早幾年好多人吹捧所謂「黃色經濟圈」、諗住搵手足錢好易，於是好多人搏曬懵搞唔同嘅生意嚟掠水，餐廳、精品店、時裝店、髪型屋……個個以為貼隻豬頭（當年黃友icon)貼紙係門口就會有手足幫襯、財源滾滾。做生意、創業本來都應該鼓勵，開黃店都係一條橋，但唔好諗住有手足撐，唔使做就有錢落袋先得㗎，搵手足笨就唔好啦! 最後眼見好多黃店開咗一陣就拍烏蠅，無幾耐就摺埋，總有經營得差的原因。
最近有人喺網上爆黃網媒「Channel Si」陷入財困，拖欠員工薪金……唉，呢間又唔知可以捱幾耐呢？
話說2012年嘅時候「毒果」同「臘腸」兩大黃媒相繼摺埋，咁網購超市老闆陳仲泥咪諗住趁機開檔網媒，希望成為傳媒龍頭大佬，佢請咗好多「毒果」同「臘腸」嘅舊手足，同埋成功搵到「有心人」泵水，攪咗間「Channel Si」，實行搵真銀。
用得毒果，臘腸嘅班底，大家都應該估到「Channel Si」嘅風格⋯⋯佢完全繼承兩份毒媒一貫嘅報導手法，不時會係報導、短片內容加入煽動仇恨、揶揄政府嘅元素，甚至有涉及黑社會暴力成份嘅「江湖速報」，好似幫黑幫出號外咁。
有網民係社交平台指控「Channel Si」係未經同意下，擅自盜用咗佢上載係社交平台嘅圖片，我零零發硏究過上文下理，覺得偷圖事件指控未必完全成立，但如果想做一間有公信力嘅網媒，就唔應該俾個小編係呢件事上亂咁嗡，出帖文去串爆網民，例如：「你出糧俾我咩? 點解你有資格管我呢樣嗰樣⋯⋯」。佢哋咁樣態度引起好多黃絲手足不滿，紛紛Unfollow。
「Channel Si 」無論間機構嘅作風同僱員嘅行為都好值得商榷，但係平時郁啲都出嚟也文也武嘅「記怯」，至少聽到話欠薪都要發吓聲明，表示關注嘛。但對住「Channel Si」 就粒聲都唔出，咩原因呢？
而「Channel Si」 呢幾年財政都好似好有問題，頻頻告急，可能因為外部水源收緊咗，所以早排咪喺到嗌曬救命話資金只夠維持一個月嘅營運，叫黃絲手足多啲訂閱課金。
你估手足真喺好有米，同你有情有義唔割蓆咩？所以靠手足幫手都唔係好掂，而聽聞老板陳仲泥出面生意都麻麻哋，俾人貼大字報追債，是否真有其事尚待求證，但「Channel Si」 就傳出炒記者減輕皮費。最近網上又流傳「Channel Si」已經拖欠一部分員工超過3個月嘅糧……唉，如果屬實，真係有汗出、無糧出。
睇到呢度，可能好多人都會好奇，「Channel Si」財困欠薪一事都傳咗好幾個月，仲搞到啲員工要自己走上勞工處求助，點解成日口口聲聲話捍衛業界權益嘅「記怯」一直都無開過聲，更莫講話企出嚟幫「Channel Si」班員工追返啲欠薪。老友話原來「Channel Si」其中一個管理層，就係「記怯」前主席陳X昇，聽聞佢叫「記怯」班「新莊」幫幫手，隻眼開隻眼閉，唔好呱呱嘈發大件事，等「大家來忘掉錯對，為大局欠薪日子總要面對！」
線人又爆料話，「Channel Si｣之前咁樣打鑼打鼓賣慘，都成功搵到金主同手足度水，仲夾夾埋埋有成千幾萬；喂，大嗱嗱咁多錢去咗邊？點解仲冇糧出？係咪有人中飽私囊？抑或係有人十個煲九個蓋，左冚右冚?
