最近鬧人鬧得多，今次想講番啲勵志好事，提醒番一啲黑暴期間行錯路嘅年輕人，只要唔放棄，仲有美麗人生等緊你！
今次要講係2019年10月1日係荃灣暴動受槍傷嘅健仔。 佢被警察拉咗，保釋之後一直匿埋，直至2022年7月係西貢準備偷渡時先俾警察拉番。佢舊年10月係區域法院就暴動、襲警同潛逃嘅控罪認罪，一共被判監47個月。健仔過去幾年，付出嘅代價實在太大，不過好彩得到好多有心人嘅幫助同鼓勵，加上自己深切反省同努力，佢人生開始見到曙光。
2019年案發時健仔只得18歲，係一名中五學生，佢判刑後接受三色台訪問，話受到當時社會氛圍影響，懵盛盛，咁就人衝佢又衝，終於鑄成大錯。我想當日咁嘅氛圍，其實係一批心腸歹毒嘅黃友，日積月累搞出來。佢哋不斷煽動年青人嘅情緒，等後生仔做炮灰，搞亂香港！
唔好以為班黃友真係民主鬥士，其實佢哋都係貪生怕死、搵著數嘅人。佢哋睇中健仔好純真嘅諗法，以為美角真係為香港好、為佢好，咁就輕輕鬆鬆呃咗健仔10萬蚊，話美角會安排佢離開咁話。咪儍喇，健仔唔出名又冇利用價值，美角又點會幫佢走佬喎！黃友見健仔咁易呃，於是又叫健仔拍片衆籌，叫大家幫補下生活費...... 嗱，咁又成功呃咗幾百萬落袋，但一毫子都無俾過健仔。最後覺得健仔再無利用價值，又嫌佢佗手褦腳，於是就呃佢去西貢話可以上船偷渡走，轉頭就報寸話俾警察知。健仔同幾個儍仔去到碼頭，一隻舢舨都見唔到，就咁一網成擒!
健仔唔單止俾人呃錢，佢着草嗰兩年幾簡直係「非人生活」真人show ! 匿藏期間比人當貨咁運嚟運去，有一次被放入紙皮箱，封實曬剩係留小小位透氣，差啲焗死！佢同其他逃犯一齊匿埋係工廈同一啲蚊型嘅住宅單位，為咗避開人注意，夜晚都唔準開燈，漆黑一片，地方污糟邋遢到令人作嘔，而接濟物資一星期只得一次，冇啖好食之餘又食唔飽，點知幾個月之後，連食物都無送上去，佢哋唯有偷偷哋用僅餘嘅錢，提心吊膽咁出街買嘢食，可以想像到有幾大壓力，後來好多個都有抑鬱病㖭！
老友話健仔係西貢被拘捕嗰陣，又乾又瘦、長髮披肩，成個貞子咁，個樣殘到連負責調查嘅探員都認佢唔出！佢成兩年都無食過熱飯，同埋都唔知餓咗幾多日，所以一見到個犯人飯盒，就即刻雙眼發光，狼吞虎嚥，九秒九就將成盒飯食曬！
一個大好青年，當時生命中應該只有返學、玩、拍拖同打機，點解要有咁痛苦的經歷呢？！健仔當初俾人慫恿擺佈，由一個普通嘅中學生，變成激進嘅暴徒，受過槍傷，差啲連條命都冇埋，再經歷兩年幾匿藏嘅生活，以為有人幫，其實係俾人搵老襯！呢啲都係黃人同政棍做嘅「好」 事，食咗你嘅錢，重利用埋你去呃其他人嘅錢！跟住就「賣豬仔」咁交俾警察執手尾! 呢個完全係黃人經常講嘅: 好似condom 咁，用完即棄，可悲！
健仔最後選擇認罪，誠心悔過，反而可以坦蕩蕩去面對將來！佢今年報考咗3科D S E，考到11分嘅合格成績。健仔只得中五學歷，今次不但越級挑戰，而且仲要係監倉嘅環境下讀書，我地坐冷氣房嘅都未必堅持到喇！所以除咗佢自己，所有人都喜出望外，不過佢對自己有要求都係件好事。健仔話第時想做社工，雖然有呢啲案底未必可以做到註冊社工，但佢話就算做唔到社工，只要幫到人，其實都唔局限做社工工作。嘩，好有正向思維呀! 邊個會諗到當年嘅「暴徒」，今日會有所覺醒，搵番自己，但遲到總好過冇到。 健仔而家都係啱啱起步，仲要面對好多挑戰，希望佢繼續堅持落去。
其實2019年黑暴，點止健仔一個有咁嘅經歷， 呢一場黑暴，簡直係世紀大騙案喇！
鍾情局．零零發
鍾情局
** 博客文章文責自負,不代表本公司立場 **
近排有人係到講所謂「大和解」，建議政府放生嗰啲因為2019黑暴拉咗而未被起訴嘅年輕人，為成件事劃上一個句號喎，目的係要話比全世界知，香港已經全面復常，係一個包容同多元化嘅社會，好適合營商同投資環境咁話！
呢啲人無厘頭地將刑事案件同經濟發展綑綁埋一齊， 乜放咗做錯事嘅人原來係可以令經濟好，我零零發都係第一次聽，唔通真係「換個角度，總有出路」？
仲有，要「和解」都要有仇有怨，咁而家邊個同邊個「結怨」呀？邊個同邊個「和解」呀？而家好似搞到政府同警察同班罪犯「結怨」，講到政府有責任去「和解」咁喎。喂喂喂，唔好係度輕描淡寫咁講呢啲係「怨」呀！而家係講緊有人犯罪、犯法，係要用司法程序去處理㗎 !我覺得所謂「大和解」，係喺度混淆視聽，係一個偷換概念嘅偽命題！
