張敬軒成史上第一人破澳門演唱會紀錄一年開三十場 視象藝術結合裝置藝術翻唱天后經典

張敬軒破咗澳門演唱會紀錄！

《Dahlia Blossom HINs CHEUNG PRIME CLASSICS LIVE 2024 張敬軒澳門演唱會》於10月18日在澳門倫敦人正式展開。未夠一年，軒仔再次受邀到澳門倫敦人演出，一年內於澳門舉行了三十場的演唱會，絕對破了澳門演唱會史上的紀錄，認真厲害。

《Dahlia Blossom HINs CHEUNG PRIME CLASSICS LIVE 2024 張敬軒澳門演唱會》

張敬軒一年內於澳門舉行了三十場的演唱會

張敬軒破了澳門演唱會史上的紀錄

這次演唱會是「THE PRIME CLASSICS」的第三章

這次演唱會是「THE PRIME CLASSICS」的第三章，軒仔以五套全新歌衫演出，當中一套全身黑色閃閃連身衫，配頸上的大理花飾物，設計靈感來自軒仔，「我嘅服裝設計師Kenneth問：『你想有套咩衫呀？』我話可唔可以唔好成日都好似盔甲、去當兵嗰啲咁樣，可唔可以好似睡衣咁，我喺屋企真係咁樣着，但唔係咁閃嘅，我係鍾意着啲好貼身或者好似呢個咁樣飄吓飄吓嘅衫。我係嗰啲quite elegant，好低調嘅華麗，點知佢又整咗呢件好似有4萬幾粒水晶嘅衫俾我。」引來全場大笑。而為演唱會打開序幕的閃石開胸西裝，是以七萬粒水晶釘裝而成、重量超過四十磅，亦是出自Kenneth的手筆。

張敬軒以五套全新歌衫演出

當中一套全身黑色閃閃連身衫

除了新衫，歌單亦作大幅度調整。

演唱會後，不少歌迷及網民都十分感動，大讚軒仔貼心。

除了新衫，歌單亦作大幅度調整，軒仔謂有人問他這個演唱會是否「換湯不換藥」，只是轉幾首歌，但軒仔說：「我可以話俾大家聽今晚有六成以上嘅作品都係舊年冇唱過嘅。」包括：陳慧琳《風花雪》、楊千嬅《少女的祈禱》、吳雨霏《我本人》、陳慧嫻《夜機》、彭羚《漩渦》、蔡玲玲《細水長流》及葉德嫻《不捨也為愛》等。演唱會上軒仔分享了不少過童年往事，「細個媽咪開咗一間卡拉OK，我逢星期五晚都會有自己一個嘅表演時間，陳慧嫻小姐八九年嘅告別演唱會係我嘅表演節目，我可以成個演唱會由opening唱到ending為止，為我奠定咗好多音樂基礎，最神奇就係冇諗過今時今日我哋係同屬一間唱片公司，慧嫻姐姐就嚟開演唱會啦，希望大家都會多多支持，我而家爭取緊可唔可以去做嘉賓。」隨後便唱出陳慧嫻的《夜機》。他續說：「去到二千年我阿媽開咗間麻雀館，我阿媽專做嗰啲嘢㗎，冇賭牌咋，有賭牌佢都應該開賭場㗎，我阿媽好鍾意玩兩手，所以我又喺麻雀館做過。」成長環境，加上是獨生子，他喜歡自己跟自己玩，亦很懂得跟自己玩，他坦言enjoy這種生活，「所以大家見到今日喺舞台上面嘅張敬軒，其實係一個好複雜嘅人，我都冇辦法去解釋。我覺得自己好似個城堡，有好多個窿，有好多間房，每一間房都裝咗唔同嘅嘢，有啲裝開心；有啲有本小氣簿記住邊個對我唔好我就會寫喺入面，哈哈；有啲永遠向人敞開；有啲房間鎖咗門之後連自己都唔俾入去，我哋每一個人都係一個複雜嘅結構，都係一個有好多間房嘅城堡，所以喺呢個城堡入面究竟係一個廢墟？定係一個屬於自己先至可以悠然自得嘅遊樂場呢？其實都係我哋自己決定。」

張敬軒再次受邀到澳門倫敦人演出

在演唱《故園花茶》、《雲裡的月光》及《細水長流》後，軒仔說道：「今晚呢個演唱會我有好多嘅期待，（然後轉普通話）其中我最期待是跟我的一位老朋友見面，因為疫情我們大概有六年沒見啦，他是我第一代的歌迷，我們已經成為朋友。知道今天晚上還有很多朋友從各地的省份飛過來看演唱會，有山東、北京、荷蘭、星加坡、西安、汕頭、杭州、天津、揚州、廈門，謝謝。」而重現紅館show《俏朗君》波波裝置一幕，亦是軒仔及演唱會監製莊少榮（細榮）特別為歌迷而造，當時因為疫情，除了外地歌迷未能到港睇show，亦因為限聚令，甚至令香港部份歌迷亦未能入場，「疫情呢幾年，除咗犧牲咗我哋喺生活上嘅好多習慣，亦都令到我哋同好多嘅朋友分隔得好遠好遠，尤其今晚在場嘅一啲朋友，喺疫情當中未能嚟到香港睇我嘅兩個非常非常重要嘅演唱會，《盛樂》同埋我自己二十周年嘅演唱會，所以我諗咗好耐，我好希望藉住呢個場地，可以將一啲好難忘嘅瞬間、好多嘅想法同表演、當中嘅一啲moment，喺今晚呈現俾大家。」演唱會後，不少歌迷及網民都十分感動，大讚軒仔貼心。隨後軒仔更在Threads透露昨晚本來遇有兩細榮的設計的效果，可惜由於技術及溝通問題暫時未能執行，他又共開「呼籲」大家：「大家幫我去氹吓佢好冇」十分搞笑。

