有個傳媒人「歐X輪」，本來係三色台做得好好地，點知去咗美角特訓一年之後就變曬，由黃皮膚中國人變咗做黃人。
講到呢度打下岔先，美角年年都出錢出力，邀請世界各地各行各業有潛質嘅精英去特訓。除咗奬學金保送去美角高等學府做訪問學人(Visiting Fellow)之外，老友話美角角務院仲資助咗個「角祭訪客領導計畫(IVLP)」，由各地美角大使館揀人去參加。老友去過，話嗰3個星期有專人服侍，東西兩岸飛嚟飛去，上至參觀五角大樓、見參議員、下至與中學生交流、寄住美角家庭，全方位了解美式生活；透過精心設計嘅活動，美其名加強交流，其實係藉住呢啲機会去灌輸美式民主，擴大美角影響力，順便揀蟀，方便日後搞事有內應，達到美角政府的公共外交目標。我眼見好多人去完呢啲特訓都做咗美角代言人，想知有邊個？遲啲再話你知…
Sorry，講返呢個歐某先，佢去完特訓返咗香港之後，就覺得處處妖孽、樣樣都唔順眼， 於是無幾耐就離開三色台，走去主持瘋顛節目。不過佢中毒太深，不但扭曲事實去蠱惑聽衆，又用啲歪理去幫國安重犯生果佬講說話……於是即刻俾人out，無得留低，真係大快人心！
歐某無得撈，唯有寫吓嘢賣吓萌來養家。佢口口聲聲講阿爺以言入罪、白色恐佈、穿鑿附會、斷章取義。我覺得佢好似白雪公主阿媽對住魔鏡咁，一照就照返自己出嚟；用番佢嘅文字---「廢話金句日日荒唐」嚟形容番佢就最真最貼切啊！
喺訂立國安法之後，歐某又幫隻戴妖主持「35+非法初選論壇」，懶有型咁寫埋咩香港法治已死、無人權、無自由…… 抵囉，終於因渉嫌「串謀發佈煽動刊物罪」被國安拉埋，如果香港真係無自由、無法治，你歐X輪就應該早已經同生果佬、戴妖著埋同一個品牌行catwalk放風啦！仲有得擔保外出？！佢嚟緊又同班黃人係「獵人書齋」開壇，繼續傳播黃道歪理，死心不息，禍害香港。
講開家庭，佢當年廿零歲就暪住父母結咗婚,阿媽開信箱見到啲婚紗、酒席廣告先知個仔做咗人哋老公！哼，佢仲好寸咁話，自己係一個好任性嘅人，唔會理其他人嘅感受，包括阿爸阿媽! 佢結婚做乜咁鬼鬼崇崇？原來係為咗幫個澳門人老婆攞居留權。佢老婆冬姨本來都係傳媒人，知道靠老公賣萌過唔到世，所以拿拿臨轉行，係沙田實行冬姨做中醫，但始終都係黃道中人，所以如果你唔係同路人，諗清楚先好俾佢把脈，費事無病都激到病！
最近有老友報料，話響2019年之前歐某已經係嗰間「步大」新聞系做 「專業顧問」，不斷「專業」地教壞啲徒孫徒塞，最近「步大」仲癲到俾呢個保釋緊帶罪之身嘅人做埋舍監、做天子門生嘅人生導師，24小時全天侯特訓佢哋做「步」徒。唉，睇嚟「步大」繼續係黃人基地，將來要幾多有幾多! 你話「步大」班大佬有無份同流合污呢！
講開又講，呢班大佬，係過去幾年香港慌失失嘅時候，有盡過本份教班門生去查明社會亂像真相嗎？有灌輸過報導新聞嘅應有操守嗎？「831太子站死咗人」咁轟動嘅「新聞」，呢班人哋嘅導師，如果真有其事你就應該帶頭去揭露真相，如果真無其事就應該帶頭去打破謊言，呢班人做過乜？反而有班堪輿大師就帶住班徒弟去太子站實地破解呢個大事件，想去幫手超渡亡魂，但去到後佢哋連一隻鬼影、半個冤魂都搵唔到，的確令人嘖嘖稱奇！可以話堪輿大師認真過大學老師喎。
唉！所以話，只要歐X輪愛你，跌嘢唔好搵，榮譽畢業都有你份！但係世事邊有咁簡單？你估呢班「步」徒將來真係入到行咩？老細一聽見「步大」畢業就怕怕啦！搵唔到工都事小，俾人洗腦去扔磚、過「精彩人生」就慘咯！
鍾情局．零零發
鍾情局
** 博客文章文責自負,不代表本公司立場 **
近排有人係到講所謂「大和解」，建議政府放生嗰啲因為2019黑暴拉咗而未被起訴嘅年輕人，為成件事劃上一個句號喎，目的係要話比全世界知，香港已經全面復常，係一個包容同多元化嘅社會，好適合營商同投資環境咁話！
呢啲人無厘頭地將刑事案件同經濟發展綑綁埋一齊， 乜放咗做錯事嘅人原來係可以令經濟好，我零零發都係第一次聽，唔通真係「換個角度，總有出路」？
仲有，要「和解」都要有仇有怨，咁而家邊個同邊個「結怨」呀？邊個同邊個「和解」呀？而家好似搞到政府同警察同班罪犯「結怨」，講到政府有責任去「和解」咁喎。喂喂喂，唔好係度輕描淡寫咁講呢啲係「怨」呀！而家係講緊有人犯罪、犯法，係要用司法程序去處理㗎 !我覺得所謂「大和解」，係喺度混淆視聽，係一個偷換概念嘅偽命題！