線人仲話陳X昇對外就叫人高抬貴手，唔好搞到自己東家; 對內就扮晒大佬、扮精神領袖，呼籲公司員工同公司共渡時艱，仲慫恿員工可以用盡政府資源，去搵勞工處幫手，申請政府破欠基金，由政府承擔公司責任，實行做縮骨精計到盡﹗如果佢真係大佬，就拎自己份糧分俾大家，咁我就真係話你有義氣喇！
點解陳X昇咁落力維護「Channel Si」呢？唔通檔嘢佢有份？其實陳X昇加入「Channel Si」之前，喺「臘腸新聞」副採訪主任，佢當年都係靠黑暴嘅時候玩警察出咗位啫⋯⋯所以「臘腸新聞」執笠之後，「Channel Si」老細陳仲泥咪重金禮聘陳加盟，可能諗住用佢所謂嘅號召力，去招攬兩份毒媒嘅員工加入，做香港黃媒領頭羊，吸盡黃兄黑弟嘅水……如果「Channel Si」收檔，佢都無乜運行，所以一句到尾，死都要頂，都係錢作怪！
去到今時今日，唔少黃人手足都感覺到「Channel Si」有問題，剩係識不停賣慘叫大家課金，講好禮待傳媒手足，變成業界笑話。而聲稱維護業界權益嘅「記怯」又係度詐儍扮懵、扮唔知，一句譴責無良僱主嘅說話都無講過。呢個「記怯」對嗰啲無名無姓、話俾人跟蹤騷擾嘅人就開曬記招亂咁吠，但對呢啲有名有姓被剝削嘅新聞從業員就理都唔理，究竟呢個「記怯」做乜㗎？新聞價值又唔捍衛、新聞從業員嘅褔祉又拋諸腦後，難怪有手足感嘆留言:「人血饅頭，人有我有，有食唔食，罪大惡極」。
橫睇掂睇，呢間「Channel Si」無論係新聞操守、營商道德都好有問題，大家唔好真係當佢係一間報導事實、求真、求準嘅新聞機構；佢只不過係一盤生意。以我零零發嘅經驗睇，佢隨時都會爆煲，希望大家唔好成為「輸得好」健身美容中心嘅翻版苦主。
鍾情局．零零發
鍾情局
** 博客文章文責自負,不代表本公司立場 **
香港呢個咁細嘅地方，山多平地少，所以開埠以嚟都係靠開山斬樹同填海嘅方法，去增加土地供應。
英角人喺霸咗香港之後嘅第2年，即係1842 年就開始係香港填海。比較番當年同而家嘅版圖，就會發現係香港島，由上環到維多利亞公園、東區走廊，九島半島嘅尖沙咀、土瓜灣、紅磡、舊啟德機場、美孚，以至新界嘅荃灣同大嶼山赤鱲角機場嘅土地，其實都係由填海得番嚟㗎！其實大家都要正面啲去睇填海工程，只要適當地運用，配合民生同經濟需要，係可以雙贏嘅！
但係唔知點解回歸之後，填海就被妖魔化⋯⋯ 其實自從1842嗰年開始，香港嘅海岸線就已經唔係「千載不變」喇，英角人在的時候，海岸線天天變; 唔知點解英角人敗走之後，海岸線就突然變得不知幾咁重要，要永恒不變。綜合所有江湖傳聞，成件事有好多個巧合，但以我零零發嘅經驗睇，咁多個巧合就應該唔係巧合，不如大家一齊硏究下！
話說有位好孝順嘅隨大狀，知道阿媽住喺海邊嘅靚樓，有日由屋企望出窗口，見到西九龍美麗嘅港灣，竟然有填海工程，搞到好唔開心。孝順大狀為咗保護阿媽好喜歡嘅美麗海岸線，佢搵咗好多猛人，喺1995年成立咗「保護海岸協會」，利用呢個平台，去反對政府嘅填海計劃。
而「保護海岸協會」入面有個好勁嘅環保人士叫六公主，佢係1996年11月以私人議員條例嘅形式，提出咗一條《保護海港條例》，係短短唔使大半年嘅時間就搞掂成條草案，仲要係回歸前一日即1997年6月30日通過。咁順、咁快、咁橋嘅？在英角人自己掌管香港的年代，點會俾你提乜嘢私人議員條例草案，唔郁你就奇。到英角人自己要走啦，話唔定仲鼓勵六公主上馬，反而搞死特區，咪證明英角人英明神武，只有佢哋管得掂香港囉。
