疫情持續下百業蕭條，人人都勒住荷包唔使錢，但求填飽個肚餓唔死就算。結果令被譽為窮人恩物嘅「兩餸飯」舖頭開到成行成市，成為逆市奇葩。聽聞油麻地有檔兩餸飯舖長期排長龍，龍尾排到去街口。
兩餸飯係夠經濟，但自己煮其實咪仲慳。@tvbcomhk TVB聽晚推出全新飲食節目《三餸一湯》，由三姐蕭秀香搭住御用女傭@lesleychianglove 姜麗文主持，逢星期一至星期三晚上10點半喺翡翠台播出。
第一集三姐會教大家煮「不敗番茄炒滑蛋」、「香煎排骨蒸福袋銀針粉」同「港式煲仔魚飯」，而Lesley就會分享廚房小秘技，包括剩菜大翻身、十分鐘煮好懶人和味飯同疫下強身健體餐等等。
自命天才小廚師嘅豬視妹，已經講明要我睇，迫我學番幾招旁身喎。
霸戲哥
** 博客文章文責自負,不代表本公司立場 **