無綫終於要推重頭劇《白色強人2》出陣，劇集挾首集餘勢，有原班人馬郭晉安、馬國明、唐詩詠、張曦雯之外，再加入視帝陳豪同視后胡定欣，卡士比同期劇又真係強好多。有趣係睇完《回歸》見到廚房佬祖哥，轉頭披件袍變身明成北院長YT，居然冇違和感，真心佩服佢扮乜似乜。

無綫拍醫療劇一向有啲計，就算數到遠古嘅《妙手仁心》，如果今日放喺深宵時段重播，都一樣咁好睇。不過以前啲劇醫療只係配菜，劇情講講吓都會轉移去番三角戀、四角戀度。冇計啦，師奶鍾意。

今日啲觀眾睇得外國劇多，水平都upgrade咗，唔再只滿足於婆媽嘅四角戀（但都係要有）。《白色強人2》將個視野擴闊，去到探討本港嘅醫療制度問題，如第一集YT就上立法聽證會，提出爭取「全面開放藥物名冊草案」，讓患有罕見疾病嘅窮人，都有藥可醫。

香港現行嘅醫療制度，好話唔好聽都真係成日畀人鬧。最令人百思不得其解梗係明明庫房水浸，但醫療款項永遠唔夠，公營醫院人手永遠不足。不過呢啲政策上嘅嘢，霸戲哥邊度識吖！

暫時睇完兩集《白色強人2》，都算係幾易入口。至於套劇會唔會影響到現實，突然喚醒香港政府關注起病人權益，呢個就後話嘞。




霸戲哥

** 博客文章文責自負,不代表本公司立場 **