各地大力推動再生能源，但香港地方狹小，無地方就難搞，但科技大學就跳出思想框框，善用偌大嘅校園，同太陽能發電系統承辦商合作，喺校內五十個地點，包括學術及研究中心、體育及交通大樓、學生及教職員宿舍等，加設八千塊太陽能板嘅發電系統，係香港最大規模嘅太陽能發電系統。朋友笑言，科大可以改名做發電大學。
呢個系統喺未來二十五年期間，每年太陽能發電量達到三百萬度，夠九百戶三人家庭一年嘅用電量，仲減少大約一百五十萬公斤碳排放。科大參與咗中電嘅可再生能源上網電價計劃，每年平均可以為科大帶嚟四百萬收入，收益會投放喺大學其他節能減排嘅措施，例如更換省電照明系統、更新節能嘅空氣調節系統、優化樓宇製冷系統等。
第一階段嘅發電系統工程準備下個月展開，預計九個月就可以完成主要安裝，造價差唔多五千至六千萬。科大可持續發展部主管博克特話畀小妹聽，嚟緊會設立一座「創意教育中心」，俾科大教職員試驗參與有關太陽能板同可再生能源相關嘅研究項目。
Kelly Chu
