披着紅衣神袍嘅「犯民大教主」

由英國殖民地到而家，耶穌教係香港第一大宗教，信徒有專業人士、勞動階層、家庭主婦同學生，有老又有嫩，所以神職人員一言一行嘅影響，真係好大同好深㗎！

我零零發成家人都係虔誠嘅耶穌教教徒，而我中小學亦都係喺耶穌教學校讀書，所以我一直都好尊重神父、修女。宗教領袖一向俾大家嘅感覺，應該係德高望重、持平、廣結善緣嘅人。但係香港就有一名前主教，佢嘅言行作風，偏偏同一般人對主教嘅諗法好有出入！ 唔信嘅話，不如大家一齊倒帶睇吓……
「前主教」生於上海，16歲逃難到香港，係香港同意大利修讀神學，讀完哲學博士學位返嚟之後，就分別係澳門同香港做過校長，佢後來仲做埋香港教區主教。

「前主教」喺2002年接任冇幾耐，就已經在2003年高調出嚟參與遊行，反對23條立法，又呼籲信徒要出嚟遊行，話咁先至對得住自己嘅良心同下一代喎！ 「前主教」同「犯民」同聲同氣，唔知仲以為佢係「犯民」代言人添！ 點解一位宗教領袖對一條保護香港、維護國家安全嘅法例有咁大反應嘅？ 其實佢有幾了解條法例呢？

係2004年7月，教統局通過「校本條例」，目的只係要全港津貼學校，增加學校各方「持份者(stakeholders)」嘅參與，優化學校管治咁簡單。但「前主教」又斷章取義話「校本條例」會影響教育團體辦學理念同自由，所以用教會名義控訴「校本條例」違反《基本法》，雖然政府最後都打贏官司，但都糾纏咗成6年！ 而期間不幸有兩個教師因為個人工作壓力自殺，「前主教」又魚目混珠亂嗡話政府害死呢兩位教師，點解神職人員會咁講嘢㗎？！

2014年「佔中」事件中，「前主教」就好大力支持「佔中三丑」，話公民抗命係爭取普選嘅好方法，佢不但到金鐘現場支持學生罷課，仲發表公民抗命嘅「穢論」……不過佢每次發表完「穢論」之後都好識得包底，話自己反對暴力㗎，更做樣祝福維持秩序嘅警務人員。後來事件演變成動亂，佢就卸責話班學生騎劫咗個運動，又指責政府清場，佢仲話警方施放催淚彈對班學生嘅「小兒科暴力」，係小題大做咁話。唉！又係「前主教」你當日去宣揚公民抗命呢個歪理，又係你鼓動學生與政府對抗，到後來失控，你又撇清責任，乜你冇估計到個結果㗎咩？

到2019年發生黑暴事件，「前主教」不時都會到場，撐著黃傘，豎起大姆指，向騷亂嘅人群吶喊支持，鼓動信徒去立法會外唱聖詩，又分發食物，開放啲教會地方俾班「暴力示威者」換衫，做佢哋嘅後援。其後「前主教」更有份成立「碌柚葉基金」，美其名就話幫啲「暴力示威者」提供醫療、心理同法律支援，等佢地冇後顧之憂，實質背後目的咪支持佢哋去延續黑暴囉！ 當年8月係黑暴如火如荼之際，佢被人映到係中環一間餐廳，同「生果佬」、「陳四萬」、「白頭李」、「AV仁」及一名美國國家安全顧問克里斯蒂安．惠頓（Christian Whiton）坐埋一齊，惠頓曾是美國小布殊政府的特別顧問。成班人同「外國勢力」坐埋一齊，談笑風生，佢哋究竟喺度搞緊乜？！

「前主教」除咗對社會議題非常狂熱之外，佢仲有兩件好吊詭嘅事，我零零發想同大家分享吓。 係2011年，據一份維基解密文件中顯示，「生果佬」係2005 至2010年，一共俾咗2000幾萬「前主教」，當年香港耶穌教教區已經否認教區有收過呢筆巨款，「前主教」就吚吚哦哦，話呢筆錢係用喺一啲唔方便用教會經費嘅事喎，例如:捐款俾內地地下教會啦、捐錢俾海外天災嘅人道救援、同小朋友旅行、參加聖誕聯歡會…… 仲有，因為自己年紀大，要買商務客位機票去羅馬等地參加宗教會議咁話！真係人唔笑、狗都吠啦！

首先，點解要俾錢內地地下教會？咁咪破壞緊中國與梵蒂岡教廷之間嘅關係？抑或想顛覆中央政府政權？ 佢身為香港教區嘅主教，究竟佢係為「生果佬」定「梵蒂岡教廷」服務㗎？ 除咗資助內地地下教會之外，點解本地教會唔可以堂堂正正收呢啲捐款去做「前主教」口中講嘅事？ 再者，點解「生果佬」自己唔去做「前主教」口中嘅事？ 有得威之餘，又可以出名，點解要俾個光環你呢個白頭主教？！另外，最近法庭係「生果佬」單案提及，「生果佬」係2013年，即係佔中前一年，又分兩次入咗350萬俾「前主教」，唔知佢打算幾時出嚟交代呢350萬又用嚟做咗咩呢？總之，我零零發覺得成件事就古靈精怪，偏離咗一個正常嘅神職人員操守！

