Kelly向來好迷信，唔好意頭嘅嘢可免則免。「道路研究社」周日喺facebook分享，屯門蝴蝶灣附近一塊路牌出現「墜機」標誌，機頭竟向下，好唔吉利，認為應參照英國路牌設計指引，飛機標誌唔會指向水平線以下，最多都係指向左或右。運輸署就話設計路牌時，會參考唔同海外國家嘅做法，但會檢討同優化。
運輸署回覆小妹話，涉事路牌由屯門赤鱲角隧道公路嘅工程隊伍建造，並於近月完成，該路牌係方向指示牌，部份由「三面柱體可變訊息標誌」組成，喺唔同隧道運作情況下，指示駕駛者嘅行車方向，例如當隧道全線封閉時，需要喺迴旋處掉頭，改道經屯門公路前往東涌、珠海及澳門。
運輸署知道公眾對呢塊路牌議論紛紛，正與路政署檢視佢嘅設計，優化入面嘅文字和標誌。
另外，亦有眼利嘅網民發現喺新田公路往上水方向，近錦繡花園出口嘅路牌，亦都出現過「墜機」標誌。小妹希望當局會一併作出改善。
Kelly Chu