呢位六公主大有來頭，除咗喺「保護海岸協會」嘅領軍人物之外，佢仲創立咗一個智庫叫「C會」，聽聞呢間智庫早期就已經有「美角角祭民主研究院」同「美角各家民主基金會」嘅財政資助，大家都知呢兩個美角組織，不嬲都好積極幫世界各地推行所謂「民主運動」，咁大家明喇！
至於現任「保護海岸協會」主席六公子，佢背景都唔少嘢，佢除咗喺六公主嘅遠房親戚(唔係親細佬)之外，江湖傳聞話六公子嘅家族同隨大狀的哎吔阿媽都有關係。
至於「保護海岸協會」個顧問斑馬紋，多年嚟靠反政府都幫佢撈到唔少政治油水。而最吊詭係呢個隨大狀同斑馬紋都係用個會的名義，加入成為官府「海岸事務委員會」嘅成員，佢哋好多時都利用呢個公職嚟反對政府對海岸線嘅發展！我零零發有時覺得政府太大方，有少少買錘仔嚟揼自己隻腳嘅味道！
講番回歸前通過嘅《保護海港條例》，只得4條條文，主要係話唔可以係維港範圍內進行填海工程，如果要填海，就必須證明個工程有「凌駕性公眾需要」，同埋要有「具有力和令人信服的資料」，門檻相當高。
過去有好多海港改善工程都難免觸及《條例》下填海嘅定義，受制於「不可填海推定」同埋「凌駕性公眾需要」測試，所以就算呢啲工程有必要性或者受市民歡迎，但係咪屬於「凌駕性公眾需要」就好難講，而且要動用大量資源去符合高門檻嘅「凌駕性公眾需要」測試，亦都唔符合比例。所以好多工程都被逼擺埋一邊，例如：堅尼地城新海旁增設嘅行人板道、重新發展嘅啟德前跑道舊碼頭、九龍城汽車渡輪碼頭等等。
所以上年政府提出修例，建議清楚規定係咩情況下可以推翻「不可填海推定」，同埋引入新法定程序，俾公眾就填海係咪符合「凌駕性公眾需要」測試提出意見，然後等行政長官會同行政會議決定嗰個項目係咪可以繼續。咁樣做，大規模填海工程嘅規管就會更嚴謹同規範化，至於啲小型工程又引入咗較簡單嘅機制，等啲司長級官員可以去審批。嗰啲有利民生小修小補工程，好似上岸堤階、碼頭、行人板道咁，就可以嗱嗱聲開工喇！
簡單啲講，政府修例既保持維港範圍不填海造地嘅精神，又可以更好咁履行責任，有咩唔好呢？
不過嗰個「保護海岸協會」就話，雖然佢哋唔反對小型海港改善工程嘅修例建議，但係唔認同由行政長官同埋行政會議去評估大型填海工程係咪符合「凌駕性公眾需要」；佢哋話過往條例規定每次大型填海需要交由法庭處理，但而家修訂後嘅程序會跳過法庭，質疑政府取締咗法庭嘅權力喎！
其實佢哋嘅講法都幾無厘頭，因為現行條例都無話要由法庭審批大型填海工程。而且無論依家定將來，評估大型填海係咪有「凌駕性公眾需要」，一向都係政府嘅工作，如果市民唔滿意政府嘅決定，可以去提出司法覆核，由法庭決定係咪批准繼續進行個工程。而且政府都講咗好多次，修例唔係想喺維港進行大規模填海造地咯！
我零零發發覺，有啲人特別鍾意利用一啲修改法例嘅機會，用誇張失實嘅宣傳，將啲法例妖魔化，扭曲法律原意，去分化市民同政府，而且更加會伺機制造社會矛盾、混亂…無他嘅，因為一般市民未必有時間去解讀呢啲繁複嘅法律條文，又或者講得難聽啲，係烚一般升斗市民唔識法律，所以咪好容易俾人呃咗囉！大家都領教過 2019年「反修例」事件喇，係咪？！
所以如果大家覺得香港是你家，唔該你對每件事都要睇真啲、諗清諗楚嗰班人背後嘅目的呀！如果你睇唔明、諗唔通，咁唔該你哋見疑就即報（零零發），等我幫大家查清查楚，講清講楚！
鍾情局．零零發