主教係教區內最高牧者，負責管理、訓導同聖化天主子民嘅職務，亦要培育教友的信仰及道德生活，推行傳播福音嘅工作。除此之外，主教另外一個重要任務就係同其他地方教會及普世教會保持連繫，維護教會嘅共融團結。作為香港教區嘅主教，唔知佢履行咗幾多呢啲正正經經的職責呢？
我零零發從細到大，無論係耶穌教嘅家人或者係學校嘅老師，都係教我哋向善、做好人、做好事。 我從來只知道作為一個教徒要奉獻，但從冇諗過作為一個教徒，仲要係一個教區嘅話事人，係可以去收錢搭飛機坐商務位嘅！ 一個退休主教要咁多錢做咩呢？喺道德標準上，係咪同一個宗教領袖有好大落差呢？

一個神職人員，咁過份參與政治、咁過份同反政府嘅「犯民」埋堆，又有咩目的呢？雖然佢好似冇直接鼓吹暴力，但係喺宗教上有咁崇高地位嘅人，佢應該義無反顧咁，反對任何形式嘅暴力！ 但佢冇，佢反而喺度曲線咁支持呢啲暴力行為！！ 我從來冇諗到一個宗教領袖係會做呢啲嘢，我真係唔希望佢嘅個人行為同操守，影響晒成個宗教嘅清譽！！！！

披著紅衣神袍嘅主教，冇好好利用信仰去感化眾人，反而利用宗教身份、平台去誤導信徒同年青人，所以我零零發認為與其稱呼佢係前主教，不如叫佢做披着紅衣嘅「犯民大教主」更加貼切！

鍾情局．零零發

鍾情局

** 博客文章文責自負,不代表本公司立場 **

我零零發最近去問啲傳媒老友呢個所謂工會嘅「記怯」，竟然冇人清楚佢哋為新聞工作者做過啲咩功德，大家亦講唔出佢有咩作用，淨係知道近年嘅主席，都好似政治偏見嚴重，個個變身成反政府嘅頭目，有實質意義嘅會務近乎零，令到唔少行家都感到厭惡。

「記怯」同記者扯上關係嘅，大家可能只係記得喺黑暴嘅時候，亂咁發啲記者證俾人，包括12、13 歲嘅細路，去黑暴現場搞搞震。呢張所謂記者證嘅代表性，都叫業界老行尊搖頭嘆息；而新聞業界有幾千人，而「記怯」嘅會員人數喺2023年就只係得200幾，到而家都唔知剩返有幾多，完全冇代表性可言！

想知呢個「記怯」乜嘢葫蘆賣乜嘢藥，就睇新一代反政府媒體「縱新聞」開張時，入面就有 4 個「記怯」主席，有一半係「生果報」嘅人，其他就係一堆有鱗有角嘅大反派。呢啲黃媒、「記怯」、生果報，就係香港典型嘅反政府鐵三角組合。

咁睇返前任主席「陳狼猩」，佢在位嗰陣時，就已經利用記者身份，帶頭去黑暴現場，阻撓警察執法，為暴徒搖旗吶喊……有行家八俾我零零發知，呢個「阿猩」好多時同老細講，就話要出去跑新聞；同老婆講，就話要加班。但結果俾人睇到佢去咗一樓一撳鐘仔?！ 不過佢當然可以話自己轉咗跑「外展新聞」，做偵查報導嘅！呢啲嘢行內好多人都知，佢臭名遠播，所以無奈要交返「記怯」個主席位出嚟，但又遲遲冇人肯接呢個爛攤子，最後唯有俾咗一心想出位嘅華X街日報「鄭亞女」接手。

高人話美媒集團知道「鄭亞女」不受控，所以叫佢唔好出選「記怯」主席。但「鄭亞女」係一個好固執嘅人，點會聽呀？所以佢一當選之後，美角總公司即刻手起刀落，請佢食豉椒炒魷。「鄭亞女」一心諗住披甲上陣為美角而戰，可憐出師未捷，就先俾自己人打壓，都幾好笑！  呢個「鄭亞女」之前全面政治掛帥，一直唔放過任何機會唱衰香港政府。而家有事，竟然搵香港政府勞工處幫佢主持公道，唔通一直話政府靠唔住、冇公義，只係「記怯」嘅口號？

另外高人又話，侵侵政府嘅狗狗效率部(DOGE) ，要搞嗰個美角國際開發署(USAid) ，原來係美角喺負責揼水俾 NED(美角國家民主基金會)同 NDI(美角國際民主協會) 。呢類白手套喺世界各地搞顏色革命，而 NED 同 NDI正正就係早幾年都傳得好勁，科水俾「記怯」喺香港搞事嘅「二判」。

(USAid)嘅資金出咗問題，「記怯」又突然好似好缺水咁，到處搵銀。好似剛剛就公佈，嚟緊會搞個所謂「氣候變化」同「公共衛生」新聞議題培訓工作坊，收成三百幾蚊一位，仲好似唔限人數咁。我零零發相信呢啲講到尾，又係搞啲噱頭嚟搵錢兼收(o)靚。

我零零發奉勸各位，參加任何活動前真係要小心，否則一不留神參加咗啲反中亂港組織嘅活動，花幾嚿水聽啲廢話都係事少，無端端俾人踢咗入會，或者懵盛盛做咗啲違法嘅事，就水洗都唔清喇！ 畢竟，跟住美西方做馬前卒嘅下場係點，大家睇吓「無腦多」同「摘蓮司機」就知！

鍾情局．零零發