得寵先生｜鄭丹瑞點名讚廖子妤120分超班演出孖馮允謙Amy阿正打成一片

娛圈事

得寵先生｜鄭丹瑞點名讚廖子妤120分超班演出孖馮允謙Amy阿正打成一片

2024年11月05日 23:00 最後更新：23:03

《得寵先生》將於28日正式上映。

寰亞電影製作有限公司、天下一電影製作有限公司、香港電影發展基金出品《得寵先生》，將於11月7日亮相「HKAFF香港亞洲電影節2024」，並於28日正式上映。男主角鄭丹瑞（旦哥）破天荒飾演火爆廢老，與戲中女兒廖子妤吵吵鬧鬧，旦哥點名她有120分超班演出。

點擊看圖輯

《得寵先生》海報

《得寵先生》劇照

一眾台前幕後和狗演員們早前舉行開鏡拜神儀式。

旦哥與一眾年輕演員打成一片。

旦哥大讚廖子妤表現有120分。

旦哥指電哼將真實的鄭丹瑞顯露出來。

阿正揚言爸爸是旦哥的鐵粉，她站在旦哥隔離感覺好光榮。

Jay與Amy飾演情侶。

Jay感謝Amy沒有嫌棄他，又常常鼓勵他。

《得寵先生》劇照

首次拍電影的馮允謙（Jay）「薯look」造型，與愛心爆棚的狗義工盧慧敏（Amy）演情侶，還有飾演Amy閨密的動物醫生黃正宜（阿正）。電影將於9日於英皇戲院（康城）舉行兩場「狗狗友善電影放映會」，旦哥和Amy現身分享。

早前一眾台前幕後和狗演員們舉行開鏡拜神儀式，風趣幽默的旦哥與一眾年輕演員打成一片。廖子妤爆料在拍攝現場播旦哥其中一首名曲《留給最愛的說話》，她笑說：「一播讀白『濕滑嘅司機粗心大意嘅馬路』，旦哥就會問我哋『係咪想聽Live？唔做！』我哋好期待佢現場演繹，但佢又唔肯。」唱家班Jay說：「旦哥好鍾意聽Jazz，等埋位就唱，我好想同佢Jam歌。」

Jay說：「我知道旦哥出過歌，聽講係香港第一代Rapper！」旦哥1993年推出歌曲《那夜我替女兒「R」背脊》，街知巷聞。旦哥說：「我查過Rapper意思，即係『數白欖』，我係第一代『數白欖』，你哋摩登啲咪叫Rapper囉！『那夜我替女兒R背脊⋯⋯』我用羅文、鄭少秋腔，『R得佢舒服⋯⋯』」在旁阿正爆笑，旦哥歌興被打斷，扮生氣對她說：「你再笑就無面畀！」

阿正發揮主持本色，訪問各人對前輩旦哥合作學到的東西和優點，廖子妤大讚戲中爸爸旦哥：「高、靚仔、好脾氣、好肯教新人、成日請我哋飲咖啡，太多優點，我真係唔想離個劇組！」旦哥笑說：「你數緊MIRROR？我係第十三人？」廖子妤強調是真心話：「同旦哥合作大壓力，但又好易入戲，佢真係畀到我『爸爸』嘅感覺，我哋有幾場戲一見面就要面左左，戲中父女關係有啲似我真實故事，好容易投射到。剛才拍嗰場，喊到不得了，多謝旦哥。」旦哥說：「佢投入到，我希望佢有80分，結果佢做到120分。」旦哥對廖子妤很高評價。

風趣的旦哥扮惡樣說：「呢部戲將真實嘅鄭丹瑞顯露出嚟，燥狂啦，郁啲就鬧人，你哋覺得好，其實係假嘅。將自己好多真實一面挖出嚟，好赤裸，但好好，可以試一次咁樣做。好難得今時今日遇到好劇本，我亦最開心遇到新導演，過去幾十年，好多人幫我，好多貴人。去到今日我覺得係時候幫得上、有需要我，尤其是電影，我就去幫。最重要一件事：我對狗有敏感，而我竟然同狗狗拍咗一部電影，建立咗好好關係，呢個係一個好大挑戰，好好玩！」

阿正揚言爸爸是旦哥的鐵粉，她說：「我依家企喺旦哥隔離好光榮，Hello Daddy媽咪！最緊張同旦哥有一場嗌交戲，劇情我同Amy懷疑旦哥落毒害啲狗，然後我哋對罵，期間Amy同旦哥嗌交我就夾喺中間。大家都睇到身高差，我對佢哋毫無威脅，所以有啲插枓打混嘅感覺。」她本色演出，為嚴肅的劇情增添不少歡樂。

本身很喜愛動物的Amy坦言特別開心，「我最感恩係可以同有經驗演員合作，學到好多嘢，拍攝、待人接物、處事、處理自己情緒。」廖子妤鼓勵她，「你做得好好！」Jay說：「最難忘有一場戲我哋同Amy要搬運鐵欄，旦哥就問我一條IQ題，依家唔劇透住，但好好笑，好開心。」Amy爆料：「最搞笑場戲拍完，到依家，Jay仲未明白IQ題嘅答案。」

