譚玉瑛曾有份演《輪流轉》 睩大雙眼睇李琳琳區嘉雯接吻戲

75歲李琳琳復出拍戲首演女同志！

資深藝人李琳琳和導演楊曜愷今日（5月14日）到新城廣播接受《QK玉瑛室》訪問，兩人與主持譚玉瑛、何基佑及麥皓兒大談拍攝電影《從今以後》的點滴，相隔30多年「出山」拍電影，李琳琳坦言是被劇本和角色所吸引，她稱：「原本我都有啲猶豫不決，我最主要驚自己out咗，始終三十幾年冇喺幕前演戲，又做咗『寄生蟲』好耐。不過John哥（老公姜大衛）都話呢個角色好難得，自己都好想做，所以接受導演邀請。」

李琳琳、導演楊曜愷接受新城《QK玉瑛室》訪問。

75歲李琳琳復出拍戲。

導演楊曜愷被問到為何會選中李琳琳做主角？他表示：「我想搵啲好耐冇見過嘅演員，比較特別啲嘅，唔係成日喺電視台見到做阿媽嗰啲演員，咁啱搵到一套80年代舊電視劇《輪流轉》見到琳琳姐，覺得佢好適合。」譚玉瑛聞言即表示自己亦有份參演《輪流轉》，令眾人相當驚訝，她透露：「我當年喺訓練班出嚟，有份喺劇入面做學生，即係你睇極都睇唔到我，但又有份捱夜拍嗰啲。」

譚玉瑛表示要入戲院睩大雙眼睇李琳琳和區嘉雯接吻戲。

李琳琳與楊曜愷

75歲的李琳琳在電影中與另一位女主角區嘉雯有大膽的接吻鏡頭，角色甚為突破，譚玉瑛直言自己在戲院看該幕接吻戲時要碌大雙眼，她說：「我要睇吓有幾親熱！」而該場接吻戲，則由李琳琳和區嘉雯自由發揮，李琳琳稱：「嘉雯嗰隻眼唔使講嘢就有晒戲喺裡面，令到我好想摸佢塊面，輕輕鍚咗佢一啖，但佢仲望住我，我覺得自己唔夠，要嘴多佢一啖，仲要勁啲嘅。」譚玉瑛大讚李琳琳：「果然係功力深厚嘅演員。」

左起：何基佑、李琳琳、楊曜愷、譚玉瑛、麥皓兒

韓馬利自小熱愛跳舞，她在節目中透露入行前曾是一名舞者

藝人韓馬利（Mary）接受譚玉瑛（阿譚）、何基佑及黃筠兒主持的新城《QK玉瑛室》節目訪問，大談入行經歷。阿譚坦言和韓馬利不太熟稔，也未曾合作過，惟雙方早前獲公司頒贈30周年金牌，兩人坐在一起談天，韓馬利突然請教阿譚如何跟伴侶維繫感情，而感情生活相當低調的阿譚，亦跟她侃侃而談：「大家都係女人，都可以分享吓。」

韓馬利自小熱愛跳舞，她在節目中透露入行前曾是一名舞者，但當時父母認為跳舞沒出息，故反對她跳舞。「我媽咪係教書嘅，佢覺得有書唔讀去跳舞有咩發展？但佢反對之下好民主，而且我細個代表好多學校去攞獎，又代表全香港去比賽，喺1970年代表日本世界博覽會喺香港館表演，我同查理斯王子影過相㗎！」引來全場譁然。

後來韓馬利被母親送到英國留學，但她不喜歡讀書，一年之後獨自購買機票返港，任性的她令母親相當生氣，「咁返到香港我就同周梁淑怡（Selina）個女補習，我媽咪同佢講，話個女讀唔成書好冇用，Selina話你不如入TVB做PA。見工嗰個係孫郁標，佢見我跳舞攞咁多獎，唔跳就嘥咗，咁啱公司唔夠舞蹈員，佢問我可唔可以去跳舞，但我媽咪就係唔想我跳舞，點知Selina出口，我媽咪就應承畀我跳一年，PA有位就轉番過去。之後就好自然轉到幕前，真係無心插柳柳成蔭。」

韓馬利1976年首次拍劇便在《陸小鳳》中擔任女主角，直到現在仍在影視圈發展，當年未入過訓練班的她，自爆被李家鼎罵得最多，「以前拍功夫片，有一段時間好鍾意用拳腳，全部都係自己做冇替身，除咗吊威吔或者好高跳落嚟，嗰時邊有學過，臨時拍臨時學，入到廠學完要即刻拍，你知李家鼎幾咁惡，我直情打到出廠嘔，嘔完仲要畀佢鬧蠢到死；不過佢個人心地好好，好關心人，只係性格係咁。」

與老公杜燕歌結婚35年的韓馬利，笑言與丈夫十分不相襯，「我哋簡直係南轅北轍，無論係我哋嘅思想、生活習慣、鍾意嘅嘢都完全唔一樣，冇拗撬時就好，如果碰到底線，我會話再講我會發火，咁大家就唔出聲；我同佢都三十幾年，由好難磨合，到依家都彼此尊重對方。」