謠傳話TVB同芒果TV合力炮製《聲生不息》嚟捧紅炎明熹，呢刻霸戲哥真係有少少信。今晚炎明熹唱完容祖兒首《心淡》，佢嘅表演片段、相片、改圖、meme，充斥住社交平台，呢種震撼似乎好耐都冇見過。
《心淡》係2003年作品，徐繼宗作曲、Gary Tong編曲、Wyman填詞，係首慘到無可再慘嘅失戀歌，試問有咩慘得過「來回地獄又折返人間」? 當年嘅大熱K歌，十居其九都係情歌，而失戀歌亦佔據一個好重要位置。呢個絕對係商業計算，因為好多人失戀會約friend唱K嘛。
炎明熹係2005年出世，換句話講，《心淡》其實仲年長過佢。比自己仲要老嘅歌，正常都會有啲娘同過氣，但《心淡》唔單止冇，炎明熹唱呢個版本仲「活化」咗首歌，呢個正正係令廣東歌得以延續，甚至推向更廣同更年輕嘅受眾。
當然炎明熹都算幾幸運，剛出道就集萬千寵愛，佢獻唱《心淡》之前，本尊容祖兒仲特登同佢視像親授心得。
千禧後嘅香港樂壇，容祖兒幾乎獨領風騷，但後來有一段日子，廣東歌氣勢不及K-Pop，亦冇乜女歌星能夠撐起樂壇。炎明熹嘅冒起，能唔能夠成為下一位紅遍亞洲嘅天后，就要睇佢嘅後天努力同際遇嘞。
霸戲哥
** 博客文章文責自負,不代表本公司立場 **