Ian陳卓賢成MIRROR首位成員開世界巡唱 衝出香港連去四站開騷

這次海外巡迴地點包括倫敦、墨爾本、悉尼及澳門等。

陳卓賢（Ian）今年7月在亞洲博覽展覽館連開7場個人演唱會《 IAN CHAN "TEARS" IN MY SIGHT SOLO CONCERT 》將眼淚存入作品，帶領樂迷穿梭於悲傷與希望之間的美麗世界，演唱會叫好叫座，在眾多樂迷的引頸期盼下，昨日（12月3日）Ian終於宣布即將舉辦首度海外巡迴，消息一出令歌迷又驚又喜。

陳卓賢（Ian）成首位MIRROR開巡唱。

7月Ian的亞博演唱會，不但展示了這位「眼淚王子」包辦歌曲創作、也能唱能跳、有感性跳皮一面。有見香港個唱後，不少Hellosss反映未有機會欣賞，昨日宣布2025年Ian首要工作，是帶著音樂衝出香港、走到更遠的地方，正如香港演唱會名一樣，以眼淚為主要題材，與各地Hellosss一起盡情地哭、放任地笑，以淚之名與Hellosss同遊Ian的音樂旅程。

海外巡迴地點包括倫敦、墨爾本、悉尼及澳門等。

美加就未在名單上，但Ian表示會盡量爭取。

《IAN CHAN "TEARS" IN MY SIGHT SOLO CONCERT TOUR 2025》由MakerVille、光尚娛樂主辦，是Ian特意選擇提早公布，以將2025巡唱的好消息作為聖誕禮物送到世界各地，而這次海外巡迴地點包括：倫敦、墨爾本、悉尼及澳門等，隨後巡唱多地亦會陸續公布。Ian巡唱消息曝光後，雖然尚未公開購票資訊，但已引起不少的話題，相信已經讓各地Hellosss開始期待，今次巡迴演唱會Ian會為大家帶來什麼新驚喜！

今天舉行的發佈會，同時安排60位Hellosss到場支持，Ian表示：「最感動係獲台下fans支持，回想自己幾年前第一個mini concert，大家都準備一些小驚喜給我，手幅上面寫畀我嘅massage ，都令我好感動。今次知道要開tour係受寵若驚，係一個好難得嘅機會，一路以來做好每一個作品，都有不同的訊息，TEARS係一個好用心的演唱會，希望可以帶到去唔同地方畀大家睇到，好值得開心，將會去到倫敦、墨爾本、悉尼、澳門。」

Ian從不覺得12位成員要比較及分第幾位。

他表示一直以來都是做好自己！

身兼音樂總監的Ian表示，會有新鮮感帶給大家，在每站都有不同的特點讓大家看到，Ian說：「rundown上有不同安排，會有自己新歌演唱外，故事呈現上有少少不同，亦可能會加當地一啲歌，但先賣關子保留驚喜。」Ian更表示現時心情已經既興奮又期待到各地演出。

到場Hellosss預先提交一些問題向Ian提問，Ian表示：「去巡迴一定會帶枕頭套、fans、大型的行李箱。」至於隨後會否做香港part 2演出，Ian表示當然希望可以，半年巡唱結束，也應剛好香港個唱一週年，至於期待已久Ian的新專輯，他笑笑口表示希望聖誕再有禮物送給大家，Ian說：「希望大家一齊同我期待一下！」

Ian希望用音樂擁抱各地Hellosss眼淚。

Ian自言不懂表達望作品引起共鳴！

陳卓賢Ian今年以故事串連推出的單曲，來到最後一首作品〈玩偶奇遇記〉，終揭曉他在故事中所飾演的主角，原來是一隻玩偶熊仔，他更投射自己的個性到這隻玩偶熊仔身上。

陳卓賢（Ian）今年推出第5首派台歌《玩偶奇遇記》。

Ian包辦新歌曲詞。

自去年年尾開始，Ian便開始構思創作一個故事，並透過歌曲及MV呈現出來，Ian說：「我喺上年年尾開始構思同創作今年呢五首歌，但歌曲、故事劇情，以至MV細節，都係一路製作一路微調，而主角其實係一隻熊仔，喺每個章節都有熊仔出現。」玩偶熊仔見證著一段愛情的開始、發展到終結，隨後亦有他自身的經歷，不過熊仔既無話語權，亦未能表達自己的意願。

年度企劃最終回故事揭盅。

坦言自己不擅表達愛意。

為何會揀選玩偶熊仔做故事主角呢？Ian解釋道：「因為人畜無害，同埋好似好多公仔都係熊仔，大家可能好多時會忽略咗佢，覺得佢嘅存在係理所當然，睇呢個故事嘅時候，亦唔覺得隻熊仔係關事，純粹係好表面覺得熊仔係定情信物，見到熊仔就好似見到你嘅另一半，但慢慢就帶出比較深層嘅意思，緊扣返主題：其實熊仔喺MV裡面有唔同形態出現，亦都係代表每一種心情，不過熊仔有很多無能為力嘅事，譬如佢都好鍾意主人，但言語上、肢體上都表達唔到自己。」透過今年這個故事，到〈玩偶奇遇記〉將故事揭盅，Ian最希望能給大家一點提醒，Ian說：「呢一連串故事，希望可以提醒大家，其實生活上唔係所有嘢都理所當然，可能有時要諗闊少少諗遠少少，所有嘢得來不易，要多啲喺唔同角度去諗。」Ian透露，玩偶熊仔亦是他個人的個性投射，說：「我都係一個唔太會表達自己嘅人 ，所以出一個咁嘅故事，睇下會唔會都有啲有共鳴嘅朋友。」

Ian化身玩偶熊仔！

Ian又相信，萬物皆有生命，亦有思想，千萬別漠視他們的感受。他說：「〈鑿〉裡面小女孩擁有一隻熊仔，佢冇諗過熊仔其實有佢自己嘅思想，喺小女孩心目中純粹係好簡單嘅物件存在喺佢生活。其實我哋喺日常生活中，忽略咗身邊好多大大小小嘅人或物件，我嘅歌好似〈留一天與你喘息〉裡面嘅石頭有生命、〈地球上的最後一朵花〉嘅花又有生命、〈鯨落〉嘅鯨魚都係有生命，但大家唔好忽略咗，佢哋亦都係有自己嘅思想。」

提醒大家多角度思考。

望新歌能引共鳴。