阿仔可能要背出師表，為了讓他容易點記得，我做了個現代版比佢，內容如下：
一位行政總裁出差前寫給太子爺的一封信：
你老豆搞呢檔嘢搞到唔湯唔水，一句唔該仲瓜埋老襯，而家出面七國咁亂，我地勢孤力弱，隨時都有反艇嘅可能。一斑老伙計仍然勞心勞力咁撑落去，純粹因為你老豆舊日對佢地有恩，佢地為左報答你老豆，所以大家先射住你。所以你最好聽教聽話，唔好丟你老豆架，唔好搞到大家無心機做野，更加唔應該仲當自己係細路咁亂咁講野，搞到一斑世叔伯都冇晒聲出。
對於伙計要一視同仁，所有賞罸應不分親疏，正所謂有錯要認，打要企定，咁先顯得你處事公正。唔好包庇你班豬朋狗友，如果唔係，比人話你大細超就唔好嘞。
郭大叔，費大叔同埋董伯伯都係老實人，全部都係你老豆揀出黎過你用嘅。我認為內部嘅事，事無大小，問過佢地先好做，就肯定唔會「賴」野。
向大叔又係好人一個，你老豆用過佢之後都話佢掂，所以大家先將外邊嘅事交比佢管。我認為外邊嘅事，你全部交晒過佢揸主意，咁就實冇衰嘞。
信好人唔信壞人就肯定好嘞，之你話信壞人唔信好人呢，咁就死梗嘞，呢個道理你老豆都成日同我地講嘅。一班老臣子都係好人黎嘅，你信晒佢地，檔嘢就一定掂嘞。
我原本只係個宅男，本來就冇想過要發達，係你老豆唔知癡左邊條根，摸門釘摸左幾次都仲要黎揾我，問我呢檔嘢應該點搞落去，我一時感動就唔覺意應承左出黎幫佢手。後來先知佢形勢原來真係咁惡劣，我臨危受命，唔經唔覺咁就做左二十一年。你老豆一向都知我掂，所以臨瓜老襯之前都叫我好好睇住檔嘢。自此之後，我每日幾乎做足廿四粒鐘，仲驚死做得唔夠，對唔住你個死鬼老豆，所以我係五月天時，都親自去埋啲山卡拉地方做嘢。好嘞，而家終於攪掂晒啲手尾，冇晒後顧之憂，係時候擴充業務嘞，我要親自出去主持大局。其實呢個先係你老豆當初搵我返黎嘅真正目的。至於內部其他啲濕碎嘢，嗰啲其實係小郭、小費同老董嘅責任。
呢單嘢，我去，如果唔掂，郁我。剩低啲嘢如果啲「靚」做唔掂，郁佢地。至於你，就好自為之，要聽教聽話，唔好丟你老豆架。我就走喇，走之前寫啲嘢，寫吓寫吓，其實連自己都唔知自己寫左啲乜。
http://web2.tcssh.tc.edu.tw/school/guowenke/books/guanzhi/15-5.htm
杜聽濤
** 博客文章文責自負,不代表本公司立場 **