去打人，但係你有冇見過呢班「犯民」嘅仔女有份出嚟搞事？人哋嘅仔女就係草，自己嗰啲就如珠如寶！
再者，法律面前人人平等㗎嘛！夠証據，律政署就會起訴被捕嘅人，不過當時黑暴立立亂，而案件又多，搜証又需時，有啲證人又著草走咗路，所以有人就早啲被告上法庭，有人就會繼續擔保住先囉！所謂「大和解」，咪即係放生啲違法暴徒? 咁咪對啲已經認咗罪，或者係已經被判刑嘅「手足」好唔公平? 而且咁樣做，亦都損害咗香港法治嘅獨立性同公平性！仲有，唔該諗嘢唔好淨係諗一邊，提出同讚成呢個「大和解」嘅人，有冇考慮過受害者同家屬? 所謂「大和解」係咪對佢哋好唔公平、對佢哋係咪二次傷害?！
我零零發覺得提出「一刀切大和解」嘅人，當日直接間接支持黑暴，如今其實係華麗轉身想去漂白黑暴，鋪定路去配合美西方話要寬大處理「生果佬」單案囉！
鍾情局．零零發
