阿姐汪明荃演唱會請Anson Lo做嘉賓合唱鄭少秋歌曲

娛圈事

阿姐汪明荃演唱會請Anson Lo做嘉賓合唱鄭少秋歌曲

2024年11月25日 22:00 最後更新：22:15

阿姐演唱會好多藝人捧場。

一連兩場「信興集團呈獻：阿姐•汪明荃演唱會 2024」尾場已於昨晚（24 日）於紅磡香港體育館圓滿完成，胡楓、薛家燕、狄波拉、姜大衞、李琳琳、張德蘭、張繼聰、謝安琪、劉雅麗、林奕匡、陳恩碩、黃妍和歐信希等均是座上客，表演嘉賓則分別為楊千嬅、容祖兒和 Anson Lo 盧瀚霆。

點擊看圖輯

最後汪阿姐以《Make my day》為一連兩晚「阿姐•汪明荃演唱會 2024」畫上圓滿句號

好友薛家燕捧場

點少得好友胡楓、仲有張繼聰、謝安琪夫婦

姜大衞、李琳琳都有到場支持

呢個係黃金造型

好華麗

汪阿姐以鑽石造型出場

綠寶石造型夠優雅

一首接一首無停

紅寶石夠搶眼

千嬅與阿姐建立嘅緣份在20 年前《開年大典演唱會》

兩人合唱《少女的祈禱》

再唱《郎歸晚》

汪阿姐話祖兒已經係天后級

二人合唱《我的驕傲》

再唱《用愛將心偷》

Anson Lo 揀了《紫釵恨》同阿姐合唱

再唱《迷人 Pink Lady》

汪阿姐：「好多人羨慕我可以握住 Anson Lo 隻手。」

Anson Lo多謝阿姐好 support 佢

Anson Lo 跳唱了他的《Hey Hey OK!》

家英哥都有上台

仲做埋表演嘉賓

最後汪阿姐以《Make my day》為一連兩晚「阿姐•汪明荃演唱會 2024」畫上圓滿句號

大家後台爭住同阿姐影相

好多人嚟支持

阿姐好受歡迎

睇完演唱會要同阿姐影相打卡

汪阿姐繼續以黃金、紅寶石、珍珠、翡翠和鑽石共 5 種珠寶顏色造型在台上和觀眾見面，在唱畢《傾城之戀》後，汪阿姐說：「當初我邀請呢位歌手做我今次演唱會嘉賓嗰陣，佢話俾我知要度期，原來佢本來有演唱會係同我今次演唱會嘅日期非常接近，但係佢專登調動檔期去配合我，所以我真係好多謝佢，好！我哋多謝楊千嬅！」

此時，千嬅從升降台升到台上，走到汪阿姐身旁後先和全場觀眾打招呼，汪阿姐說：「我記得有一次妳開演唱會，我做妳嘉賓，我就特登學咗一首妳嘅歌唱俾妳聽，不如我哋唱呢首歌回憶吓？首歌係幾耐之前？」千嬅說：「我要分享吓呢首歌，呢個係我第一次同阿姐建立嘅緣份，應該係20 年前喺《開年大典演唱會》，嗰陣好膽粗粗，因為覺得阿姐好代表女性精神，我張演唱會海報都係楊門女將造型，係好似着住盔甲當兵嘅衫咁樣。我記得當日我好緊張咁想請阿姐嚟，但去到 show 嘅時候，我把聲好唔舒服沙咗，但係阿姐嚟到真係好冷靜，佢話千嬅唔緊要啦，今晚我坐埋一邊，佢唱俾我聽。」汪阿姐說：「但係當時你唔知我唱咩歌？」千嬅說：「唔知，因為當時阿姐係瞞住我，同編呢首歌嘅鋼琴老師秘密練咗兩星期，叫咗我嘅造型師做咗一套衫，去 match我嗰一 part 去做呢次演出，我好感動。阿姐當時俾我嘅印象就係好有義氣，同埋好大愛，俾咗好多 support 喺我嗰個演唱會度，雖然我係泣不成聲，但係呢個記憶喺 20 年後嘅今日，我終於可以同阿姐喺返呢個舞台度表演一次，多謝阿姐妳俾咗個機會我，你對我嘅人生演藝成長路俾咗好多鼓勵同支持，感謝妳俾呢個機會我，等我可以返嚟紅館嘅舞台同大家演出，多謝妳！」

