第十八屆香港藝術發展獎｜汪明荃獲頒「終身成就獎」莫華倫吳思遠嚴迅奇齊得「傑出藝術貢獻獎」

娛圈事

第十八屆香港藝術發展獎｜汪明荃獲頒「終身成就獎」莫華倫吳思遠嚴迅奇齊得「傑出藝術貢獻獎」

2024年06月03日 15:45 最後更新：16:10

藝發局率先公布「第十八屆香港藝術發展獎」兩大獎項。

香港藝術發展局（藝發局）於今日（6月3日）率先公布「第十八屆香港藝術發展獎」兩大獎項「終身成就獎」及「傑出藝術貢獻獎」得獎名單。其他獎項得獎名單將於2024年6月11（星期二）假香港大會堂舉行的頒獎禮上公布。

點擊看圖輯

「第十八屆香港藝術發展獎」頒獎禮將於6月11假香港大會堂舉行。

汪明荃

莫華倫

吳思遠

嚴迅奇

自2003年起，「香港藝術發展獎」積極表揚在各藝文領域具卓越表現及貢獻的藝術工作者和團體，鼓勵社會各界支持及參與藝術發展，並為香港藝壇提拔後起之秀，建構藝術文化之都。

觀看相關影片按連結：https://youtu.be/ABWMJFPyHHA

本年度最高榮譽大獎—「終身成就獎」得主為著名演藝及戲曲界全才藝人汪明荃博士。汪博士從藝超過50年，多年來積極弘揚傳統粵劇，出任香港八和會館主席，推動戲曲保育、承傳、培育及觀眾拓展，為業界默默耕耘逾20年，致力促進粵劇藝術發展，提升本地粵劇藝術水平。汪博士對香港藝文發展卓有貢獻，藝術成就備受尊崇，獲獎無容置疑。

「傑出藝術貢獻獎」的三位得主，分別為世界知名男高音歌唱家莫華倫博士、資深電影製作人吳思遠先生，以及蜚聲國際建築師嚴迅奇博士。莫華倫博士致力弘揚歌劇藝術，創立香港歌劇院，積極培養本地歌劇人才，嘉惠良多；吳思遠先生多年來熱心促進電影業發展，憑創新的發行策略將香港電影推上國際舞台，向海外展示本港影視實力，堪稱「影壇教父」；嚴迅奇博士的建築作品揉合中西文化，於海內外均享負盛名，近年積極推動業界學術交流，致力培育未來建築界棟樑。

除了已公布的「終身成就獎」及「傑出藝術貢獻獎」外，其餘五大獎項：「藝術家年獎」、「藝術新秀獎」、「學校藝術教育獎」、「藝術推廣及教育獎」及「藝術贊助獎」之詳細得獎名單將於頒獎禮當日公布。

往下看更多文章

阿姐汪明荃演唱會請Anson Lo做嘉賓合唱鄭少秋歌曲

2024年11月25日 22:00 最後更新：22:15

阿姐演唱會好多藝人捧場。

一連兩場「信興集團呈獻：阿姐•汪明荃演唱會 2024」尾場已於昨晚（24 日）於紅磡香港體育館圓滿完成，胡楓、薛家燕、狄波拉、姜大衞、李琳琳、張德蘭、張繼聰、謝安琪、劉雅麗、林奕匡、陳恩碩、黃妍和歐信希等均是座上客，表演嘉賓則分別為楊千嬅、容祖兒和 Anson Lo 盧瀚霆。

汪阿姐繼續以黃金、紅寶石、珍珠、翡翠和鑽石共 5 種珠寶顏色造型在台上和觀眾見面，在唱畢《傾城之戀》後，汪阿姐說：「當初我邀請呢位歌手做我今次演唱會嘉賓嗰陣，佢話俾我知要度期，原來佢本來有演唱會係同我今次演唱會嘅日期非常接近，但係佢專登調動檔期去配合我，所以我真係好多謝佢，好！我哋多謝楊千嬅！」

