姜文杰：「咁多年嚟，我都等緊一個叫Alton嘅人出現！」
姜文杰（Benji）前晚 (31日) 現身新城廣播接受潘紹聰主持的《恐怖熱線》節目訪問，大談靈異經歷。Benji直言一向尊重神佛及靈體，亦相信萬物有很多解釋不到的東西，雖然自己曾好奇會否看到靈體，但近年接受了看不到也是好事。
姜文杰接受新城《恐怖熱線》潘紹聰訪問。
Benji有一件靈異事件跟人氣男團MIRROR成員王智德（Alton）有關，源於爸爸秦沛在Benji未出世前，替親友照顧一名叫Alton的男孩，「爸爸好鍚Alton，但好不幸地，Alton有年發高燒離開咗人世，我爸爸好唔開心，因為Alton係佢湊大，而當年我得幾個月大。」而怪事亦由此發生。
當年Benji家住沙田一間獨立屋，而秦沛因Alton的離開深受打擊，正在家中借酒消愁，突然他聽到BB房傳出笑聲，入到房中觀看，看到幾個月大的Benji正望着天花板的風扇哈哈大笑，「就好似有人喺天花板同BB玩咁，一路喺度笑，個風扇亦都郁緊，嗰刻我爸爸諗到會唔會係Alton返咗嚟同我玩，但佢出於父親對兒子嘅愛護，突然衝口而出講咗一句『係咪你？返嚟探我唔緊要，唔好嚇親我個仔』，爸爸講完之後即刻好後悔，最詭異嘅係，當時啲窗閂晒，突然打開咗，窗簾吹吓吹吓，爸爸感到佢走咗，之後亦冇再發生類似事件。」
Benji有一件靈異事件。
竟然跟人氣男團MIRROR成員王智德（Alton）有關？
在Benji一家移民前，他的母親曾在家中遇見一個靈體，某日有個auntie拿住相片，告訴Benji有一位哥哥很愛鍚他，原來這位哥哥正是Alton，「我媽咪見到張相，話就係佢見到嘅靈體，可能佢知道我哋移民，同我哋講拜拜。」
Benji早前與MIRROR的Alton拍劇，他指Alton有日拍完一場喊戲後情緒很波動，「咁啱我帶咗盒米高積遜(Michael Jackson)嘅玩具畀佢，原來佢好鍾意米高積遜，然後我同佢講，咁多年嚟，我都等緊一個叫Alton嘅人出現，好想將呢份玩具禮物送畀佢，今次真係圓咗夢，亦係緣份。」
姜文杰憶述童年窩心靈異事 與爸爸秦沛及MIRROR成員Alton有關
更多更詳盡精彩內容，請重溫8月31日，晚上11時至凌晨1時正，新城知訊台《恐怖熱線》節目 ，重溫網址：https://www.metroradio.com.hk/MetroInfo/