汪阿姐：「好期待妳嘅演出，咁我哋而家唱呢首歌好唔好？」千嬅：「好呀，有啲緊張㖭。」汪阿姐：「因為 20 年冇唱。」千嬅：「係呀，我由少女唱到變成中女，而家妳唱又變返少女。」兩人便合唱《少女的祈禱》。唱完此曲後，阿姐將個台交給千嬅，千嬅續說：「大家好，好耐冇見，好開心可以喺度再次為大家演出。感謝阿姐邀請我做佢演唱會嘉賓，除咗我可以再次返呢個舞台度同大家唱歌之外，最重要嘅一個原因係可以分享阿姐嘅音樂。我覺得阿姐俾到我最大嘅能量係除咗佢嘅勇氣同埋堅持，對學習嘅熱誠同進步之外，作為後輩可以得到佢嘅支持，呢一點係好重要。好感謝喺我每一個演藝嘅人生階段，阿姐都好似及時雨咁俾到我好多鼓勵，呢個係我好感動嘅事。今日可以唱阿姐嘅歌，我揀咗隻好有意思嘅歌叫《郎歸晚》，點解會揀呢首歌？因為呢首歌非常有意義，同埋所用嘅文筆非常之漂亮同凄美，當然有一種傷感，但係作為後輩有機會可以傳承阿姐嘅音樂，我覺得我要表達一份心意嘅時候，都要認真諗清楚到底呢首歌去到我嘅人生階段又可以代表到乜嘢？一首好嘅作品喺唔同嘅人生階段，可以唱到唔同嘅內容出嚟，去到今日我發現《郎歸晚》係講一種等待，一種思念，但係今日好想表達嘅係人生只要堅持，你亦都可以喺任何年紀，任何狀況去做到自己想做嘅嘢，令到自己嘅夢想成真，所以一切都係未晚，喺度送俾大家《郎歸晚》。」

及後當汪阿姐獻唱《問我》時，容祖兒突然現身台上和她合唱，唱畢此曲後，汪阿姐說：「歡迎容祖兒！」「妳真係好似一隻唔識飛嘅雀仔，冇時停，祖兒其實我哋係幾時相識？」祖兒答：「印象係好耐！」汪阿姐：「其實我哋係用同一個髮型師，嗰陣容祖兒好細個，佢嚟到我面前同我講我叫容祖兒，我係羅記羅文嘅學生，好有禮貌。嗰陣妳開始灌唱片未？」祖兒：「「嗰陣我驚妳唔識我。應該係啱啱開始灌錄咗一首歌。」汪阿姐：「妳而家已經係天后級，好嘢，妳嘅努力大家睇到。」祖兒：「我想講好開心，我嘅人生其中一個成就係可以同阿姐嘅距離拉到咁近，近到可以而家企喺佢個台度做佢嘅嘉賓，另外一樣嘢想同大家分享嘅就係阿姐食過我煮嘅餸。」汪阿姐：「哇！真係好犀利呀，係全餐，不過佢搞咗一日，煮嗰個意大利飯用咗幾多個鐘頭？」祖兒：「四個鐘，但係阿姐你鍾意食到要攞走。」汪阿姐：「打包唔好嘥吖嘛！」祖兒：「呢個係我人生成就。」汪阿姐：「我哋雖然唔係成日見面，但係如果妳喺香港，我哋都會通吓電話，去私房菜食返餐，佢識好多新嘅食嘢地方。」祖兒：「所以我其實都希望可以成日見到阿姐，在公在私，今次多謝阿姐邀請我做妳演唱會嘉賓，我好開心。」汪阿姐：「其實妳有首歌我好鍾意，我哋一齊唱呢首歌好唔好？」祖兒：「呢個係第二個成就解鎖，阿姐唱我首《我的驕傲》！」她倆合唱完後，汪阿姐將舞台交給容祖兒。祖兒：「阿姐慢慢，等妳有充足嘅時間換衫。大家好，我係羅文老師嘅學生容祖兒，今日好開心好榮幸可以企喺阿姐嘅舞台上面，亦都見到好多支持阿姐好多好多年嘅歌迷，希望大家會有一個好開心嘅晚上。今日揀咗一首阿姐嘅歌，阿姐有好多歌，所以都好難揀，唔知揀邊首好，但係今日呢一首係其中一首我好鍾意嘅阿姐嘅歌，《用愛將心偷》，送俾大家。」

