石修及米雪任歌唱比賽評審
日前，石修及米雪為馬來西亞《Astro經典名曲歌唱大賽2024》擔任評審，二人突然現身，除了令現場觀眾即時起哄，亦令一眾參賽者大感驚喜。石修及米雪均表示喜歡唱歌及跳舞，眾所週知石修玩了多年色士風，但原來他亦喜歡唱歌，既可抒發情緒，又可減壓，娛己娛人，多年前亦曾參加過歌唱比賽，更贏得冠軍，「參加過《「李後主」歌唱比賽》得第一名，我記得嗰陣時係唱《破陣子》。」除此之外，飲歌亦一大堆，「平時冇唱K，不過飲歌都有幾首：《李香蘭》、《喜歡你》、《海濶天空》、《hotel California》、《I don’t want to talk about it》。」至於米雪坦言自己專注演戲，笑言：「知道自己唔係呢瓣嘅，你出去比賽，一定有人唱得好過你，咁就唔好阻住大家啦，俾啲心機做戲好過啦。」不過其實她一直有跟老師學唱歌，「唱歌係因為有陣時要出去做宣傳或者登台演出，呢個係滿足嘅、自己都開心嘅。一直都有跟老師練唱歌，一定要練住咁把聲先至可以越唱越好，唔會停留喺原地。」
石修及米雪為馬來西亞《Astro經典名曲歌唱大賽2024》擔任評審
石修及米雪均表示喜歡唱歌及跳舞
這次作為歌唱比賽評審，米雪認為最重要是參賽者有否努力、用心及練歌，「呢啲係聽到、睇到，一定要用工，再加埋喺台上嘅表演、現場嘅對答，我覺得聲、色、藝呢幾樣係好緊要。」至於作為音樂人的石修則更加嚴謹，「會注意參賽者嘅選曲，大家熟識嘅，能得到評判共鳴，自己能駕馭嘅，能盡量發揮，出錯機會少；衣著要配合首歌，唔可以錯配，七彩繽紛亂咁配搭會扣分。因唱歌配搭衣著是 showmanship ，不可分割。其餘就係音準、音域、音質、節拍、delivery能力、感情、肢體語言、對歌曲歌詞了解、風格及唱出嚟嘅味道。」石修對其中一位參賽者印象特別深刻，「有一位唱《夜上海》嘅女參賽者，完全唱出歌曲嘅描寫，將紙醉金迷、夜夜笙歌、奢侈浮華嘅意境，用歌聲發揮得淋漓盡致。」
米雪認為最重要是參賽者有否努力、用心及練歌
