復活假前香港電視台派成績表，業績慘不忍睹。大台電視廣播（511）去年的持續經營業務由前年的賺12.6億元，變為虧損428萬。王維基的香港電視(1137)去年蝕8.1億元(前年蝕2.4億)，流晒大血。加埋2月底公布業績的有線寬頻(1097)去年蝕2.3億(前年蝕1.4億元)，電視業可謂江山一片紅。
大台無綫唔好景，不過去年數字無表面睇咁差，實際生意唔係減少12億幾咁恐怖，因為當中計入好多撇帳。無綫去年賣了台灣TVBS股份，有特殊收益，乘勢撇番一早就應該撇帳的收費電視業務，一舉撇掉6.95億，加埋物業減值和人仔匯兌損失(希望係一次性)。如果唔計以上幾項，無綫持續業務的稅後利潤由對上一年的12.6億減至去年的8億，跌36%。
不過千祈唔好以為大台好好景，聽聞好多公司唔肯簽實今年在無綫落廣告，恐怕今年無綫廣告收入還會再插。
不過講起傷，就唔夠王維基傷，佢搞電視可謂重傷。佢間香港電視去年全年虧損擴大至8.1億，當中對電視業務撇銷3.3億元，另外計入損益帳的節目成本由截至2014年12月底止16個月的2740萬元，在2015年大幅增加2.9億元，兩條數加埋唔見咗6.2億!
港視的電視業務在帳上仍值2.1億，但翻查港視網上電視收視，只見到去到去年10月數字，每日只有2.1萬個觀眾，而家唔知仲有幾多。睇嚟佢的電視好難做得落去，電視器材轉手唔值錢，呢2.1億都有少少凍過水的感覺。
從港視去年營業額可見，網購生意收入比外界預期少
港視而家專注做網購，呢樣生意由去年2月2日開始，去年11月個月生意額只有3641萬元(包直接銷售和特許銷售)，認真唔算多，銷售生意有兩成毛利都唔錯，做3641萬元生意，可能只有1000多萬毛利。但單是推廣去年已用了3340萬元，包括在地鐵大賣廣告和派購物回贈等。當然另有人工、廠房等大量開支，佢網購自辦車隊，條數都好大。所以王維期呢瓣網購生意，還在勁蝕中，估計要去到3億以上的年生意額，即係要做大10倍生意，才有機會打平。
王維基由做電視突然變成網購，是否聰明，尚待觀察，不過這個行業要面對兩大超市巨頭和新入行地面店如759的強勁競爭，都唔易現玩架。
小鯊
** 博客文章文責自負,不代表本公司立場 **
最近前《蘋果日報》記者陳X行營運的Channel C爆大鑊，公司長期欠薪，而警方追查後竟然發現，和陳X行有關的幾間公司，竟透過虛構帳目，做大「銷售額」等手法，騙取政府「百分百擔保特惠貸款」共2000萬巨款；但妙就妙在，陳X行呃走大筆款項後，竟挪為己用，但就無出糧給員工，搞到Channel C周轉不靈，而員工則叫苦連天。最近該公司還被債權人接管，搞到網站停運，員工出糧無著落，徬徨無助。
Channel C其中一個「苦主」是其多媒體製作主任陳朗昇。陳朗昇是前記協主席，而現任記協主席則為《華爾街日報》前記者鄭嘉如，鄭嘉如2021年6月加入記協執委，成為骨幹成員，去年7月1日出任主席，同月17日記協就發稿指鄭嘉如遭《華爾街日報》辭退。
按道理，記協一直聲言為記者出頭，但在Channel C欠薪事件卻不見蹤影，連自己友都唔幫，難免令人質疑，記協只識針對建制派，對反對派就雙重標準，手軟腳軟，見到前《蘋果》記者陳X行的劣行，亦不敢出聲，不敢追究到底。
事實上，自特朗普第二度出任總統後，針對記者的醜行一蘿蘿。如特朗普早前簽署公告將「墨西哥灣」改名爲「美國灣」， 但因為《美聯社》記者不肯將「墨西哥灣」改寫成「美國灣」，白宮今年2月14日宣布，將無限期禁止美聯社記者進入白宮橢圓形辦公室及空軍一號專機採訪，可謂任意踐踏新聞自由。
此外，特朗普不斷針對媒體，路透社4月25日援引一份備忘錄稱，美國司法部放寬了針對媒體泄密案的調查權限，允許檢方更便捷地傳喚記者配合調查、調取記錄，可強制要求「新聞媒體成員提供與其相關的信息和證詞」。美國政府打壓新聞自由不遺餘力，平時好關心新聞自由的記協，卻不見得出來主持正義，去美國駐港澳總領事館門口示吓威請吓願施吓壓。
其實鬧特朗普是普遍港人共識，不論黃藍都啱，唯獨記協唔敢出聲，若非雙重標準，就恐怕只是膽小怕事。
有八卦友話，鄭嘉如目前跟其前僱主《華爾街日報》正在打官司，指對方無理解僱她，但鄭嘉如既然識告前老闆，為何不協助Channel C員工控訴其欠薪的老闆呢？
鄭嘉如和代表資深大律師祁志（右）（巴士的報記者攝）
記協其實有豐厚資源，坐擁自置物業，作為一個工會，絕對有能力為Channel C員工打官司討回公道。傳媒因為財政困難而倒閉，所在多有，即使傳媒行家亦會感到無奈，但像Channel C老闆這樣，一邊呃政府錢一邊尅扣員工人工，就絕無僅有，可謂近年傳媒行內最醜惡的事件。記協視若無睹，鄭嘉如視若無睹，這個記協主席有少少失職喎。