汪阿姐於表演完《像白雲像清風》後說：「其實今次我開呢個演唱會，真係好開心，因為可以借住呢個機會，同我啲歌迷見面，又可以見到好多我啲好拍檔，仲有好多歌手朋友，有唔同嘅 Diva，亦都有年輕啲嘅歌手，搵佢哋做嘉賓，又個個都好好，全部都無拒絕。有一位，我話想請佢做嘉賓，佢就即刻俾咗個手勢我，話俾我知 ok ok，有請 Anson Lo !」Anson Lo 從升降台升到台上後音樂便響起《紫釵恨》前奏，汪阿姐即說：「吓！你唱鄭少秋嘅歌？」兩人合唱完此曲後，汪阿姐說：「多謝 Anson Lo，多謝晒你。」 Anson Lo 說：「多謝阿姐邀請我，Hello，我係 Mirror 嘅 Anson Lo 盧瀚霆。」汪阿姐問 Anson 出道多少年，Anson 答她今年是出道第 6 年，汪阿姐讚嘆道：「你已經有咁多 followers，犀利，你一定係好勤力，做得好好，所以有咁多人擁戴，繼續加油。」Anson：「做好每一日嘅本分，唔好令到支持我嘅粉絲，支持我嘅神徒，支持我嘅觀眾同朋友失望，盡自己努力。」汪阿姐：「要做好自己！點解會請你做嘉賓？其實我哋係咪好熟？好似唔係好熟。」Anson：「本身我哋唔係好熟，但係每一年我哋起碼都會見一次，就係拜年嘅時候，咁就同妳拜過幾次年。每次去阿姐度拜年都好多嘢食，佢嘅蘿蔔糕好好食，又可以飲到阿姐嘅湯，總之拜年嗰日嘅早餐午餐都千祈唔好食。」汪阿姐問：「點解你會唱呢首《紫釵恨》？其實呢首歌係 Anson 揀，唔係我揀，點解呢？」 Anson：「首先我要多謝阿姐妳俾咗好大嘅自由度我去揀妳嘅歌，我覺得呢一首歌係你其中一首經典之作，妳會唱得好有女人味，好有風情，好 Classy 好高貴，好有感情，有好多 Story 嘅感覺，我每次睇妳嘅演出，同唔同嘅單位唱呢首歌，完全係視覺同歌聲上嘅享受。今日好開心，除咗唱呢首歌之外，我仲嗲咗阿姐好耐，問佢可唔可以唱多一首歌？」汪阿姐：「呢首歌好配合個環境，全部都係粉紅色！好，我哋就唱呢隻《迷人 Pink Lady》。」唱畢此曲後，汪阿姐說：「你好鐘意呢首《迷人 Pink Lady》噃！」Anson：「梗係鍾意啦，有邊個唔鍾意呢首歌。」汪阿姐：「好多人羨慕我可以握住 Anson Lo 隻手。」Anson：「好多人羨慕我可以捉住阿姐隻手就真，今晚我全家都嚟欣賞妳演唱會。」之後汪阿姐便把舞台交給 Anson Lo。

