伍允龍大談功夫係一種技術 可以慳力簡單擊倒對方又可保護自己

伍允龍自小受爸爸的薰陶，與武術結下不解之緣！

伍允龍（Philip）接受新城《思家運動.營》節目主持思敏，7歲起開始習武的Philip，自爆小時候因一原因才的起心肝學武術，「細個爸爸教我功夫都係想幫我放電，因為我比較活躍，等我打完之後可以靜啲，直至13歲喺學校畀同學一搥打落我心口瞓咗喺到，嗰時就開始好認真去學習武術。」

伍允龍接受新城《思家運動.營》主持思敏訪問。

大談功夫經！

Philip指功夫對他來說是一種技術，可以用最慳力、直接及簡單的方法去擊倒對方，同時又可以學懂如何保護自己，不被對方擊倒。「依家我啲功夫主要用嚟拍戲，當然我知道個目標先可以表達到出嚟。」Philip的製作公司於今年3月開拍了一套電影《無名火》，戲中的他不但打到飛起，更首次挑戰印尼武術和運用虎勾刀，「我唔識印尼武術，不過我模仿力OK，所以請咗個專業印尼功夫師傅做顧問，幫手執我啲動作。」

伍允龍認為功夫是一種技術，可以慳力簡單擊倒對方，又可保護自己。

伍允龍與主持思敏合照。

Philip的父親在美國開武館，旗下有不少學生，他指每位學生前往學功夫都有不同原因，「好得意，有啲睇完電影《葉問》就好想學，所以部戲出咗之後，喺美國嗰邊多咗好多學生，有啲就想有個技術可以保護自己或身邊人，亦有啲純粹為興趣。」

相談甚歡！

詳細節目內容，請留意10月27日播出，下午3-3時半，新城知訊台《思家運動.營》節目，網址：https://www.metroradio.com.hk/MetroInfo/

齊創世界紀錄！

前港姐謝寧日前與社企「Codekey Cookies」的曲奇品牌創辦人黃明慧（花花）及前無綫公關部負責人曾醒明，到新城廣播接受薛家燕、范振鋒及思敏主持的《開心大派對》訪問，宣傳下月2日假荃灣舉行的《「點連多元•世界紀錄」暨慈商社市集》慈善活動，屆時會有逾400人集體製作巨型點字曲奇，齊創世界紀錄。

謝寧、曾醒明、社企黃明慧接受新城《開心大派對》訪問。

謝寧和花花相識多年，兩人同樣熱心公益，在這次慈善活動中擔任技術總監的謝寧，笑言是花花太過抬舉自己，「真係不敢當，花花嘅企業都做咗十年，雖然佢係視障人士，但佢上山下海，又爬山又潛水，仲會自己做曲奇同月餅，好似正常人一樣，我佩服到不得了，同埋佢喺加拿大完成咗大學心理學系課程，依家幫人做埋心理輔導，好有才華，今次佢一call我話有呢個活動，我即刻舉腳贊成。」

謝寧下月2日辦曲奇慈善活動。

家燕姐問曲奇餅上的點字是甚麼？黃明慧解釋是視障人士專用的點字，「大家成日都會見到，例如電梯入面見到嘅一點點，就係盲人摸嘅點字，至於點字曲奇係我哋首創，每塊曲奇都有點字，亦都有唔同意思喺裡面，有師傅曾經問我，『點解你咁有創意，鍾意做牌九曲奇』，哈哈！」花花又透露這次慈善活動，會有400多人在超過1600塊曲奇上面寫點字，「我哋會寫代表英文字LOVE，一齊做一塊大心形曲奇，希望可以破世界紀錄。」而是次活動籌得善款，將會幫助視障、聽障、智障、少數族裔及長者等等，極具意義。

集400人製作巨型視障人士點字曲奇！

家燕姐欣賞曾醒明文筆 每年生日特刊係曾生執筆
至於曾醒明成立的義工團體莒光文化服務基金，亦有份參與是次慈善活動，「我同謝寧識咗好多年，我第二屆港姐開始跟，謝寧係第十三屆港姐冠軍，大家都好鍾意做善事。」家燕姐指傳媒十分相信曾醒明，而電視台多次面臨的公關危機，亦都靠他才得以解救，家燕姐還爆料，「曾生嘅文筆好掂，我每年生日出特刊，講嚟講去都講唔到重點，話畀曾生知，佢幾句就講晒我內心世界，真係好嘢！」
聽完家燕姐所講後，曾醒明表示要講個秘密給大家知，「每年香港小姐冠軍farewell嗰個講詞都係我寫，『喺過去一年….』，之後繞台一周，真係幫佢哋度身而寫，如果佢哋有為香港小姐或者電視台爭光，更加要特別發揚光大。」

謝寧

詳細節目內容，請留意10月26日，3-4時，新城知訊台《QK玉瑛室》節目，網址：https://www.metroradio.com.hk/MetroInfo/