ANSONBEAN鍾雪瑩孖住旅行拍廣告默契十足 碌沙漠成面沙動作場面玩上癮  

這次是Anson入行後首次往外地工作！

繼本土電影《填詞L》後，兩位電影男、女主角陳毅燊（ANSONBEAN)與鍾雪瑩的青春氣息讓不少廣告商垂青，最近二人被安信信貸客戶看中，獲邀為「安信撐你飛住玩」項目拍攝全新宣傳短片廣告，創意十足的短片設計非常生鬼，二人輕鬆走遍「世界各地」旅遊，穿和服、浸溫泉、碌沙漠、遊夜市，好玩地帶出「飛住玩」的訊息。看似世界不同地方的效果，其實是團隊悉心挑選台灣不同的景點，包括台南頂頭額沙漠、武聖夜市、台中的清境農場與溫泉飯店等。Anson笑說：「為咗保持神秘，我喺網上分享景點時就扮自己去咗日本、埃及同其他唔同地方，同粉絲開吓玩笑。其實走勻台灣咁多地方係好事嚟嘅，係好難得，不過最辛苦就係坐車嘅過程，今次體會到呢樣嘢，要學識習慣一下。」

ANSONBEAN與鍾雪瑩齊到台灣拍廣告。

走勻台北台南台中拍攝！


這次是Anson入行後首次往外地工作：「平時嘅我唔係太去旅行嘅，今次真係畀咗一次機會我去做嘢之餘都可以去玩吓，工作3日之後留咗兩日喺台北玩吓。其實頭3日工作都幾難忘，喺台灣食吓嘢、浸溫泉、去夜市，又可以摸吓啲羊，就好似去旅行順便拍吓嘢咁，一啲都唔似返緊工。」3天時間內二人要走勻台北、台南與台中拍攝，幸好他們默契十足，拍攝十分順利，Anson說：「其實拍《填詞L》時我哋只係合作過兩日，今次就多咗好多時間相處，鍾雪瑩係一個非常專業嘅演員，佢好快就入到狀態，我最欣賞係佢把聲運用得好好，作為一個演員，講嘢講得清晰、令大家聽得更舒服係好重要，我真係要好好向佢學習，希望之後有機會有唔同合作。」

碌沙漠刺激好玩。

Anson入行後首次往外地工作。

拍攝其中一幕是Anson碌沙漠的鏡頭，事前工作人員怕他受傷大為緊張，相反，Anson卻表現自若，只拍了兩次便完成，卻弄得滿面沙，他說：「有一下我比導演要求嘅碌快咗，但感覺幾刺激幾好玩，工作人員事前都有啲擔心危險，但我冇乜所謂，只要拍到出嚟效果好同靚都冇問題，歡迎嚟緊多啲博命嘅動作場面搵我啦！畢竟我都真係最鍾意動作電影。」

兩人默契十足！

拍攝十分順利。

ANSONBEAN與鍾雪瑩齊到台灣拍廣告。

ANSONBEAN首次成為美容中心代言人！

陳毅燊（ANSONBEAN）最近獲男士激光脫毛及美容中心LaserKool邀請成為首位代言人，早前拍攝一系列以「Don’t limit yourself」為主題的廣告，連紅隧口也擺放超大型廣告版，非常搶眼。首次成為美容中心代言人，ANSONBEAN份外落力，他說：「收到代言美容中心呢個消息，覺得經理人係咪搞錯咗？因為我覺得自己唔係最靚仔，之前成日都見人做美容代言，竟然自己可以做到，所以我真係好開心同好榮幸。」廣告中ANSONBEAN以多個造型出現，其中穿黑色裝look非常有型，他說：「除咗西裝造型感覺classy，都有着背心，有少少sexy嘅新鮮感，平時都有健身練肌肉，但今次就用咗個幾特別嘅方法，我教練教我拍攝前一日唔飲水，到拍攝當日食咗一個黑森林蛋糕，令到糖分上升，肌肉脹大，出到嚟都好滿意。」

陳毅燊（ANSONBEAN）獲男士激光脫毛及美容中心LaserKool邀請成為首位代言人。

貪靚並不是女生的專利，ANSONBEAN非常認同，他認為男女也可以貪靚，「無可否認人好多時都係睇第一印象，每個人都有唔同方法令自己更加有自信，例如化妝、set頭，男仔同女仔都一樣，都要照顧好自己嘅外表，令到自己更加有自信、更加有準備同尊重場合。我有啲位會比女仔貪靚架，不過我知道唔可以依賴，我而家都鍛鍊緊自己，唔可以因為唔靚就缺乏自信，希望自己能夠着睡衣都可以落街，有自信地面對大家。」

在廣告中ANSONBEAN以多個造型出現。

黑色裝look非常有型！

ANSONBEAN認為身體健康是漂亮的來源，還提醒男士脫毛的重要：「身體健康係最重要，其實男士脫毛都係好好嘅護理心得！儀容上美觀好多，男士都要學識修理自己嘅毛髮。而廣告主題『Don’t limit yourself』都係我人生座右銘之一，我聽到呢個主題都覺得好有共鳴，我覺得人任何時候都要學習、鍛鍊同突破自己，有人講過，好多人25歲已經死咗，直到70歲先入墳墓，就係講人喺25歲就停止學習、成長同進步，人生已經冇意義，所以我覺得任何時候都唔可以令自己定型，要保持進步，呢個世界好多有趣嘅嘢可以學習，任何時候都有進步嘅機會，我有好多嘢都想由內到外進化，畀大家睇到個新嘅我。」

靠黑森林蛋糕谷肌。

ANSONBEAN預告預告下半年新歌、新碟、新劇推出有突破。

近年ANSONBEAN熱愛武術，學習各式各樣的武功與跆拳道，更落足心機自度武打短片，不過早前他不幸在拍攝期間弄傷後腿導致肌腱撕裂，他說：「之前拍reels時後腿肌腱撕裂，停止咗動作訓練一段時間，而家踢腳動作有少少影響，其他都好返嘞，行得跳得，希望可以完全康復。」ANSONBEAN將繼續多元發展，之前跟泰妹於《Chill Club》頒獎禮表演《CALL ME(Late At Night)》，大獲好評，他說：「因為我嘅歌都係玩得開心同熱鬧跳舞，希望可以多啲機會有跳唱現場表演畀大家睇。我而家都籌備緊新歌，嚟緊都會有新碟出，同時新劇都會出街，係好期待，希望嚟緊繼續有更多新嘅作品同大家見面。」

ANSONBEAN近年熱愛武術，不過早前不幸在拍攝期間弄傷後腿導致肌腱撕裂。