近期，由於阿爺出手幫香港解決了重要的政治難題，各界開始討論如何解決房屋問題，有人話要發展新界新市填，有人話繼續填海最好，有人就表示要發展郊野公園邊陲地，但不論係明日大嶼抑或發展新市鎮，起碼搞十幾廿年，「人生有幾多個十年？」
對於覓地建屋，通常市民討論緊某一、兩個土地選項，就會忽略其他嘅可發展土地，但房屋嚴重短缺，點解社會唔可以統統都考慮？如果我係執政者，可能就會好似《九品芝麻官》入面嘅徐錦江講一句，「我要晒！」
既然要考慮方方面面的土地選項，一些不顯眼但佔地極多的土地，我哋都應該研究同考慮。大家有冇諗過，如果能夠進一步發展新界土地或祖堂地，都可以係解決香港土地荒嘅一帖良藥？現時，新界嘅祖堂地佔地2,400公頃，等於126個維園的土地，只要社會各界動動腦筋，配合修改法例，可以興建數十萬個住宅單位嘅土地，就近在咫尺！
祖堂地係乜東東？簡單而言，就係由傳統組織例如家族或堂而並非個人擁有嘅新界鄉村土地，由於由家族等持有，故被稱為「阿公地」。講明係「阿公地」，當然不是隨便能動，根據香港法例第97章《新界條例》，雖無訂明出售祖堂地的門檻，民政專員有權給予同意，但據報只要收到一份反對意見，就會否決申請。即是話，新界祖堂地多，但大家「得個睇字」。
老實講，要100%人同意出售或者發展一塊祖堂地，極度困難，總有人已經「失蹤」，或者扭計想爭取多啲利益。我斗膽提議，如果政府能夠立法或修法，只要祖堂地80%嘅權益人同意補地價轉換用地性質，則可以提出強制要求餘下20%權益人參與土地性質轉換的方案，做法有少少似強拍，如果方案獲通過，補地價獲批，興建多層式住宅，整個過程大約只需2.5年，呢個亦係短、中期釋放一部分土地以解決房屋問題的絕佳方法。
綜觀內地、星加坡以至台灣，有自置居所的人口比例達八、九成，而香港住在自置物業的人口大約有五成（包括居屋），剩低的五成人，大約三成住公屋，兩成租屋住。
換句話講，即係唔計政治立場，香港社會本身已經撕裂成兩半，有樓嘅就享受物業升值成果，無樓嘅睇住樓價上升而望門興嘆，社會矛盾當然「沒有更深，只有更深」。所以，要解決房屋問題，香港政府要果斷出手，亦要激活私人市場更積極參與！
梁熙
** 博客文章文責自負,不代表本公司立場 **