Anson Lo 獨唱前說：「首先好多謝好榮幸可以接受到阿姐嘅邀請，好榮幸可以做到阿姐演唱會嘅嘉賓，呢一個演唱會嘉賓係我自己諗都冇諗過，一定係我人生同事業嘅里程碑，在座有我嘅全
家同我嘅親戚，我爹哋媽咪同我家姐都嚟咗睇，佢哋都覺得係一件好開心嘅事。呢個絕對係一個好大嘅榮幸，阿姐喺香港嘅娛樂圈真係一個經典，亦都係一個影響咗香港咁多年以來嘅文化嘅一個 icon，所以好想大家喺呢個時候用掌聲再次多謝阿姐。」「真係好多謝阿姐可以俾機會我上到呢個舞台，係一個好珍貴嘅回憶，我重新可以踏上呢個舞台同大家一齊，可以表演俾大家睇，而表演永遠係我自己最鍾意，永遠都唔會放棄嘅一個項目，我一定會用 100%回饋返俾所有觀眾。」「我本身對阿姐嘅印象係一個冰山雪人美女，阿姐佢好有禮貌，嗰陣我真係同佢唔係咁熟，我唔係好夠膽同佢講嘢，我淨係記得第一次拜年嗰陣，我只係默默低頭喺度食，食晒佢嘅蘿蔔糕，而我記得阿姐第一次同我嘅對話係問我要唔要攞一底返屋企？咁最後我真係有攞到，因為真係太好食，我諗阿姐整嘅蘿蔔糕係我人生食過最好食嘅蘿蔔糕。之後再次去拜年，或者
喺唔同嘅工作環境見到阿姐同家英哥，佢哋就冇咗當初嗰種我自以為感受到嘅距離感，因為佢哋係一對好栽培後輩、好錫我嘅長輩，甚至乎係喺我路途上好緊要嘅老師。阿姐今次邀請我做嘉賓，當我哋喺排練室綵排嗰陣，我都感受到阿姐嘅愛，因為每一次唱完之後佢都同我講你真係唱得好好喎，好多謝阿姐真係好 support 我。唱歌方面佢俾咗好多 advice 我，點樣可以唱佢嘅歌再唱得好啲，佢又同我講想加啲其他嘢都得。」之後 Anson Lo 便跳唱了他的《Hey Hey OK!》給大家欣賞。

在 Encore 環節時汪阿姐說：「咁多年嚟，我都好享受喺演藝界嘅工作，由演員，歌手，到粵劇演員，去到一啲行政嘅工作，為業界去貢獻，每一個崗位，我都會盡心盡力，因為我知道，大家都對我哋嘅演出有期望，有要求，所以我先可以不停改進，不停增值。喺度要多謝你哋嘅支持，陪住我一直行呢條娛樂之路，同我一齊享受呢個美麗嘅世界。」最後汪阿姐以《Make my day》為一連兩晚「阿姐•汪明荃演唱會 2024」畫上圓滿句號。

往下看更多文章

「阿姐•汪明荃演唱會2024」首場開鑼陳慧琳林家謙任嘉賓汪阿姐五色珠寶造型華麗登場

2024年11月24日 18:00 最後更新：21:20

Liza姐華麗登場！

一連兩場「阿姐•汪明荃演唱會2024」首場已於11月23日在紅磡體育館圓滿完成，陳百祥、黃杏秀、樂易玲、周慧敏、周美鳳、王浩信、梁思浩、關寳慧、黃建東、陸浩明和鍾柔美等均是座上客，表演嘉賓則分別為陳慧琳和林家謙。

全晚演唱會以不同顏色的珠寶劃分出每一部分，寓意汪阿姐是演藝圈的瑰寶！在服裝造型大師陳華國Kenneth精心打造，以及背景LED屏幕呈現美不勝收的畫面襯托下，身穿一套比一套更華麗的服飾的汪阿姐於紅館舞台載歌載舞，贏得全場觀眾無間斷的掌聲。汪阿姐首先以代表黃金的金色造型獻唱《閃爍登場》和《迷人Pink Lady》揭開演唱會序幕，之後她說：「唔該晒我班Dancers，多謝你哋！歡迎大家嚟到我嘅演唱會，大家好！頭先大家有無留意我今次演唱會嘅標誌呀？有無睇到裡面寫咗啲乜嘢？」「係呀！有Diva啦，又有阿姐啦！幾靚呀可？」「唔理係Diva又好，阿姐又好，對我嚟講都只係一個稱呼嚟嘅啫，因為我一直都只係做返我自己 - 汪明荃，Liza！我，就係要將最好嘅嘢送俾每一位觀眾，所以今晚希望大家都可以好開心咁去欣賞每一首歌，每一幕演出！送俾大家，《天虹》。」汪阿姐唱畢此曲後說：「其實喺我嘅歌曲之中，電視劇主題曲佔咗好重要嘅位置，今晚當然會有好多首經典嘅主題曲送俾大家啦。送俾大家《金絲雀》。」汪阿姐最後以《秋風秋雨》結束了代表黃金的第一部分。