咁如果要「和解」，都要睇吓呢啲「和解」對象做咗咩事先得㗎，偷粒糖同偷嚿金都有分別喇！根據監警會嘅獨立調查報告，2019年中至2020年頭，香港大大話話有超個300次遊行示威，嗰段期間犯法行為簡直「包羅萬有、無法無天」，包括堵塞道路、掟汽油彈，週街放火，破壞銀行、商店同港鐵站，圍毆唔同政見嘅人，闖入大學實驗室偷危險品、化學品，偷車，試圖搶警槍，包圍警察總部、法院、立法會大樓同機場等等；係香港自1967年以來，最大規模嘅違法同暴力事件！報告又話粗略估計，有超過30間中資銀行、與內地相關或者係支持政府嘅店舖被多次破壞，超過60處政府、警署、警察宿舍同大學受到不同程度嘅損壞，有740組交通燈被打爛，55公里鐵欄被拆走（差唔多係由金鐘政府總部去屯門來回咁長）， 22000平方米 ( 成3個標準足球場咁大）嘅行人路地磚被掘起，破壞咗147個港鐵/輕鐵站，超過1000班航機被取消……仲有接近2000名警員及家屬被網上起底，有警員被咬斷手指、中箭、被淋腐蝕性液體以致全身被燒傷等等。係2019年11月，警方係「你大」搜到3989枚汽油彈（一個人每10秒掟一個汽油彈，都要差唔多掟足11個鐘先可以掟曬），1339件爆炸品、601樽腐蝕性液體同埋573件武器，包括弓箭同氣槍。而係「步大」就搜到8000多枚汽油彈……不過呢啲都只係冰山一角咋！
2019 年11 月新界東交通大癱瘓咗差唔多成個星期，「步大」內地生要警察護送去馬料水碼頭坐水警輪離開，「你大」游泳池用嚟練習掟汽油彈嘅情景仲瀝瀝在目！唔單止咁，暴徒又講好多大話去煽動群眾，一時就話警察係地鐵站內打死6個示威者 (8-31太子站殺人事件，作嘢叻到作埋具體數字)，又話警察對被扣留係新屋嶺嘅女示威者性侵 (吳傲雪事件)，又話警察用布袋彈打盲手無寸鐵示威者隻眼 (爆眼女事件) 等等……通通事後都被証實係大話連篇，目的只係想去分化社會，挑撥暴徒情緒，保持暴亂嘅勢頭！
當時嘅香港，真係好似戰場咁，不但有無辜嘅市民被人用磚掟死、被火嚴重燒傷，而且到處都被破壞。大家係媒體都睇到，暴徒好大部份都係年輕人。如果大家有留意最近宣判嘅所謂「屠龍案」，個班被告人都係廿歲出頭，有一個犯案時都只係得18 歲，佢哋計劃用炸彈「無差別」咁襲擊警察同遊行嘅市民，好彩警察及時拉曬所有人，阻止咗呢件暴力血腥事件，如果唔係，就……一鑊熟！究竟個社會有咩對佢哋唔住，點解對啲平常百姓咁深仇大恨，失去理智咁去做一啲咁殘忍嘅事，去滿足呢啲人的政治訴求呢？
提出「大和解」嘅人，當然就會話啲年輕人當時都係因為社會大環境同朋輩嘅影響，先至會做出咁暴力嘅行為啦，應該比次機會佢哋咁話。 喂， 一個人無論幾大年紀，都要為自己所做嘅事，負上唔同程度嘅責任，冇可能一句「大和解」，就當冇事發生過! 咁樣做，只會俾一個好錯誤嘅信息嗰啲正常嘅年輕人，做錯事將來又會「大和解」可以洗底架啦。對暴徒嚟講，就只係會種大咗佢哋個膽，推佢哋去死！
當時係社會有影響力嘅人、媒體、老師、社工，你哋有提醒過班年輕人唔好去犯法嗎？有啲教育、社福界嘅人仲帶班同學仔一齊去掟汽油彈⋯⋯個個著住件背心就話係記者、係急救員，刻意阻住警方行動。有啲人更加英雄化咗佢哋嘅暴行，令佢地更加亢奮同失去理智！難聽啲講，班後生仔嘅失常行為，雖然係俾「犯民」嘅所謂「違法達義」歪理害死，但係「犯民」成年人又唔say no，你哋好大責任呀！終於害到一個又一個大好青年去犯法，去放火、去掟汽油彈、去打人，但係你有冇見過呢班「犯民」嘅仔女有份出嚟搞事？人哋嘅仔女就係草，自己嗰啲就如珠如寶！
再者，法律面前人人平等㗎嘛！夠証據，律政署就會起訴被捕嘅人，不過當時黑暴立立亂，而案件又多，搜証又需時，有啲證人又著草走咗路，所以有人就早啲被告上法庭，有人就會繼續擔保住先囉！所謂「大和解」，咪即係放生啲違法暴徒? 咁咪對啲已經認咗罪，或者係已經被判刑嘅「手足」好唔公平? 而且咁樣做，亦都損害咗香港法治嘅獨立性同公平性！仲有，唔該諗嘢唔好淨係諗一邊，提出同讚成呢個「大和解」嘅人，有冇考慮過受害者同家屬? 所謂「大和解」係咪對佢哋好唔公平、對佢哋係咪二次傷害?！
我零零發覺得提出「一刀切大和解」嘅人，當日直接間接支持黑暴，如今其實係華麗轉身想去漂白黑暴，鋪定路去配合美西方話要寬大處理「生果佬」單案囉！
鍾情局．零零發