張敬軒特別在社交媒體上溫馨提示大家「睇show的禮儀」

演唱會前，軒仔又特別在社交媒體上溫馨提示大家「睇show的禮儀」，軒仔表示十分滿意，不過經常喜歡互相傷害的軒仔及他的歌迷又再「互相傷害」，軒仔謂：「今晚我覺得好開心，可能佢汲取咗去年嘅教訓，冇人大嗌、冇人亂講嘢……」話音未落，即有觀眾大嗌，軒仔一副生無可戀的表情，「佢係咪嗌除衫？老公？你周街嗌人老公嘅咩？你兩條友如果再係咁嗌，我真係發嬲俾你睇！」歌迷竟即起哄叫好，軒仔說：「嗱，你哋拎起電話，我錄一段俾你哋返屋企留念，你哋想睇張敬軒鬧人吖嘛，呢期好Hit㗎呢句，『你7街瞓！』喺自己演唱會度着到咁靚，用鄉音叫人你7街瞓…… 唉！」立即爆笑全場。

軒仔指陳慧嫻是他人生之中其中一位偶像，亦可以話是他的音樂啟蒙老師。

張敬軒自去年於倫敦人綜藝館所舉行的兩個系列演唱會以來，一直反應熱烈，每次門票開賣均秒速售罄，又試過因為太多人擁入網站購票導致「冧server」，幾乎每次開show都一票難求。雖然今晚（11月17日）是尾場，但門票依然被黃牛炒至7000多元一張，十分誇張。

張敬軒澳門演唱會尾場門票被黃牛炒至7000多元一張。

由於今次演唱會門票供不應求，為了可以讓更多觀眾觀賞這個極具視聽享受的演唱會，加上軒仔為澳門帶來至少五億的經濟收益，澳門倫敦人及主辦方宣布加開2025年1月11、12、17及18日四場，作為明年倫敦人綜藝館獨家駐場演出的頭炮之作。

金沙中國有限公司娛樂統籌部地區副總裁貝思禮表示：「我們很高興張敬軒選址倫敦人綜藝館舉辦這一系列破紀錄的精彩演出，這亦是澳門首個成功的駐場演唱會。這一里程碑再次彰顯我們致力於將世界頂級娛樂表演帶到澳門，為居民及遊客打造難忘的體驗。金沙中國一直全力支持澳門特區政府的經濟多元發展策略及積極推進『演唱會經濟』發展，助力帶動本地經濟增長。我們會持續在澳門發展成為亞洲頂級娛樂目的地的進程中發揮關鍵作用，並將支持更多像張敬軒這樣才華橫溢的樂壇巨星創下更多傳奇。」

張敬軒宣布加開2025年1月11、12、17及18日四場。

昨晚（11月16日）演唱會上迎來了一位特別嘉賓，軒仔指唱了十四場，昨晚是首次有種考試的感覺，「因為我人生之中其中一位偶像、可以話係我嘅音樂啟蒙老師嚟咗。」他回憶大約是九零年的時候，經常聽一張很經典的唱片及一個演唱會的錄影帶，「所以我覺得今晚係我嘅職業生涯當中一個十分之Remarkable嘅一晚，我要喺度多謝陳慧嫻小姐，多謝你。」

軒仔昨晚演唱會上迎來了一位特別嘉賓。

然後，軒仔對着慧嫻「表白」：「你知道嗎？你喺去讀書之前嘅演唱會，我真係由頭睇到落尾，我由Opening一路到Closing，甚至乎成個《跳舞街》嘅Step我都仲跳得出。以下呢首歌可以話係我未變聲嘅時候我唱得最似你，因為我學緊咬字，同埋我覺得你好靚，嗰個演唱會個頭紗同埋嗰條裙，我每次唱呢首歌嘅時候我都覺得好似有一個任務喺身，送俾大家呢首歌《夜機》。」隨後軒仔又向粉絲表白：「開演演唱會令自己叉爆電，因為有粉絲滿滿嘅愛。」

軒仔對偶像慧嫻「表白」。

去年張敬軒於英國倫敦Royal Albert Hall舉行三場《The Prime Classics HINS LIVE 演唱會》，令軒仔成為首位及打破在RAH連開三場的香港歌手紀錄。隨後軒仔將《The Prime Classics》的感動帶到澳門延續下去，於去年十二月至一月，於澳門倫敦人綜藝館舉行十五場演出，是為第二章節；來到今晚（17日）演唱會第三章節的最後一場，軒仔又再刷新了單一歌手一年內於澳門倫開騷的場次紀錄，同時亦打破了個人紀錄。

軒仔刷新了單一歌手一年內於澳門倫開騷的場次紀錄。

完show後，軒仔一如以往走到場館外跟「接放學」的歌迷見面，對歌迷的訴求有求必應，除了不斷向歌迷送上各式各樣的祝福。而未開show前，歌迷已於網上紛紛「呼籲」軒仔唱鄧小巧的《神愛世人》，昨晚「接放學」時，軒仔終首次唱出：「好好好，嗱，我未認真學隻歌，我第一次唱，我自己喺屋企沖涼房唱，我成日聽。」然後便唱出一段副歌，唱畢後笑說：「失禮晒小巧㖭。再一次多謝大家，大家玩得好開心，係玩我玩得好開心呀，哈哈。」

軒仔對歌迷的訴求有求必應。