此時，千嬅從升降台升到台上，走到汪阿姐身旁後先和全場觀眾打招呼，汪阿姐說：「我記得有一次妳開演唱會，我做妳嘉賓，我就特登學咗一首妳嘅歌唱俾妳聽，不如我哋唱呢首歌回憶吓？首歌係幾耐之前？」千嬅說：「我要分享吓呢首歌，呢個係我第一次同阿姐建立嘅緣份，應該係20 年前喺《開年大典演唱會》，嗰陣好膽粗粗，因為覺得阿姐好代表女性精神，我張演唱會海報都係楊門女將造型，係好似着住盔甲當兵嘅衫咁樣。我記得當日我好緊張咁想請阿姐嚟，但去到 show 嘅時候，我把聲好唔舒服沙咗，但係阿姐嚟到真係好冷靜，佢話千嬅唔緊要啦，今晚我坐埋一邊，佢唱俾我聽。」汪阿姐說：「但係當時你唔知我唱咩歌？」千嬅說：「唔知，因為當時阿姐係瞞住我，同編呢首歌嘅鋼琴老師秘密練咗兩星期，叫咗我嘅造型師做咗一套衫，去 match我嗰一 part 去做呢次演出，我好感動。阿姐當時俾我嘅印象就係好有義氣，同埋好大愛，俾咗好多 support 喺我嗰個演唱會度，雖然我係泣不成聲，但係呢個記憶喺 20 年後嘅今日，我終於可以同阿姐喺返呢個舞台度表演一次，多謝阿姐妳俾咗個機會我，你對我嘅人生演藝成長路俾咗好多鼓勵同支持，感謝妳俾呢個機會我，等我可以返嚟紅館嘅舞台同大家演出，多謝妳！」

汪阿姐：「好期待妳嘅演出，咁我哋而家唱呢首歌好唔好？」千嬅：「好呀，有啲緊張㖭。」汪阿姐：「因為 20 年冇唱。」千嬅：「係呀，我由少女唱到變成中女，而家妳唱又變返少女。」兩人便合唱《少女的祈禱》。唱完此曲後，阿姐將個台交給千嬅，千嬅續說：「大家好，好耐冇見，好開心可以喺度再次為大家演出。感謝阿姐邀請我做佢演唱會嘉賓，除咗我可以再次返呢個舞台度同大家唱歌之外，最重要嘅一個原因係可以分享阿姐嘅音樂。我覺得阿姐俾到我最大嘅能量係除咗佢嘅勇氣同埋堅持，對學習嘅熱誠同進步之外，作為後輩可以得到佢嘅支持，呢一點係好重要。好感謝喺我每一個演藝嘅人生階段，阿姐都好似及時雨咁俾到我好多鼓勵，呢個係我好感動嘅事。今日可以唱阿姐嘅歌，我揀咗隻好有意思嘅歌叫《郎歸晚》，點解會揀呢首歌？因為呢首歌非常有意義，同埋所用嘅文筆非常之漂亮同凄美，當然有一種傷感，但係作為後輩有機會可以傳承阿姐嘅音樂，我覺得我要表達一份心意嘅時候，都要認真諗清楚到底呢首歌去到我嘅人生階段又可以代表到乜嘢？一首好嘅作品喺唔同嘅人生階段，可以唱到唔同嘅內容出嚟，去到今日我發現《郎歸晚》係講一種等待，一種思念，但係今日好想表達嘅係人生只要堅持，你亦都可以喺任何年紀，任何狀況去做到自己想做嘅嘢，令到自己嘅夢想成真，所以一切都係未晚，喺度送俾大家《郎歸晚》。」

