呢個星期最威係我偶像阿Sa，一連有兩套擔正嘅電影上映，分別係《神探大戰》同埋《給我1天》。由邱禮濤監製、李敏編導嘅《給我1天》，原本喺2022年2月22號上映，可惜疫情關係一改再改，終於喺今個月23號上映，而Disney+亦喺同日晚9:30獨家串流上線。

套戲講述王祖藍飾演患「漸凍人症」嘅畫家，想喺病情惡化前向阿Sa飾演嘅小學同學表白。王祖藍做咗無綫創意官之後，大家似乎忘記咗佢嘅演員身份，呢套戲正好remind番大家佢其實係演技派。至於阿Sa就唔使講啦，拍愛情催淚戲可以話係手到拿來。

漸凍人症，又名肌萎縮性脊髓側索硬化症（Amyotrophic lateral sclerosis，ALS），係一種漸進嘅神經退行性疾病。由於上、下運動神經元退化，導致身體肌肉萎縮，患者最終喪失控制自主運動嘅能力。當年有人喺社交媒體發起冰桶挑戰（Ice Bucket Challenge），令更多人深入了解呢種罕見疾病。而呢個Challenge，相信係歷年咁多個Challenge之中最有意義嘅一個。

唔知阿Sa呢套《給我1天》，又能唔能夠令更多人認識ALS？




霸戲哥

** 博客文章文責自負,不代表本公司立場 **