譚玉瑛爆朱茵當年拍《閃電傳真機》 獲節目組優待惹同事不滿

朱茵原來有優待唔使返外景！

朱茵、潘燦良和導演劉偉恒昨日 (8月7日) 到新城廣播接受譚玉瑛（阿譚）、何基佑及黃筠兒主持的《QK玉瑛室》訪問，朱茵和阿譚兩位昔日兒童節目《閃電傳真機》主持甫見面即熱情打招呼，阿譚更透露：「自從佢生咗囡囡之後就冇再見過佢。」而何基佑見到女神朱茵即化身小粉絲，主動遞上一張燙金Yes卡給女神簽名，事後還甜絲絲合照，他開心表示：「呢張卡真係要好好保存。」

朱茵、潘燦良和導演劉偉恒現身新城《QK玉瑛室》節目。

朱茵是90年代女神，當年她一邊修讀演藝學院，一邊返無綫拍攝兒童節目，她指當年半工讀是她人生一段最辛苦的日子，「因為兩邊走，學校有習作，又要返無綫拍兒童節目，同學之間好難明我點解要拍戲，但我逢一至五返學，周六日先拍到節目。」阿譚大爆當時同事都有微言：「對我哋呢啲返工嘅人來講，你點解咁有優待，唔使返外景。」

朱茵當年她一邊修讀演藝學院，一邊返無綫拍攝兒童節目。

朱茵追問收工時間有原因
問朱茵當時為何會拍兒童節目？她笑言也不知道，「嗰時無綫、亞視都入過學校揀啲啱佢哋節目的人，我係被揀選其中一個，但我只能夠拍兒童節目，仲記得我張合約係King Sir（鍾景輝）幫我簽，拍到後尾半年就快畢業，我就同無綫講我要返去畢業，因為我要攞到張畢業證書。」身旁的阿譚又爆朱茵當年拍節目會追問她收工時間，「佢都好抓緊時間，成日盤算幾時收工，但我又計得好準。」女神追問收工時間全因要同時照顧學業，被讚勤奮。

阿譚形容朱茵說話清晰不會轉彎抹角，朱茵則稱讚阿譚是元老級兒童節目主持，並跟阿譚說：「由我細個睇妳，到我入行同妳一齊做節目，喺妳身邊學到好多嘢，妳係靈魂人物，講嘅嘢就係。」

譚玉瑛大爆朱茵當年拍《閃電傳真機》有優待？

朱茵和潘燦良宣傳新劇。

朱茵和潘燦良合作拍劉偉恒導演新劇
朱茵和潘燦良在劉偉恒導演的新劇中跟小朋友有大量對手戲，潘燦良更會由一位「虎爸」變成暖男爸爸，而朱茵則飾演一名嚴肅的小學老師，與同住胞妹經常起爭執。提到相隔十多年再度拍劇，朱茵直言不感到吃力，「因為自己鍾意，同一班同聲同氣嘅人一齊做嘢好開心，而且香港製作真係好快手，我哋都冇乜甩過，係一個好好體驗，未來日子都好期待好劇本、好角色。」

何基佑（左）變身小粉絲要求朱茵簽Yes卡！

他開心表示：「呢張卡真係要好好保存。」

詳細節目內容，請重溫8月7日，下午3-4時，新城知訊台《QK玉瑛室》節目，網址：https://www.metroradio.com.hk/MetroInfo/

韓馬利自小熱愛跳舞，她在節目中透露入行前曾是一名舞者

藝人韓馬利（Mary）接受譚玉瑛（阿譚）、何基佑及黃筠兒主持的新城《QK玉瑛室》節目訪問，大談入行經歷。阿譚坦言和韓馬利不太熟稔，也未曾合作過，惟雙方早前獲公司頒贈30周年金牌，兩人坐在一起談天，韓馬利突然請教阿譚如何跟伴侶維繫感情，而感情生活相當低調的阿譚，亦跟她侃侃而談：「大家都係女人，都可以分享吓。」

韓馬利自小熱愛跳舞，她在節目中透露入行前曾是一名舞者，但當時父母認為跳舞沒出息，故反對她跳舞。「我媽咪係教書嘅，佢覺得有書唔讀去跳舞有咩發展？但佢反對之下好民主，而且我細個代表好多學校去攞獎，又代表全香港去比賽，喺1970年代表日本世界博覽會喺香港館表演，我同查理斯王子影過相㗎！」引來全場譁然。

後來韓馬利被母親送到英國留學，但她不喜歡讀書，一年之後獨自購買機票返港，任性的她令母親相當生氣，「咁返到香港我就同周梁淑怡（Selina）個女補習，我媽咪同佢講，話個女讀唔成書好冇用，Selina話你不如入TVB做PA。見工嗰個係孫郁標，佢見我跳舞攞咁多獎，唔跳就嘥咗，咁啱公司唔夠舞蹈員，佢問我可唔可以去跳舞，但我媽咪就係唔想我跳舞，點知Selina出口，我媽咪就應承畀我跳一年，PA有位就轉番過去。之後就好自然轉到幕前，真係無心插柳柳成蔭。」

韓馬利1976年首次拍劇便在《陸小鳳》中擔任女主角，直到現在仍在影視圈發展，當年未入過訓練班的她，自爆被李家鼎罵得最多，「以前拍功夫片，有一段時間好鍾意用拳腳，全部都係自己做冇替身，除咗吊威吔或者好高跳落嚟，嗰時邊有學過，臨時拍臨時學，入到廠學完要即刻拍，你知李家鼎幾咁惡，我直情打到出廠嘔，嘔完仲要畀佢鬧蠢到死；不過佢個人心地好好，好關心人，只係性格係咁。」

與老公杜燕歌結婚35年的韓馬利，笑言與丈夫十分不相襯，「我哋簡直係南轅北轍，無論係我哋嘅思想、生活習慣、鍾意嘅嘢都完全唔一樣，冇拗撬時就好，如果碰到底線，我會話再講我會發火，咁大家就唔出聲；我同佢都三十幾年，由好難磨合，到依家都彼此尊重對方。」