汪阿姐以一身寶石紅展開演唱會的第二部分，她一口氣唱了《銀河》、《華麗轉身》和《傾城之戀》，接着她說：「為咗今次演唱會，我都花咗好多心思，仲特登請人寫咗首新歌做呢個演唱會嘅主題曲！我一向都愛才，好鍾意同啲有才華嘅人合作，一來作品水準有保證，二來又可以喺佢哋身上偷吓師，學吓嘢，所以今次我就請咗Wyman黃偉文幫我寫歌詞，同埋一位已經出咗名好耐嘅音樂才子寫呢首新歌，佢就係《Make my day》嘅作曲人，我今日嘅嘉賓 - 林家謙Terence，大家俾多啲掌聲佢！」

林家謙在台上與汪阿姐傾計，汪阿姐說：「因為我之前未有機會認識你，今次我開演唱會係想同啲新人合作，我問咗好多人而家邊個最Hit作曲？佢哋個個都推薦你，所以我就認識咗林家謙。」林家謙笑問「佢哋係咪整蠱妳？」汪阿姐答：「唔係，佢哋唔係整蠱，你寫嗰首歌係一首好歌，我睇你好似一個年紀好輕嘅人，你有30歲未？」家謙說：「有啦，不如我承認已過30。」汪阿姐追問是否31、32還是33，家謙笑說可以在維基上查看到，汪阿姐又問家謙那麼年輕便作曲是受誰影響？家謙說：「係顧家煇，因為佢影響我好多，佢寫嘅旋律同埋和弦，用埋一齊個效果係好高級同好優雅，大家未必可以即刻聽得出，但係好順耳，佢好多家傳戶曉嘅歌，大家都可以跟住唱，入邊有好多Details，當你去演奏呢啲歌嘅時候，會發覺佢哋真係好深，呢啲係非常高級亦都係我最欣賞嘅地方，所以今晚特登揀咗一首煇哥寫嘅歌同妳合唱。」汪阿姐說：「家謙好有心機特登做晒和音，令呢首歌好似變成另外一首歌咁，不如而家唱俾大家聽，你哋一定估唔到係邊首歌。」此時音樂便響起《用愛將心偷》的前奏，現場亦同時響起連串掌聲。

兩人唱畢《用愛將心偷》後，汪阿姐說：「多謝晒家謙，為我寫咗首好開心嘅歌，又嚟做我嘉賓，不過佢仲有一件奇事，佢話好鍾意聽我嘅一首歌，但係我真係估唔到佢點解會鍾意，我可以俾個貼士大家，呢首歌我頭先唱過嘅！不如你自己講吓係邊首啦！」家謙接着便說：「我今日着衫配合阿姐妳，我着咗妳最鐘意嘅熱咖啡色。」汪阿姐回到後台後，家謙在台上說：「有啲朋友可能未認識我，我叫林家謙，今日就揀咗一隻阿姐嘅歌去翻唱，呢隻歌大家都應該會聽過，不過我估未聽過男仔唱，呢首歌我自己好鍾意，因為好好聽，同埋當我唔開心，心情麻麻哋嗰陣，我聽完呢首歌就會變返好開心，希望大家聽完我唱都會好開心，送俾大家《迷人Pink Lady》」。家謙唱完《迷人Pink Lady》後，汪阿姐已換了一套珍珠色配珍珠裝飾的服裝再度出現於台上，先後唱出《家變》、《四季情》，然後她說：「《家變》、《四季情》都係霑叔黃霑先生寫嘅歌詞，今年霑叔已經離開我哋二十年，但係今日睇返佢寫嘅歌詞，仍然覺得好有哲理，好看透人生！每次唱霑叔嘅作品，都有得着！所以霑叔永遠都係香港嘅文化標誌代表，亦都係每一代香港人嘅共同回憶。以下落嚟，繼續為大家送上霑叔嘅作品。」汪阿姐唱出《輪流轉》和《問我》，之後到家英哥出場，他先以一段棟篤笑和觀眾朋友見面，這段棟篤笑的內容不乏家英哥和汪阿姐的相處之道，最後家英哥更唱出他的首本名曲《Only You》，大施冧功！

