估佢唔到~
無綫處境劇《愛•回家之開心速遞》，收視節節上升，劇中不少「搞笑」角色更成為觀眾茶餘飯後的討論焦點。當中戲份不重，但每次出現都十分搶鏡的「食屎陳師奶」，因慢條斯理的講對白方式，竟深受觀眾愛戴，最近更被網民封為「《愛‧回家》女神」的第四位。
孫慧蓮從小夢想做演員，九六年開始在港台做特約演員，入行至今廿三年。(東周刊圖片)
「陳師奶」的真名叫孫慧蓮（Helen），原來她曾是一名威嚴的小學訓導主任，並於五間不同的官立小學任教，執教鞭長達三十九年。現實中的孫慧蓮為人斯文有禮、言談大方，與劇中八卦矯情的「陳師奶」絕對是兩種人。
幕前形象搞笑，八卦矯情的「陳師奶」，原來是退休訓導主任真係估佢唔到。(東周刊圖片)
「食屎陳師奶」的真正身份十分神秘，因為她並非無綫的合約藝員，只是特約演員，起初在片尾的演員表，連名字都沒有。原來，她的真名叫孫慧蓮，英文名Helen；至於芳齡幾多？她說是秘密，但肯定自己經歷過日本仔打香港的三年零八個月。年輕時，她畢業於葛量洪師範學院，由五九年開始執教鞭，教過五間官立小學，主要負責體育科，亦曾擔當訓導主任。任教將軍澳官立小學時，她便與Ben Sir歐陽偉豪做過同事，一起處理訓導的工作，她憶述：「Ben Sir好高大又有威嚴，學生幾驚佢；同埋，佢好勤力教書之餘，夜晚又去進修。之前，佢拍《睇樓團》，我有份客串，佢都仲叫我孫主任。」
昔日的她果真是靚女一名。(東周刊圖片)
在三十九年的教書生涯，孫慧蓮桃李滿門，在任教觀塘官立小學時，羅家英亦曾是她的學生。至今，羅家英仍與她保持聯絡；而在其眼中，他是位非常尊師重道，勤力的好學生。多年來，她非常享受教書工作，因此沒有轉行；直至九六年一個機緣巧合下，她見到港台招募特約演員，便膽粗粗去面試：「我細細個夢想係做演員，咁咪去試吓，不過以前環境問題，又話娛樂圈黑暗；加上我父母好保守，屋企係詩禮傳家，當年女仔出路都係做護士或者教書，本來考咗那打素護士學校，但最後就去咗葛量洪師範。其實，我冇乜興趣讀書，所以最後修讀體育，做體育老師，但都有教數學、美勞。」其後，她還兼任訓導主任一職。
其實，做訓導主任並非易事，要恩威並施，經常擔當惡人的角色。不過，她說自己唔惡死，至於威嚴的一面，是學習就讀德貞小學時的一位訓導主任：「可能我學晒佢啲嘢，不過我啲學生都好乖嘅，以前個年代，我係叫木工老師，鋸一把木尺畀我增加威嚴，都好重o架！到咗九十年代之後，有一排好多學生跳樓，雖然我未遇過，自己見到啲新聞都會有壓力，所以對學生管教都係就住就住啦！」
連羅家英也是她的學生。(東周刊圖片)