第一次拍電影的Jay表示又緊張又興奮，他說：「今次第一次拍電影，感覺比我預料中好，雖然我唔係好多戲份，但都會無得瞓覺和好大壓力。我同Amy對手戲較多，同佢合作好舒服，佢無嫌我做得唔夠好，仲成日鼓勵我，多謝Amy。」Amy受寵若驚：「我點會嫌你呀！」

故事大綱：

60歲臭脾氣的長者任春佳（鄭丹瑞飾）一直過著獨居生活。他在被迫退休後回望自己的一生：婚姻失敗、父女關係疏離。生無可戀的他決定上山尋死，幸好垂死一刻被流浪狗燒腩發現，引領動物義工鄧悅娜（盧慧敏飾）救他脫險。燒腩的靈性與令人窩心的舉動，令原本討厭狗的佳叔對流浪動物改觀，也與悅娜成為了好友，並加入悅娜所辦的動物中心「汪之家」當義工，幫助被遺棄的動物。悅娜亦助佳叔能藉此解開與女兒任素儀（廖子妤飾）積壓了二十多年的心結。正當佳叔以為人生將要重回正軌的時候，他所住的村莊卻突然發生數十隻流浪狗被毒殺事件⋯⋯

觀看相關影片按連結：https://youtu.be/f-guYfThImA

往下看更多文章

旦哥鄭丹瑞即興與燒腩齊戴頭罩 Amy盧慧敏心痛謝嘉怡愛犬遭毒殺

2024年12月19日 19:00 最後更新：20:29

溫暖小品電影《得寵先生》上映至今口碑載道，電影團隊連日來四出謝票答謝觀眾支持。

昨日（18日）電影男主角鄭丹瑞（旦哥）、女主角盧慧敏（Amy）、導演兼編劇李志偉（Thomas）、電影剪接梁汶珊（Emily）和剪接顧問唐偉榮（阿Wing），到「伯大尼古蹟校園」，跟香港演藝學院電影電視系學生分享拍攝點滴以及電影細節。期間提到港姐謝嘉怡的兩隻愛犬慘遭毒殺時，Amy眼泛淚光表示：「你可以不愛，但你唔可以傷害...」

Amy於分享會後接受訪問，痛心表示近日收到很多私訊，有關謝嘉怡愛犬慘遭毒殺一事。她說：「每一日喺不同角落都發生緊呢啲咁殘酷嘅事，而我哋未必睇到。動物義工、寵物主人其實都面對緊好痛、好殘酷嘅現實，呢個世界上亦有好多鄧悅娜（戲中動物義工）不停為狗狗去付出。」Amy引用電影對白再三呼籲大眾善待動物，她說：「『你唔做主人都得，但要做返個人』，你可以唔愛，但你唔可以傷害，因為我哋冇權咁做。」

分享會上，Amy回想起電影的最後一幕，與旦哥於山頭上抱着小狗時真情流露淚崩時刻，她說：「劇本係冇嗰下流眼淚，頭兩個Take同埋試位時候，眼淚已經不停流，喺個心度發出嚟，的確係鄧悅娜經歷過嘅一啲傷痛。我以為一、兩Take就會完成拍攝，但有啲小失誤例如狗繩錯位，去到第四、五Take我有少少擔心會唔會喊唔到，但原來真係唔會，真係可以不停喊。當下嗰個鄧悅娜同Amy已經結合咗一齊。」

而電影中旦哥與飾演「燒腩」的狗演員Little戴着頭罩並排坐的一幕，Thomas透露是旦哥即興演出，更坦承起初不喜歡這個安排，但後來有了新的解讀：「開頭嘅時候真係唔鍾意，因為覺得好跳。我定義佢哋兩個相濡以沫，同是天涯淪落人。佳叔同隻狗係同一物種，坐埋一齊，大家都係受咗傷。」旦哥直言畫面上是不合常理，但假如憤世嫉俗的火爆老人佳叔願意去做這件事，代表他與「燒腩」建立了深厚友誼。

另外，剪接師阿Wing大爆戲中「燒腩」追車一幕，「偷用」了NG片段令畫面更為驚險。他說：「Action之後，Cut之前係一般認為要用嘅Footage，但呢套戲唔係，Action前嘅嘢我會用得着，Footage上係唔要，我偷咗嗰啲位用，變咗可以生多個危險位出嚟，我剪完出嚟佢哋覺得好啱用就採納咗。」Amy直言獲益良多兼有所啓發，說：「唔好俾個框框實，係關於創意，我都學到嘢。」

《得寵先生》上映踏入第四周，場次維持每日接近50場。「人寵場」反映熱烈深受觀眾喜愛，徇眾要求將於本周六及日，分別於黃竹坑和將軍澳戲院加開兩場。

你或有興趣的文章

得寵先生｜鄭丹瑞點名讚廖子妤120分超班演出 孖馮允謙Amy阿正打成一片