曾傲棐 x Sinnie@Lolly Talk 狂串17首Medley 揀歌拗爆頭傾足兩個鐘電話

娛圈事

曾傲棐 x Sinnie@Lolly Talk 狂串17首Medley 揀歌拗爆頭傾足兩個鐘電話

2024年12月19日 22:00 最後更新：23:44

影片上架後，一直停留Youtube熱門音樂影片二十大，認真厲害。

踏入年尾，又是總結過去一年的時候，今年出道的樂壇男新人曾傲棐（Arvin）日前找來女團Lolly Talk成員Sinnie合作，一口氣唱出本年度歌曲精選Medley，影片上架後，一直停留Youtube熱門音樂影片二十大，認真厲害。

相關影片可以按以下畫面觀看：

雖然二人於幕前沒甚交集，但原來他們入行前已認識，更是一起busking的小伙伴。隨後Sinnie加入樂壇，Arvin亦於今年出道，Arvin謂：「適逢今年自己入行，年尾又想做啲特別小小嘅企劃，腦入面Sinnie就係我嘅不二人選。覺得大家以第二個身份再走埋一齊合唱嘅感覺好奇妙。」Sinnie亦謂自己十分喜歡Arvin聲音，二人喜歡的類似的音樂，「所以今次佢一邀請我玩，我即刻覺得要搞大佢啦。」於年尾來一個「年度歌曲大Medley」，揀歌成為最大難題，二人均表示「拗爆頭」，「我哋淨係傾揀啲咩歌都傾咗兩個鐘電話。我諗呢一啲歌就係我哋喺嗰一刻覺得好代表到我哋呢年嘅up and downs嘅作品。」Sinnie更說一次唱那麼多首勁開心，「就好似以前唱K去到最後一刻一定要點《勁歌金曲》嗰個感覺……好爽！」Arvin則指因為今年有不少作品在不同時間為他分擔了不同的情緒，「加上今年係第一年成為一個歌手，好想用一個特別嘅企劃為自己特別一年做一個紀念。」

眾多歌曲中，Arvin跟Sinnie均最喜歡《戀愛腦之死》 x 《解咒說明書》那一個部份，Arvin坦言這是當他跟Sinnie通電話時一個很random的想法，「無論係歌詞上定係音樂上，都好有一唱一和嘅感覺，咁不如我哋疊住唱囉。最後嘅效果我哋都好鍾意，覺得好有趣，可能有時一啲得意嘅創作就係咁即興先嚟得可貴。」

以前是Busking小伙伴，入行後二人未有機會合唱，這次再合作，二人大感奇妙，「大家各自用唔同嘅身份再次合作感覺真係好奇妙，感覺大家對音樂嘅睇法都成熟咗，好有一種『隔咗咁耐終於見番而我哋依然係一齊向前進』嘅感覺！」Arvin續說：「尤其見到Sinnie女團或者其他嘅發展都好成功，有一種感覺，覺得自己都要加把勁啦。又咁啱近年尾，今次嘅合作係為我帶嚟咗一啲小感動同埋溫暖。」

往下看更多文章

成就解鎖邀恭碩良合作曾傲棐爆與偶像見面第一句被問「著幾號鞋」

曾傲棐（Arvin）2025年首支派台作品《時間的碎片》日前上架，這次找來全新音樂班底合作，歌曲由徐繼宗作曲，小克填詞，探索他熟悉的因果循環和時間觀，編曲方面亦首度與偶像恭碩良（Jun）和蘇道哲合作，Arvin更力邀Jun擔任歌曲監製。

經歷去年的新人年後，新歌Arvin以成長為題，是他腦中發酵已久的想法，「係中五、六時嘅idea，成日都聽人講『早知乜乜乜啦』、『如果可以重新嚟過我一定會點點點』，但我覺得就算俾你重新嚟過，以你當時嘅思想、經驗，其實已經係做咗最好嘅選擇。與其不停咁返過去，不如放眼未來。有啲控制唔到嘅嘢就由佢啦，盡人事聽天命就係咁解，所以我將呢個idea講咗俾小克聽，佢就幫我寫咗呢份詞。」

觀看相關影片按連結：https://youtu.be/FeH37qTnsII

歌曲講述成長，Arvin在這首歌中亦成就解鎖，邀得偶像恭碩良（Jun）合作。他直言對Jun的第一印象並非因為打鼓，而是從幕後製作開始，「細個鍾意Eason、阿Paul黃貫中先生，好多好鍾意嘅作品嘅製作，好多時都會見到Jun嘅名，呢個就係我對佢嘅第一個印象，之後先係打鼓。我記得係2010年Eason Duo嗰個演唱會隻碟，佢打得好有感染力，見到佢打鼓enjoy個表情、個律動，令到我更加投入去聽隻歌。」Arvin表示Jun的作品很有溫度、感染力，很希望做出感染人的作品，於是膽粗粗邀請Jun合作。

Arvin坦言跟自己偶像合作，是一件很神奇的事，他曾想像過「藝人」是否表裏不一？但Jun跟他看到的，「好玩得，同佢做嘢冇乜壓力，因為佢真係一個好叻嘅人，諗到啲咩idea同佢講，佢就會試、就會做出嚟。」跟Jun的首次見面，亦令Arvin十分難忘，「我諗好多人認識阿Jun嘅第一隻作品就係《你着幾號鞋》，我同Jun喺Studio第一次見面，佢同我講嘅第一句嘢，唔知有心定無意，好好笑，因為我哋入去室內要除鞋換拖鞋，打開門佢就叫我：『喂！Arvin，你着幾號鞋㗎？』我已經笑到黐咗線，哈哈，呢個就係我哋之間嘅第一個conversation。」

隨後，Arvin又分享跟Jun創作歌曲點滴，「有陣時一啲靈感都冇，我記得Jun同我講：『要enjoy呢個好lost嘅moment，因為呢個你唔知點算好嘅moment就係呢隻歌最後出到嚟好神奇嗰個vibe嘅來源，你唔使驚，冇就冇啦，冇就落去食飯啦。』所以我哋係咁食飯嘅，哈哈！日日都係去同一間茶餐廳食晒晏晝、夜晚，但係幾好玩幾好笑，我從來都未試過有咁樣嘅writing camp嘅體驗。」