風水卦
作者: Stephen
文王卦除咗可以占姻緣桃花，事業錢財，流年吉凶之外，仲可以用嚟占家宅風水。今次同大家分享朋友Ａ既一支風水卦。
每支爻都代表屋入面唔同既地方。例如初爻代表地基，二爻代表廚灶，三爻代表房門等等，可以從中窺探屋內外風水吉凶。
睇返朋友Ａ支卦，占卦當日係庚子年，丁亥月，甲戌日，申酉空亡。本卦山雷頤，變卦山澤損，全卦獨發於二爻。
先睇子孫，為伏神於五爻，飛神受日子剋，子孫伏神出伏，可惜入日子墓，全卦亦無其他動爻變爻沖佢出墓，就算有兄弟卯木生旺都無用，一衰！
二睇妻財，財爻兩現，世爻持財值日，本應係好事，但受二爻兄弟化進神剋，仲要係合住嚟剋，大大增強剋財之力。
另一財爻喺三爻，但受日子沖。兩支財爻都受傷，判支出大大多於收入，而且生財之力受制於日子，前後夾擊，難怪朋友Ａ成日都為錢銀而煩惱。二衰！
三睇兄弟爻，於二爻持朱雀，所謂朱雀持兄，家宅不寧，仲要化進神剋世。世爻受剋受沖絶對唔係好事，三衰！
當時我建議，反正係租人樓，不如搵過另一間，事關間屋「爛」成咁，「醫」好都嘥藥費！而且過多兩年係寅年同卯年，正正係剋財既地支，唔搬既話睇怕都要食穀種！
最近收到朋友Ａ訊息，原來佢上兩個月已經搬咗，搬咗之後發現財運有明顯改善！可喜可賀！佢仲提到交樓比業主嗰陣，比業主發現房門個鎖壞咗，屈咗我朋友五舊水整返。
睇返支卦，三爻係房門，受日子沖，難怪！
喺度祝賀朋友Ａ搵到個安樂窩！
祝大家身體健康，生活愉快！
#風水
#文王卦
香港兔蘆術數學會
** 博客文章文責自負,不代表本公司立場 **