鍾慧冰:「我要條命!」
67歳前港姐鍾慧冰(冰姐)日前到新城廣播接受薛家燕、思敏和范振鋒主持的《開心大派對》之「開心家訪」訪問,冰姐透露和家燕姐已廿多年沒坐在一起聊天,對上一次是兩人誤買「縮水舖」事件,家燕姐苦笑稱:「廿幾年前我哋曾經共度患難,我買咗百幾萬,完全開唔到舖,話有百幾呎,但中間有條柱,賣返出去十二萬,嗰時有百幾人『中招』,好大新聞,我仲去咗港督府請願。」冰姐即謂:「我慘過你,除咗縮水舖,仲買咗縮水樓。」
![鍾慧冰接受新城《開心大派對》訪問。](https://image.bastillepost.com/1200x/wp-content/uploads/hongkong/2024/08/20240813_EN_ChungWaiBing_source-web_1-e1723533586916.jpg.webp)
鍾慧冰接受新城《開心大派對》訪問。
家燕姐和冰姐又在節目中大談健康,不過熱愛工作的家燕姐,曾拒絕經理人兼大女兒珊珊安排給她的悠長假期,家燕姐表示:「我話唔好,我一休息就好閉翳,冇活力令自己扮靚出去見人,覺得自己冇用咗,我話幾日假期就得,我寧願做嘢,做嘢反而頭腦仲靈活啲,唔會同社會脫節,所以長者真係要多啲參與活動,令自己開心啲。」
![冰姐為血管炎戒煙戒糖戒凍飲。](https://image.bastillepost.com/704x/wp-content/uploads/hongkong/2024/08/20240813_EN_ChungWaiBing_source-web_2-e1723533611259.jpg.webp)
冰姐為血管炎戒煙戒糖戒凍飲。
冰姐重提自己2016年突然患上血管炎,以致右手和右腳不能郁動,「係免疫系統出咗事,自己打自己,襲擊我啲神經,同埋我啲血管發炎指數好高,右手右腳唔郁得差唔多年幾,啲手指完全冇力,連名都簽唔到。」家燕姐聞言即謂:「嘩,好大件事喎!」冰姐續說:「佢哋話呢個病好容易就走(死亡),因為冇藥食,惟一可以食類固醇,但食得多又唔好,我食咗三個月,一日食9粒,食到塊面腫晒,變咗豬頭咁,好彩慢慢控制到。」
![冰姐大爆與家燕姐同是縮水舖苦主。](https://image.bastillepost.com/1200x/wp-content/uploads/hongkong/2024/08/20240813_EN_ChungWaiBing_source-web_3-e1723533623154.jpg.webp)
冰姐大爆與家燕姐同是縮水舖苦主。
後來冰姐用了兩年時間才慢慢可以走路,但康復的路仍十分漫長,除了要做物理治療,還要每4個月驗一次血檢查身體發炎指數,「一出事我就戒煙,因為我要條命,又完全唔飲凍嘢、戒糖,經常保暖,以前凌晨3點先瞓,依家9點幾就瞓。」冰姐更表示:「我忍受唔到成世右手右腳唔郁得,除咗去廁所識自己去,乜都做唔到,好痛苦,同個癈人咁,所以我同自己講一定要好番。」家燕姐讚她:「好叻女,大步檻過。」
![左起:思敏、薛家燕、鍾慧冰、范振鋒](https://image.bastillepost.com/1200x/wp-content/uploads/hongkong/2024/08/20240813_EN_ChungWaiBing_source-web_4-e1723533663961.jpg.webp)
左起:思敏、薛家燕、鍾慧冰、范振鋒
詳細精彩內容,請重溫8月10日,下午3- 4時,新城知訊台《開心大派對》節目 ,重溫網址:https://www.metroradio.com.hk/MetroInfo/