世事往往就係咁巧合。無綫噚晚深宵時段播《大都會》，今朝就傳出壞消息，喺劇入面扮演汪明荃老竇嘅資深影星楊群，於噚日凌晨因膀胱癌病逝，享年88歲。

據悉楊群晚年跟妻女定居洛杉磯，生活一直保持低調，直至一年多前始與病魔惡鬥，最終因癌細胞擴散至肺部而不敵。

楊群為邵氏兄弟老牌演員，1949年出道，憑《秦香蓮》中飾演「陳世美」為人認識，後來先後憑《揚子江風雲》同《忍》兩奪金馬影帝，更被封為「影壇長青樹」。

港人最熟悉嘅，當然係佢喺《千王之王》入面嘅演出，佢扮演「北千手」卓一夫，與謝賢飾演嘅「南千手」羅四海齊名，紅極一時。霸戲哥細個係「亞視之友」，所以成日睇楊群演戲，《還看今朝》、《勝者為王》、《馬場風雲》、《郎心如鐵》全部有煲，佢嗰種老謀深算、亦忠亦奸嘅表情，有時幾令人不寒而慄。楊群極具台型，係當代唯一carry到亦正亦邪而又霸氣嘅角色，極有Kevin Spacey影子。

好想睇番《勝者為王II天下無敵》，佢同方剛都係演技出神嘅好演員，一個內歛、一個狂傲。賭片嚟講，呢套絕對超班。

願楊群先生一路好走。




霸戲哥

** 博客文章文責自負,不代表本公司立場 **