及後當汪阿姐獻唱《問我》時，容祖兒突然現身台上和她合唱，唱畢此曲後，汪阿姐說：「歡迎容祖兒！」「妳真係好似一隻唔識飛嘅雀仔，冇時停，祖兒其實我哋係幾時相識？」祖兒答：「印象係好耐！」汪阿姐：「其實我哋係用同一個髮型師，嗰陣容祖兒好細個，佢嚟到我面前同我講我叫容祖兒，我係羅記羅文嘅學生，好有禮貌。嗰陣妳開始灌唱片未？」祖兒：「「嗰陣我驚妳唔識我。應該係啱啱開始灌錄咗一首歌。」汪阿姐：「妳而家已經係天后級，好嘢，妳嘅努力大家睇到。」祖兒：「我想講好開心，我嘅人生其中一個成就係可以同阿姐嘅距離拉到咁近，近到可以而家企喺佢個台度做佢嘅嘉賓，另外一樣嘢想同大家分享嘅就係阿姐食過我煮嘅餸。」汪阿姐：「哇！真係好犀利呀，係全餐，不過佢搞咗一日，煮嗰個意大利飯用咗幾多個鐘頭？」祖兒：「四個鐘，但係阿姐你鍾意食到要攞走。」汪阿姐：「打包唔好嘥吖嘛！」祖兒：「呢個係我人生成就。」汪阿姐：「我哋雖然唔係成日見面，但係如果妳喺香港，我哋都會通吓電話，去私房菜食返餐，佢識好多新嘅食嘢地方。」祖兒：「所以我其實都希望可以成日見到阿姐，在公在私，今次多謝阿姐邀請我做妳演唱會嘉賓，我好開心。」汪阿姐：「其實妳有首歌我好鍾意，我哋一齊唱呢首歌好唔好？」祖兒：「呢個係第二個成就解鎖，阿姐唱我首《我的驕傲》！」她倆合唱完後，汪阿姐將舞台交給容祖兒。祖兒：「阿姐慢慢，等妳有充足嘅時間換衫。大家好，我係羅文老師嘅學生容祖兒，今日好開心好榮幸可以企喺阿姐嘅舞台上面，亦都見到好多支持阿姐好多好多年嘅歌迷，希望大家會有一個好開心嘅晚上。今日揀咗一首阿姐嘅歌，阿姐有好多歌，所以都好難揀，唔知揀邊首好，但係今日呢一首係其中一首我好鍾意嘅阿姐嘅歌，《用愛將心偷》，送俾大家。」

汪阿姐於表演完《像白雲像清風》後說：「其實今次我開呢個演唱會，真係好開心，因為可以借住呢個機會，同我啲歌迷見面，又可以見到好多我啲好拍檔，仲有好多歌手朋友，有唔同嘅 Diva，亦都有年輕啲嘅歌手，搵佢哋做嘉賓，又個個都好好，全部都無拒絕。有一位，我話想請佢做嘉賓，佢就即刻俾咗個手勢我，話俾我知 ok ok，有請 Anson Lo !」Anson Lo 從升降台升到台上後音樂便響起《紫釵恨》前奏，汪阿姐即說：「吓！你唱鄭少秋嘅歌？」兩人合唱完此曲後，汪阿姐說：「多謝 Anson Lo，多謝晒你。」 Anson Lo 說：「多謝阿姐邀請我，Hello，我係 Mirror 嘅 Anson Lo 盧瀚霆。」汪阿姐問 Anson 出道多少年，Anson 答她今年是出道第 6 年，汪阿姐讚嘆道：「你已經有咁多 followers，犀利，你一定係好勤力，做得好好，所以有咁多人擁戴，繼續加油。」Anson：「做好每一日嘅本分，唔好令到支持我嘅粉絲，支持我嘅神徒，支持我嘅觀眾同朋友失望，盡自己努力。」汪阿姐：「要做好自己！點解會請你做嘉賓？其實我哋係咪好熟？好似唔係好熟。」Anson：「本身我哋唔係好熟，但係每一年我哋起碼都會見一次，就係拜年嘅時候，咁就同妳拜過幾次年。每次去阿姐度拜年都好多嘢食，佢嘅蘿蔔糕好好食，又可以飲到阿姐嘅湯，總之拜年嗰日嘅早餐午餐都千祈唔好食。」汪阿姐問：「點解你會唱呢首《紫釵恨》？其實呢首歌係 Anson 揀，唔係我揀，點解呢？」 Anson：「首先我要多謝阿姐妳俾咗好大嘅自由度我去揀妳嘅歌，我覺得呢一首歌係你其中一首經典之作，妳會唱得好有女人味，好有風情，好 Classy 好高貴，好有感情，有好多 Story 嘅感覺，我每次睇妳嘅演出，同唔同嘅單位唱呢首歌，完全係視覺同歌聲上嘅享受。今日好開心，除咗唱呢首歌之外，我仲嗲咗阿姐好耐，問佢可唔可以唱多一首歌？」汪阿姐：「呢首歌好配合個環境，全部都係粉紅色！好，我哋就唱呢隻《迷人 Pink Lady》。」唱畢此曲後，汪阿姐說：「你好鐘意呢首《迷人 Pink Lady》噃！」Anson：「梗係鍾意啦，有邊個唔鍾意呢首歌。」汪阿姐：「好多人羨慕我可以握住 Anson Lo 隻手。」Anson：「好多人羨慕我可以捉住阿姐隻手就真，今晚我全家都嚟欣賞妳演唱會。」之後汪阿姐便把舞台交給 Anson Lo。

