萬眾期待嘅政府消費券，第一期$2000星期日(8月1日)就到手喇！確實諗起都興奮！我有啲friend 一早已瞄準「心頭好」，準備好一炮過買之前十五十六唔捨得嘅大額嘢，亦有friend 話鍾意細水長流「慢慢搣」，總之就各適其適、齊齊興奮啦。可以肯定嘅係，大家手上多了這筆意外之財，行街食飯買嘢時心情會爽啲，手都梗會爽啲。
萬眾期待嘅政府消費券，第一期$2000星期日(8月1日)就到手喇！
早幾日我睇新聞，見到話成個消費券計劃至今已收到超過650萬個登記，即係全港超過九成市民都已經登記咗。當中大約500多萬個係頭兩個星期成功透過電子登記嘅市民，就會率先係星期日拎到第一期$2000嘅消費券，計番條數，即係相等於即刻向本地市場注入大約100億元的消費力，規模確實龐大！難怪近日行係條街，發覺唔少鋪頭都已經加裝咗電子支付工具，對於在疫情期間「餓」左生意好耐嘅本地零售飲食界嚟講，睇嚟已經磨拳擦掌準備好，爭取呢筆龐大消費額！
消費券計劃至今已收到超過650萬個登記。
雖然話頭兩個星期上網登記嘅，都可以係星期日收到錢，但我都「八掛」到有啲個案，似乎係差啲手續未搞掂，所以未必可以係星期日收到券。我於是乎就向局中人打聽下，他們話的確係有啲咁嘅情況。例如，有登記人被選中要就「在港居住」聲明作抽查，但佢哋就無跟指示聯絡Deloitte（德勤），而Deloitte又搵唔到佢哋；又或者佢哋未能及時交齊所需嘅證明文件比Deloitte做核查，咁呢啲情況下個登記就即係未完成，未可以攞券住。
又有一種情況，係市民做電子登記時，選擇以上載身份證複本作身分認證，不過，佢哋係7月17日或之前，仍然未上載身分證複本，咁個登記都係未完成嘅。如果大家對自己係咪成功登記有所懷疑，或者想知自己登記的進度、使唔使再交文件或其他證明的話，可以打熱線電話18 5000，透過簡單的語音系統查詢自己的登記情況。我自己都用過條熱線，好快駁通，輸入少少資料就成功查詢到，都算幾方便。
差啲手續都唔緊要，只要盡快補齊返所需文件，在獲核實資格後仍可以在9月1日獲發第一期消費券。
不過，即使遇到呢啲情況，大家都唔使太過傷心，事關你只要盡快補齊返所需文件，在獲核實資格後仍可以在9月1日獲發第一期消費券。至於八月份點算？宜家外面咁多優惠，唔使旨意忍到手㗎啦，大家因自己需要預先駛啲，提早幫手促進下本港經濟，大家開心啦。
消費券步入發放階段，我聽聞各間儲值支付工具營辦商都緊張為系統做最後測試準備，希望派發當日一切順暢。不過，市民初次用起上嚟嘅時候，可能始終都要「摸一摸」。其中聽講Tap&Go「拍住賞」就好想提醒用戶，要將消費券帳戶入面嘅虛擬Mastercard卡和虛擬銀聯卡加到Apple Wallet、Google Pay或雲閃付app，先可以於本地實體商戶用消費券俾錢喎。咁大家預先聽話set好，到用券時就爽上加爽啦。
消費券步入發放階段喇！
到底星期日消費券派發日市面的情況會係點呢？各商場食肆人流又會有幾暢旺呢？相信坊間好多口痕友以至政府官員嗰日都會睇到實！
容義用
** 博客文章文責自負,不代表本公司立場 **