第四部份以翡翠為主題，汪阿姐換了一套碧綠色的服裝繼續演出，先唱了以宋詞為歌詞內容的Medley，然後她說：「對藝術嘅追求，絕對係無分國界。無論古今中外，只要係好睇嘅，出色嘅，我都有興趣去學習，去嘗試，而我哋中國就有好多藝術作品，都值得我哋用心去欣賞，剛才幾首詞係出自宋代著名詞人嘅手筆，希望大家都會鍾意。仲要承蒙香港舞蹈團批准佢哋嘅舞蹈家 - 米濤參與舞蹈編排，特別多謝佢哋！而除咗詩詞之外，中國仲有好多好出色嘅小說同戲曲，相信大家都記得，我以前喺電視演出過《楊門女將》嘅穆桂英，當時大家都好鍾意呢個角色，不過我最近升咗Level，因為我想突破自己，所以我喺戲曲裡面，做埋佘太君，睇吓遲啲有無機會試埋楊家將其他角色，到時再俾你哋睇吓！而家，我哋就先回味一吓。」唱畢《楊門女將》，汪阿姐說：「除咗優美同埋澎湃之外，我都預備咗有中國色彩嘅歌曲，仲有一啲輕鬆開心嘅小調，希望大家都聽得開心。」阿姐之後唱出《春花萬里香》加《採茶山歌》Medley，緊接的是《像白雲像清風》，然後汪阿姐便以一句「她既是一位天后，也是一位女神」，邀請首場演唱會第二位嘉賓陳慧琳到台上。Kelly甫出場即讚：「阿姐，妳好靚呀！」汪阿姐回應說：「妳好型呀！」Kelly續說：「係咩，襯唔襯到妳？妳頭先唱啲歌我全部都識唱，由細個同大家一樣一齊聽。」汪阿姐說：「我同Kelly都只係合作過一次，錄過一隻歌，係18年前嘅事。」Kelly說：「呢首歌叫《自由女神》，講嘅係單身，18年前我同阿姐都係單身。」汪阿姐說：「不過而家興單身，興同居唔結婚。」Kelly說：「其實我哋結咗婚都好自由，唔一定單身先自由。」汪阿姐道：「不如我哋回味吓呢首單身歌，大家話好唔好呀？」之後她倆便唱出這首《自由女神》，唱畢此曲後，Kelly 說：「妳知唔知當日我哋合唱呢首歌嗰陣，妳就係我而家呢個年紀，阿姐先至係凍齢始祖。」汪阿姐說：「我而家又要去換衫，Kelly 妳就同大家講吓妳嘅近況。」Kelly ：「好呀，我會幫妳搞掂個場，妳落去慢慢換。換得快嘅話，可以係台下面就算唔嘆下午茶，都可以嘆杯熱咖啡先返上嚟。」「阿姐真係好 Fit 啊呵，又靚，永遠都係走前人一步，其實我同阿姐都有10幾年冇見，我只係喺電視機度成日見到佢，但係真人就好耐冇見，咁上兩星期我除咗我去咗studio同阿姐綵排，阿姐一見到我就話我肥咗，我當時心諗，阿姐唔係個個人都好似你喺呢50幾年，每一日都係喺最巔峰嘅狀態，我都有失手嘅時候。」「跟住阿姐話嚟緊七月我喺紅館開演唱會，係咪到時先減？我答阿姐係呀係呀，到時我會減㗎啦！我以為自己要求高，sorry，阿姐係比我要求更高一個層次，明唔明呀？其實阿姐咁認真嘅態度，都係你哋鍾意佢嘅原因，不如我今晚就唱呢首歌代你哋送俾阿姐，就係《對你太在乎》。」

第五部份的主題為鑽石，汪阿姐閃爆登場，頭戴皇冠唱出《京華春夢》、《郎歸晚》、《千王群英會》和《勇敢的中國人》，她演唱後說：「多謝大家咁多年嚟對我都咁支持，要送今晚最後一首歌俾大家。」此時音樂響起大家耳熟能詳的《萬水千山總是情》的節奏。在觀眾的一片Encore呼聲下，汪阿姐以中性穿西裝的造型再現台上，先為每位觀眾送上一曲《熱咖啡》，之後伴隨着《美麗娛樂世界》，大螢幕展現汪阿姐過往拍攝劇集的多幅造型照，最後以一首《Make my day》為首晚演唱會畫上圓美句號。貼心的汪阿姐於完場後，也特意和紅館外等候她的歌迷打招呼才回家休息。

你或有興趣的文章

阿姐汪明荃演唱會請Anson Lo做嘉賓 合唱鄭少秋歌曲