咁如果要「和解」，都要睇吓呢啲「和解」對象做咗咩事先得㗎，偷粒糖同偷嚿金都有分別喇！根據監警會嘅獨立調查報告，2019年中至2020年頭，香港大大話話有超個300次遊行示威，嗰段期間犯法行為簡直「包羅萬有、無法無天」，包括堵塞道路、掟汽油彈，週街放火，破壞銀行、商店同港鐵站，圍毆唔同政見嘅人，闖入大學實驗室偷危險品、化學品，偷車，試圖搶警槍，包圍警察總部、法院、立法會大樓同機場等等；係香港自1967年以來，最大規模嘅違法同暴力事件！報告又話粗略估計，有超過30間中資銀行、與內地相關或者係支持政府嘅店舖被多次破壞，超過60處政府、警署、警察宿舍同大學受到不同程度嘅損壞，有740組交通燈被打爛，55公里鐵欄被拆走（差唔多係由金鐘政府總部去屯門來回咁長）， 22000平方米 ( 成3個標準足球場咁大）嘅行人路地磚被掘起，破壞咗147個港鐵/輕鐵站，超過1000班航機被取消……仲有接近2000名警員及家屬被網上起底，有警員被咬斷手指、中箭、被淋腐蝕性液體以致全身被燒傷等等。係2019年11月，警方係「你大」搜到3989枚汽油彈（一個人每10秒掟一個汽油彈，都要差唔多掟足11個鐘先可以掟曬），1339件爆炸品、601樽腐蝕性液體同埋573件武器，包括弓箭同氣槍。而係「步大」就搜到8000多枚汽油彈……不過呢啲都只係冰山一角咋！
2019 年11 月新界東交通大癱瘓咗差唔多成個星期，「步大」內地生要警察護送去馬料水碼頭坐水警輪離開，「你大」游泳池用嚟練習掟汽油彈嘅情景仲瀝瀝在目！唔單止咁，暴徒又講好多大話去煽動群眾，一時就話警察係地鐵站內打死6個示威者 (8-31太子站殺人事件，作嘢叻到作埋具體數字)，又話警察對被扣留係新屋嶺嘅女示威者性侵 (吳傲雪事件)，又話警察用布袋彈打盲手無寸鐵示威者隻眼 (爆眼女事件) 等等……通通事後都被証實係大話連篇，目的只係想去分化社會，挑撥暴徒情緒，保持暴亂嘅勢頭！
當時嘅香港，真係好似戰場咁，不但有無辜嘅市民被人用磚掟死、被火嚴重燒傷，而且到處都被破壞。大家係媒體都睇到，暴徒好大部份都係年輕人。如果大家有留意最近宣判嘅所謂「屠龍案」，個班被告人都係廿歲出頭，有一個犯案時都只係得18 歲，佢哋計劃用炸彈「無差別」咁襲擊警察同遊行嘅市民，好彩警察及時拉曬所有人，阻止咗呢件暴力血腥事件，如果唔係，就……一鑊熟！究竟個社會有咩對佢哋唔住，點解對啲平常百姓咁深仇大恨，失去理智咁去做一啲咁殘忍嘅事，去滿足呢啲人的政治訴求呢？
提出「大和解」嘅人，當然就會話啲年輕人當時都係因為社會大環境同朋輩嘅影響，先至會做出咁暴力嘅行為啦，應該比次機會佢哋咁話。 喂， 一個人無論幾大年紀，都要為自己所做嘅事，負上唔同程度嘅責任，冇可能一句「大和解」，就當冇事發生過! 咁樣做，只會俾一個好錯誤嘅信息嗰啲正常嘅年輕人，做錯事將來又會「大和解」可以洗底架啦。對暴徒嚟講，就只係會種大咗佢哋個膽，推佢哋去死！
當時係社會有影響力嘅人、媒體、老師、社工，你哋有提醒過班年輕人唔好去犯法嗎？有啲教育、社福界嘅人仲帶班同學仔一齊去掟汽油彈⋯⋯個個著住件背心就話係記者、係急救員，刻意阻住警方行動。有啲人更加英雄化咗佢哋嘅暴行，令佢地更加亢奮同失去理智！難聽啲講，班後生仔嘅失常行為，雖然係俾「犯民」嘅所謂「違法達義」歪理害死，但係「犯民」成年人又唔say no，你哋好大責任呀！終於害到一個又一個大好青年去犯法，去放火、去掟汽油彈、去打人，但係你有冇見過呢班「犯民」嘅仔女有份出嚟搞事？人哋嘅仔女就係草，自己嗰啲就如珠如寶！
再者，法律面前人人平等㗎嘛！夠証據，律政署就會起訴被捕嘅人，不過當時黑暴立立亂，而案件又多，搜証又需時，有啲證人又著草走咗路，所以有人就早啲被告上法庭，有人就會繼續擔保住先囉！所謂「大和解」，咪即係放生啲違法暴徒? 咁咪對啲已經認咗罪，或者係已經被判刑嘅「手足」好唔公平? 而且咁樣做，亦都損害咗香港法治嘅獨立性同公平性！仲有，唔該諗嘢唔好淨係諗一邊，提出同讚成呢個「大和解」嘅人，有冇考慮過受害者同家屬? 所謂「大和解」係咪對佢哋好唔公平、對佢哋係咪二次傷害?！
我零零發覺得提出「一刀切大和解」嘅人，當日直接間接支持黑暴，如今其實係華麗轉身想去漂白黑暴，鋪定路去配合美西方話要寬大處理「生果佬」單案囉！
鍾情局．零零發
