早前《巴士的報》喺facebook專頁徵集大家難忘收禮物經歷，收集到不少有趣故事，以下係十位幸運兒分享的故事。先在此恭喜大獎得主Isaac Mak，將獲得價值$2,728港元嘅Apple Watch一隻，其餘九位亦會收到兩張Pacific Coffee咖啡優惠券。
設計圖片
《香港味道》 － Isaac Mak
試過在聖誕聯歡會交換禮物，當時要準備一份10元以下的禮物，我就親手製作兩張書籤。輪到我抽，抽中最大嗰份。我拆開包裝紙，見有一個鞋盒；打開鞋盒又是一個餅罐，以為是餅乾；怎料再打開，竟是一個空膠樽！我大叫：「咩嚟架？」準備這份禮物的人對我說：「恭喜你，你抽中了香港的新鮮空氣……」我打開蓋，深深聞了一下，對他說：「噢！香港的味道！」
《讓我計劃過去》 － Peter Leung
2007年聖誕節，公司部門玩交換禮物，我收到一本「2007年記事簿」。事後我問過所有同事到㡳係邊個送，無人肯認。
《伴我成長有Kitty》 － Tsz Ching Ng：
小時候學校聖誕交換禮品，抽中一個hello kelly垃圾桶，男校居然有人拿hello kitty垃圾桶當禮物！時隔十多年，每年都收到不同禮品：杯、CD、毛巾、食物、相架，但陪得我最久的，卻還是這個垃圾桶，根本沒機會爛，仍佔我家一個位置。
《報紙包報紙包報紙包報紙》 － Toby Chu：
記得以前小學雞時期好興交換聖誕禮物。我接到好朋友禮物一刻已覺得奇怪，因為份禮物用報紙包住。我無問咁多即刻拆，點知發現唔太對路：「點解報紙入面又係一份用報紙包既禮物既？」我唯有繼續拆，拆去無數層報紙後，發現最裏面係一份完整的報紙。
設計圖片
《就是膽生毛》 － Cheuk Wa Chan：
他是我上司，職位比我高，但「功能上」真係唔夠班，嘢又唔識做，又要扮大佬！公司聖誕節交換禮物環節，要求同事一星期前抽出送禮對像，再為對方預備一份個人化禮物。我跟同事交換抽籤結果，特意安排好為我至愛的上司準備一塊手寫板，更在眾人面前話佢打字有困難，有新手寫板可以幫到佢。
《恐怖馬騮面》 － Tenny Kwan：
以前女同事去南非旅行，聽她說那邊鑽石好平，買一點鑽石。我諗住佢咁識貨，其他手信應該OK啦，以興奮心情拆開來看，卻發現是個恐怖的馬騮面木頭公仔。上邊有手繪紅色顏料，驟眼望來有點似血，十分詭異，感覺有些不安。我面有難色說：「可不可以不要？」她說：「係特登買俾你的，幾有特色呀！我自已也買了一個！」我最後收下了，懷着可能俾人鬧的心情回家。媽媽看後果然說：「乜嚟架？好像落降頭咁？咁恐怖，不要放係屋企了！」於是我只好退回給她，之後份手信去向就不得而知了。
以下係讀者附上的手繪示意圖，俾各位想像一下係咩樣
《嘆地獄檸檬煲青瓜入院慶生》 － Chung Hing Law：
奶奶素來喜歡自創古怪菜色，號稱「地獄廚神」，神作包括朱古力燉鴨，聞所未聞！前年我生日，奶奶心血來潮話要煮兩味新菜式，我雖然又肥又大隻而且個胃訓練有素，但當日食咗份「禮物」檸檬煲青瓜落肚後都係頂唔住，個肚痛到狂標冷汗、面青口唇白。奶奶嚇到即刻打999報警叫十字車送我入院。醫生好風趣咁同我講左聲生日快樂，話我只係食物中毒啫，洗完胃唞吓就可以出院喇！嗰刻我就發誓要努力搵錢搬出去住，唔要再寄人籬下做白老鼠。
《生日白爉燭》 － Eva Kam：
記得某年生曰，前男友送我一個法國製造香氛爉燭，他還說這個禮物是朋友獨家代理，重點是每款只有一個。我原先滿心歡喜，即時拆開一看，結果香味可以接受，但顏色就絕不適合生日時收到。不用多說，大家都知是跟麼顏色吧！唉！
設計圖片
《環保小先鋒》 － Sharkk Ko：
細個嗰陣我姨婆送咗件生日禮物比我，原本以為係玩具、遊戲機之類。佢送到嚟嗰陣仲有個盒裝，睇到我「眼金金」。點知一打開，竟然係一件六、七十年代嘅花花衫，索一索仲舒根活絡，因為件衫成陣藥油味。據說此衫同姨婆有不少肌膚之親！我姨婆真係環保小先鋒。
《唯一睡衣難捨棄》 － Kai Chit Fu：
我小時候搞過幾次生日會，生日禮物多數都是書籍。有一次生日會我朋友則來了一份用包裝紙包裝的禮物，摸下去軟綿綿。他很熱切跟我說要我拆開包裝。我拆開後當堂嚇一跳，然後得啖笑，原來他送了一套睡衣給我！這套睡衣是我人生中第一套、也是唯一一套睡衣。每晚我都穿著它睡著，直到小六不再合身才不穿。我並無丟掉，因為它象徵小孩子的純真、以及一份真摯友誼。