Anson Lo 獨唱前說：「首先好多謝好榮幸可以接受到阿姐嘅邀請，好榮幸可以做到阿姐演唱會嘅嘉賓，呢一個演唱會嘉賓係我自己諗都冇諗過，一定係我人生同事業嘅里程碑，在座有我嘅全
家同我嘅親戚，我爹哋媽咪同我家姐都嚟咗睇，佢哋都覺得係一件好開心嘅事。呢個絕對係一個好大嘅榮幸，阿姐喺香港嘅娛樂圈真係一個經典，亦都係一個影響咗香港咁多年以來嘅文化嘅一個 icon，所以好想大家喺呢個時候用掌聲再次多謝阿姐。」「真係好多謝阿姐可以俾機會我上到呢個舞台，係一個好珍貴嘅回憶，我重新可以踏上呢個舞台同大家一齊，可以表演俾大家睇，而表演永遠係我自己最鍾意，永遠都唔會放棄嘅一個項目，我一定會用 100%回饋返俾所有觀眾。」「我本身對阿姐嘅印象係一個冰山雪人美女，阿姐佢好有禮貌，嗰陣我真係同佢唔係咁熟，我唔係好夠膽同佢講嘢，我淨係記得第一次拜年嗰陣，我只係默默低頭喺度食，食晒佢嘅蘿蔔糕，而我記得阿姐第一次同我嘅對話係問我要唔要攞一底返屋企？咁最後我真係有攞到，因為真係太好食，我諗阿姐整嘅蘿蔔糕係我人生食過最好食嘅蘿蔔糕。之後再次去拜年，或者
喺唔同嘅工作環境見到阿姐同家英哥，佢哋就冇咗當初嗰種我自以為感受到嘅距離感，因為佢哋係一對好栽培後輩、好錫我嘅長輩，甚至乎係喺我路途上好緊要嘅老師。阿姐今次邀請我做嘉賓，當我哋喺排練室綵排嗰陣，我都感受到阿姐嘅愛，因為每一次唱完之後佢都同我講你真係唱得好好喎，好多謝阿姐真係好 support 我。唱歌方面佢俾咗好多 advice 我，點樣可以唱佢嘅歌再唱得好啲，佢又同我講想加啲其他嘢都得。」之後 Anson Lo 便跳唱了他的《Hey Hey OK!》給大家欣賞。

在 Encore 環節時汪阿姐說：「咁多年嚟，我都好享受喺演藝界嘅工作，由演員，歌手，到粵劇演員，去到一啲行政嘅工作，為業界去貢獻，每一個崗位，我都會盡心盡力，因為我知道，大家都對我哋嘅演出有期望，有要求，所以我先可以不停改進，不停增值。喺度要多謝你哋嘅支持，陪住我一直行呢條娛樂之路，同我一齊享受呢個美麗嘅世界。」最後汪阿姐以《Make my day》為一連兩晚「阿姐•汪明荃演唱會 2024」畫上圓滿句號。