有港媽在餐廳點凍檸茶時忘記叫「走甜」,卻賴餐廳失誤,其兒子坦認忘記選走甜,但港媽仍堅稱「你錯,餐廳都要講唔好意思!」
以炸髀聞名的和順記日前於其Facebook專頁發文,表示日前有一對師奶帶著一位十零歲的小朋友到店光顧,他們使用QRCode自助下單點了一杯凍檸茶,當港媽飲了一啖凍檸茶後,發現飲品未走甜,於是向店員反映。
正當侍應打算更換一杯走甜的凍檸茶,港媽竟然發脾氣並指責餐「吓?點會呀!我叫走甜喎,有甜嘅!」。侍應則指出訂單上並未標明「走甜」,但仍可以為她更換一杯。不過港媽仍然不忿氣,表示自己不可能出錯,甚至想餐廳道歉「點會呀?冇可能錯!唔好意思都唔講聲」。
此時,同行的兒子突然揭開真相稱「唔好意思,係我撳單冇撳走甜!」,但港媽仍然堅持千錯萬錯都是餐廳的錯「(對小朋友講)就算係你撳錯,你都唔使講唔好意思,因為你錯,餐廳都要講唔好意思!」。直至結帳的時候,小朋友也一直面有難色,表現得非常尷尬。
餐廳負責人在文中揶揄「見到呢位媽媽咁樣教育小朋友,真係大開眼界」,亦表示「唔好意思,我哋唔係米芝連fine dining,提供唔到五星級服務。」;他亦藉此寄語小朋友「我哋明白嘅,係咁嘅家庭成長,係好大壓力,小朋友,希望你保持到獨立意考,加油」。
此帖一出即引起網民熱議,不少網民大讚小朋友乖,勇於承認錯誤「個小朋友肯認錯負責任係好好嘅品行」、「小朋友好叻,欣賞你勇於承擔責任」、「個like係俾小朋友嘅」、「好彩小朋友沒有以父母為榜樣, 抵讚」;亦有不少人表示希望小朋友不受母親影響「希望後生仔繼續要有獨立思考」、「加油,頂多幾年」、「真係希望個小朋友要保持思想」、「希望呢位小朋友唔好成為下一批嘅呢啲家長」、「希望小朋友可以堅持做一個誠實既人」。
帖文來源:Facebook專頁「和順記-荃灣雞脾王」